މެސީ އަނިޔާގައި، ޕީއެސްޖީ އަށް އުނދަގޫ މޮޅެއް

ލޮރިއެންޓް (ނޮވެމްބަރު 6) - އާޖެންޓީނާގެ ތަރި ލިއޮނެލް މެސީ އަށް އަނިޔާގެ ސަބަބުން ނުކުޅެވުނު މެޗުގައި، ޕީއެސްޖީ އިން ފަހު ވަގުތު 2-1 އިން ލޮރިއެންޓް ބަލިކޮށް، އެއް ވަނައިގައި ލީޑު ދަމަހައްޓައިފި އެވެ.

މި ނަތީޖާއާ އެކު، މެޗަކުން ބަލިނުވެ ލީގު އެއް ވަނައިގައި އޮތް ޕީއެސްޖީ އިން ވަނީ ކުޅުނު 14 މެޗުން 38 ޕޮއިންޓް ހަމަކޮށްފަ އެވެ. ދެ ވަނައިގައި އޮތީ 33 ޕޮއިންޓާ އެކު އޮތް ލެންސް އެވެ. ލެންސް ވަނީ ރޭ ރަށުން ބޭރުގައި އޯޖާސް އާ ވާދަކޮށް 2-1 އިން މޮޅު ވެފަ އެވެ.

މެސީ ކުޅޭ އެންމެ ފަހު ވޯލްޑް ކަޕް ފެށެން ދެ ހަފްތާއަށް ވެފައި ވަނިކޮށް، އޭނާގެ އާކިލީސް ޓެންޓަން ދުޅަ ވެފައި ވާތީ އޭނާއަށް މިރޭގެ މެޗު ގެއްލުނު ނަމަވެސް، އަނިޔާ މާ ސީރިއަސް ނޫން ކަމަށް ޕީއެސްޖީ އިން ބުނެފައިވެ އެވެ. ޕީއެސްޖީ އިން އަންގާ ގޮތުގައި އަންނަ ހަފްތާ އަމިއްލަ ދަނޑުގައި އޮޒޭ އާ ދެކޮޅަށް ކުޅޭ މެޗުގެ ފަރިތަކުރުންތަކުގައި މެސީ ބައިވެރި ވާނެ އެވެ.

މެސީ ނުކުޅުނަސް ފްރާންސްގެ ތަރި ކިލިއަން އެމްބާޕޭ އާއި ބްރެޒިލްގެ ތަރި ނޭމާ ވަނީ ލޮރިއެންޓް އާ ދެކޮޅަށް މިރޭ ކުޅެފަ އެވެ. މެޗުގައި ފުރަތަމަ ލަނޑު ޖަހައި ލީޑު ހޯދީ ވެސް ޕީއެސްޖީ އިންނެވެ. ލޮރިއެންޓްގެ ޑިފެންސަށް ރަނގަޅަށް ބޯޅަ ކްލިއާ ކޮށް ނުލެވުމުގެ ފައިދާ ނަގައި، ހޫގޯ އެކިޓިކޭ ތަނަވަސް ކޮށްދިން ފުރުސަތެއްގައި މެޗުގެ ނުވަ ވަނަ މިނިޓުގައި މި ލަނޑު ޕީއެސްޖީ އަށް ޖަހައިދިނީ ނޭމާ އެވެ.

ގޯލަށް ފަހު، އެކިޓިކޭ އާއި އެމްބާޕޭ އަދި ސާޖިއޯ ރާމޯސް މި ހާފުގައި ފޮނުވާލި ހަމަލާތައް އޮރިއެންޓްގެ ކީޕަރު ވިޓޯ މަނޯނޭ ހުށިޔާރު ކަމާއެކު ދިފާއުކުރި އެވެ. ހާފު ނިމެނިކޮށް ލޮރިއެންޓް އަށް އެއްވަރު ކުރަން ރަނގަޅު ފުރުސަތެއް ލިބުނު ނަމަވެސް، އެ ޓީމަށް ކުޅޭ ނައިޖީރިއާގެ ޒުވާން ފޯވާޑް ޓެރެމް މޮފީ ފޮނުވާލި ހަމަލާ ގޯލާ އަމާޒެއް ނުވި އެވެ.

ފުރަތަމަ ހާފުގައި ލިބުނު ފުރުސަތުގެ ބޭނުން ނުކުރެވުނަސް، ދެ ވަނަ ހާފު ފެށިގެން އަށް ވަނަ މިނިޓުގައި ލޮރިއެންޓް އިން ނަތީޖާ އެއްވަރު ކުރި ލަނޑު ޖަހައިދިނީ މޮފީ އެވެ. އޭގެ ކުޑަ އިރުކޮޅެއް ފަހުން ލީޑު ނަގަން މޮފީ ނުރައްކާތެރި ހަމަލާއެއް ފޮނުވާލި ނަމަވެސް އެ ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

ޕީއެސްޖީ ޕޮޅުވި ލަނޑު މެޗުގެ 81 ވަނަ މިނިޓުގައި ޖަހައިދިނީ ޑިފެންޑަރު ޑެނީލޯ ޕެރޭރާ އެވެ. އޭނާ މި ލަނޑު ޖެހީ ނޭމާ ނަގައިދިން ކޯނަރެއް ބޮލުން ޖަހައި ގޯލަށް ފޮނުވާލައިގެންނެވެ. މި ލަނޑަށް ފަހު ކޯޗު ކްރިސްޓޯފް ގަލްޓިއޭ ވަނީ މެޗުގެ ފަހު ފަސް މިނިޓަށް އެމްބާޕޭގެ ބަދަލުގައި ޕަބްލޯ ސެރާބިއާ ކުޅެން އަރުވައިފަ އެވެ.

މިދިޔަ ހަފްތާ ވެސް ޕީއެސްޖީ އިން ލީގުގައި ހޯދީ އުނދަގޫ މޮޅެކެވެ. ނަމަވެސް ފަހަތުން އަރައި 4-3 އިން ޓައިރޯންސް ބަލިކުރި މެޗުގައި މެސީ އާއި ނޭމާ އަދި އެމްބާޕޭ ވެސް ލަނޑު ޖެހި އެވެ.