އަލް ކޯރު (ޑިސެމްބަރު 15) - މެޗުގެ ކުރީކޮޅު މޮރޮކޯގެ ދިފާއު ފޫއަޅުވާލައި 2-0 އިން މޮޅުވެ އެންމެ ފަހުގެ ޗެމްޕިއަން ފްރާންސް، ވޯލްޑް ކަޕްގެ ފައިނަލަށް ދަތުރު ކޮށްފި އެވެ.
ފްރާންސުން މެޗުގައި ޖެހި ފުރަތަމަ ލަނޑު ފަސް ވަނަ މިނިޓުގައި ޖަހައިދިނީ ވާތުބެލް ތިއޯ ހެނާންޑޭޒް އެވެ. މިއީ އިދިކޮޅު ކުޅުންތެރިއަކު މޮރޮކޯއާ ދެކޮޅަށް މި ވޯލްޑް ކަޕް ގައި ގޯލު ޖެހި ފުރަތަމަ ފަހަރެވެ.
ކުއާޓާ ފައިނަލް މެޗުގައި މޮރޮކޯގެ ކެޕްޓަން ރޯމިއަން ސައިސް އަށް އަނިޔާ ވެގެން ބަދަލު ކުރަން ޖެހުނު ނަމަވެސް، މި މެޗުގެ ފުރަތަމަ 11 ގައި ހިމެނިގެން އޭނާ ވަނީ ކުޅެފަ އެވެ. އެކަމަކު މި މެޗުގެ 20 ވަނަ މިނިޓުގައި އޭނާ އަށް އިތުރަށް ކުރިއަށް ނުގެންދެވިގެން ވަނީ ބަދަލު ކުރަން ޖެހިފަ އެވެ.
ފުރަތަމަ ހާފުގައި ފްރާންސްގެ އޮލިވިއޭ ޖިރޫ ވެސް ވަނީ ނުރައްކާތެރި ހަމަލާއެއް ފޮނުވާލައިފަ އެވެ. ކައުންޓާ އެޓޭކުގައި އޭނާ ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. މޮރޮކޯގެ އައްޒެދީން އޮނާހީ އޭރިއާ ބޭރުން ފޮނުވާލި ނުރައްކާތެރި ހަމަލާ، ކީޕަރު ހޫގޯ ލޮރިސް ވަނީ ދިފާއު ކޮށްފަ އެވެ.
މޮރޮކޯގެ ހަކީމް ޒިޔެޝް ނެގި ކޯނަރަކުން ލިބުނު ފުރުސަތެއްގައި ޑިފެންޑަރު ޖަވާދު އަލްޔަމީގު އޯވާހެޑަކުން ރީތި ހަމަލާއެއް ފޮނުވާލިއިރު އެ ބޯޅަ ވެސް ކީޕަރު ލޮރިސް ވަނީ ދިފާއު ކޮށްފަ އެވެ.
ދެ ވަނަ ހާފު ފެށިގެން މޮރޮކޯ އިން ބޮޑަށް ކުރިއަށް ޖެހިގެން ފްރާންސްގެ ގޯލަށް ނުރައްކާ ކުރަން މަސައްކަތް ކުރި ނަމަވެސް، ނެގި ހުރަސްތައް ދިފާއު ކުރީ ރަފައެލް ވަރާން އާއި އިބްރާހިމާ ކޮނާޓޭ އެވެ.
ފްރާންސްގެ ފަހު ގޯލު ޖެހީ 79 ވަނަ މިނިޓުގައި، ބަދަލު ކުޅުންތެރިއެއްގެ ގޮތުގައި ކުޅެން އެރި ރަންޑަލް ކޯލޯ މުއާނީ އެވެ. ކިލިއަން އެމްބާޕޭ އޭރިއާ ތެރެއިން ތިން ކުޅުންތެރިން ކައިރިން ނައްޓާލާފައި ތަނަވަސް ކުރި ފުރުސަތެއްގައި އޭނާ މި ލަނޑު ޖެހީ، ކުޅެން އެރިތާ 44 ސިކުންތު ތެރޭގަ އެވެ.
މިއީ ފްރާންސް ވޯލްޑް ކަޕްގެ ފައިނަލަށް ދަތުރު ކުރި ހަތަރު ވަނަ ފަހަރެވެ. ފައިނަލް ގައި އެ ޓީމު މިހާތަނަށް ބަލިވީ ހަމައެކަނި 2006 ވަނަ އަހަރު އިޓަލީ އަތުންނެވެ.
އަންނަ އާދިއްތަ ދުވަހުގެ ރޭ ކުޅޭ ފައިނަލް ގައި ފްރާންސް ކުޅޭނީ، އާޖެންޓީނާއާ ދެކޮޅަށެވެ. ދެ ޓީމު ވެސް ވަނީ މިހާތަނަށް ދެ ފަހަރު ވޯލްޑް ކަޕް ކާމިޔާބު ކޮށްފަ އެވެ.
ތިން ވަނަ ހޮވާ މެޗުގައި ކްރޮއޭޝިއާއާ ދެކޮޅަށް މޮރޮކޯ ކުޅޭ މެޗު އޮންނާނީ ހޮނިހިރު ދުވަހުގެ ރެ އެވެ.
