މިއީ އަހަރެންގެ ފަހު ވޯލްޑް ކަޕް: މެސީ

ޕެރިސް (އޮކްޓޫބަރު 6) - އަންނަ މަހު ގަތަރުގައި ފަށާ ފީފާ ވޯލްޑް ކަޕް މުބާރާތަކީ އާޖެންޓީނާގެ ކެޕްޓަން ލިއޮނެލް މެސީ ކުޅޭނެ އެންމެ ފަހު ވޯލްޑް ކަޕް ކަމަށް އޭނާ ބުނެފި އެވެ.

އީއެސްޕީއެން އާޖެންޓީނާ އަށް ދިން އިންޓަވިއު އެއްގައި އުމުރުން 35 އަހަރުގެ މެސީ ބުނީ، މިއީ އޭނާ އާޖެންޓީނާއާ އެކު ކުޅޭނެ ފަހު ބައިނަލްއަގުވާމީ މުބާރާޓް ކަން ބުނަން ދަތި ނަމަވެސް މިއީ އޭނާ ކުޅޭނެ ފަހު ވޯލްޑް ކަޕް ކަމަށެވެ.

"މިއީ އަހަރެންގެ އެންމެ ފަހު ވޯލްޑް ކަޕް، ޔަގީނުން ވެސް. އެގޮތަށް ނިންމާފައި އޮތީ،" ފްރާންސްގެ ޕީއެސްޖީ އަށް ކުޅެމުން އަންނަ މެސީ ބުންޏެވެ.

"ވޯލްޑް ކަޕް ފަށަން ވާއިރަށް ދުވަސްތައް ގުނަމުން މި ދަނީ. ހަގީގަތަކީ ކުޑަކޮށް ހާސްކަމެއް ހުރޭ. - މިބުނީ، އަހަރެމެން މިހާހިސާބަށް އައިސް ދެން ކިހިނެއް ވާނީ؟ މިއީ އަހަރެންގެ އެންމެ ފަހު މުބާރާތް، ކިހިނެއްބާއޭ ވާނީ؟ އަނެއްކޮޅުން ފަށަންދެން ކެތްމަދުވެފައި މި ހުރެވެނީ ނަމަވެސް ވަރަށް ރަނގަޅު މުބާރާތަކަށް ހަދަން ވަރަށް ބޭނުންވޭ."

މީގެ އިތުރުން މެސީ ބުނީ، ޓީމު އޮތީ ވަރުގަދަ ގުރޫޕެއްގައި ނަމަވެސް ވޯލްޑް ކަޕް ގައި ކޮންމެފަދަ ނަތީޖާއެއްވެސް ނުކުމެދާނެ ކަމަށެވެ. އަދި މުބާރާތް ކާމިޔާބު ކުރާނީ ނުވަތަ މުބާރާތުގައި މޮޅަށް ކުޅޭނީ ޓީމަކީ ކޮންމެހެން މުބާރާތުގެ ފޭވަރިޓުންނަށް ނުވެދާނެ ކަމަށެވެ.

"އަހަރެންނަކަށް ނޭނގޭ އާޖެންޓީނާއަކީ ފޭވަރިޓުން ކަމެއް، އެކަމަކު ތާރީހުން ޖާގަ ހޯދަން އަބަދުވެސް ވާދަކުރާ ބައެއް. އަހަރެމެންނަކީ ފޭވަރިޓުންނެއް ނޫން، އަހަރެން ދެކޭގޮތުގައި އަހަރެމެންނަށް ވުރެ މާ އުހުގައި އުޅޭ ޓީމުތައް އެބަތިބި،" ފަސްވަނަ ވޯލްޑް ކަޕް މުބާރާޓް ކުޅެން ތައްޔާރު ވަމުން އަންނަ މެސީ ބުންޏެވެ.

އާޖެންޓީނާއާ އެކު މެސީ އެންމެ ފަހުން ކުޅުނު ބައިނަލްއަގުވާމީ މުބާރާތަކީ މިދިޔަ އަހަރުގެ ކޮޕާ އެމެރިކާ މުބާރާތެވެ. މުބާރާތުގެ ފައިނަލުގައި ކުޅެ، މެސީ ވަނީ އާޖެންޓީނާ ސީނިއާ ގައުމީ ޓީމާ އެކު ފުރަތަމަ ފަހަރަށް ތަށްޓެއް ނަގައިފަ އެވެ. އޭގެ ފަހުން މިއަހަރު ވަނީ މިދިޔަ އަހަރުގެ ޔޫރޯ ކާމިޔާބުކުރި އިޓަލީއާ ދެކޮޅަށް ކުޅުނު ޗެމްޕިއަނުންގެ މެޗް (ފައިނަލިސިމާ) ވެސް ކާމިޔާބު ކޮށްފަ އެވެ.

މެސީ ވަނީ އާޖެންޓީނާގެ 20 އަހަރުން ދަށުގެ ޓީމާ އެކު 2005 ވަނަ އަހަރު ޔޫތު ވޯލްޑް ކަޕް ކާމިޔާބު ކޮށްފަ އެވެ. އަދި 2008 ވަނަ އަހަރު އޮލިމްޕިކް ރަން މެޑަލް ވެސް ހޯދި އެވެ. ސީނިއާ ޓީމާ އެކު 2014 ގެ ވޯލްޑް ކަޕުގައި ފައިނަލަށް ދަތުރު ކުރި ނަމަވެސް ޖަރުމަން އަތުން ބަލިވީ އެވެ.

މިހާތަނަށް ހަތަރު ވޯލްޑް ކަޕެއްގައި މެސީ ކުޅުނު އިރު، އެންމެ ފަހު ދެ މުބާރާޓުގައި ވެސް އާޖެންޓީނާގެ ކެޕްޓަނަކީ އޭނާ އެވެ.

މިދިޔަ އަހަރު ފްރާންސްގެ ޕީއެސްޖީއަށް ބަދަލުވި މެސީ، މި ސީޒަން ނިމުމަށް ފަހު އަލުން އެނބުރި ބާސެލޯނާއަށް ބަދަލުވާން އުޅޭކަމަށް މީޑީއާތަކުގައި އަޑު ފެތުރުނަސް މެސީ ބުނީ އޭނާގެ ކުރިމަގާ މެދު އަދި ގޮތެއް ނުނިންމާ ކަމަށެވެ.