އިބޫ ވަރުގެ ރާޅާއެޅުންތެރިއެއް އުފެދެން ދުވަސް ތަކެއް ނަގާނެ: ސާފިން ކޯޗު

އިއްޔެ ނިމުނު އޭޝިއަން ސާފިން ޗެމްޕިއަންޝިޕްގައި ރާއްޖޭން ހޯދި ކާމިޔާބީ ތަކުރާރު ކުރަން އިތުރު 10 ނޫނީ 20 އަހަރު ނެގުން ކައިރި ކަމަށް ރާއްޖޭގެ ގައުމީ ސާފިން ޓީމުގެ ކޯޗު، ދެކުނު އެފްރިކާގެ ކްލައިޑް މާޓިން ބުނެފި އެވެ.

ރާއްޖޭން ވަނީ މި އަހަރުގެ މުބާރާތުގައި ދެ ބްރޯންޒް މެޑަލް އާއި އެއް ރިހި މެޑަލް ހޯދައިފަ އެވެ. އޭޝިއަން އަލޯހާ ކަޕް ޓީމް އިވެންޓާއި ފިރިހެން އޯޕަން ޑިވިޝަނުން ބްރޯންޒް މެޑަލް ހޯދި އިރު، ރިހި މެޑަލް ހޯދީ ފިރިހެން ޓީމް ރޭންކިން އިންނެވެ.

"ހުރިހާ އެތުލީޓުން ވެސް ވަރަށް ރަނގަޅަށް މަސައްކަތް ކޮށްފި މި މުބާރާތުގައި. ހަގީގަތަށް ވާހަކަ ދައްކާ ކަމަށް ވަނީ ނަމަ މިއީ މިހާރު ތިބި ރާޅާއެޅުންތެރިންގެ ބެޗަށް ލިބޭނެ އެންމެ ފަހު ކާމިޔާބީ ކަމަށް ވުން އެކަށީގެންވޭ،" ކޯޗު ކްލައިޑް މާޓިން "މިހާރު" އާ ވާހަކަ ދައްކަމުން ބުންޏެވެ.

"ޓޮޕް އެތުލީޓަކު އުމުރުން 30 އިން މައްޗަށް ދާއިރު އެންމެ މަތީ ފަންތީގައި ހިފަހައްޓާލަން އުނދަގޫ ވާނެ. އެކަމަކު އިބޫ ފިޔަވައި އޭނާ ތަފާތު. ނަމަވެސް އޭނާގެ އުމުރުން 47 އަހަރު ވެފައި، މިހާރު މި ވާދަކުރާ 20 އަހަރުގެ ކުދިންނާ ދެކޮޅަށް ވާދަކޮށް އަބަދު ކާމިޔާބު ނުހޯދިދާނެ. މިއީ ހަގީގަތް."

އިބޫ ވަނީ 2019 ވަނަ އަހަރު ޖަޕާނުގައި ބޭއްވި އޭޝިއަން ސާފިން ޗެމްޕިއަންޝިޕްގައި ވެސް ބްރޯންޒް މެޑަލް ހޯދައިފަ އެވެ. ތުލުސްދޫގައި މި ފަހަރު ބޭއްވީ، ހަތަރު އަހަރުގެ މެދުކެނޑުމަކަށް ފަހު އޭޝިއަން ސާފިން ފެޑެރޭޝަން (އޭއެސްއެފް) އިން އިންތިޒާމް ކުރި މުބާރާތެކެވެ.

މިއަހަރުގެ ފިރިހެން އޯޕަން ޑިވިޝަންގައި އިބޫ، ބްރޯންޒް މެޑަލް ހޯދި ނަމަވެސް ކުރިއާ އަޅާ ބަލާއިރު މި އަހަރު ވާދަކުރި އެތުލީޓުންގެ ފެންވަރު ރަނގަޅު ވެފައި، ހީޓުތައް ޖެލެންޖިން ކަމަށް އިބޫ ވަނީ ބުންޏެވެ.

"އެކަމަކު ހިތްވަރު ކޮށްގެން ހިފަހައްޓާލައިގެން އަނެއްކާ ވެސް ބްރޯންޒް އެއް ހޯދުނީމައި އުފާވޭ،" އިބޫ ބުންޏެވެ.

ކޯޗު ބުނިގޮތުގައި، ރާއްޖޭގެ އެންމެ ސީނިއާ ރާޅާއެޅުންތެރިންނާ، އަރަމުން އަންނަ ޒުވާން ޖީލާ ދެމެދު ވިއްސަކަށް އަހަރުގެ ތަފާތު އެބަހުއްޓެވެ. އިތުރު ކާމިޔާބީއަކާ ހަމައަށް ވާސިލް ވެވޭނީ ޒުވާން ރާޅާއެޅުންތެރިންނަށް ގިނަ ތަމްރީނުތަކެއް ދީ، ބުރަ މަސައްކަތްތަކެއް ކޮށްގެން ކަމަށް ބުންޏެވެ.

"މިހާރު މި ތިބަ ސީނިއާ ޖެނެރޭޝަނާއި ޒުވާން ޖެނެރޭޝަނާ ދެމެދު ވިއްސަކަށް އަހަރުގެ ތަފާތު އެބަ ހުރި. ސީނިއާ އެތުލީޓުންގެ އުމުރު ގާތްގަނޑަކަށް އެވްރެޖް 35 އަހަރުގައި މި އުޅެނީ، ޒުވާން ކުދިން ގާތްގަނޑަކަށް 16، 17 އަހަރު. ދެމެދުގައި އެއްވެސް ކަމެއް ނެތް،" ކޯޗު ބުންޏެވެ.

"އަރަމުން އަންނަ އެތުލީޓުން ރަނގަޅަށް ތަމްރީނު ކޮށްގެން ބައިނަލްއަގުވާމީ މައިދާނުގައި ކާމިޔާބީއަކާ ހަމައަށް ވާސިލް ވާން އެންމެ މަދުވެގެން ވެސް 10 ވަރަކަށް އަހަރު ނަގާނެ."

މި މުބާރާތުގައި ރާއްޖޭން ވަނީ ފުރަތަމަ ފަހަރަށް ޖޫނިއާ ޓީމު ބައިވެރި ކޮށްފަ އެވެ. ޖޫނިއާ ރާޅާއެޅުންތެރިންނަށް ބައިނަލްއަގުވާމީ ފުރަތަމަ މުބާރާތަށް ވެފައި، އުމުރާ ބަލާއިރު އެ ކުދިންގެ ފަރާތުން އުންމީދީ ޕާފޯމަންސެއް ފެނުނު ކަމަށް ކޯޗު ބުންޏެވެ.

"އަހަރެމެންގެ ޖޫނިއާ ރާޅާއެޅުންތެރިންނާ މެދު މުބާރާތަށް އައިސް ތިބި ބޭރުގެ ފަރާތްތަކުން ވެސް ވަރަށް ޕޮޒިޓިވް ކޮމެންޓު ލިބުނު. އަހަރެން ގަބޫލުކުރާ ގޮތުގައި ވަރަށް ބުރަ މަސައްކަތްތަކެއް އަދިވެސް ކުރަން އެބަޖެހޭ މެދު ނުކެނޑި ކުރިއަށް އޮތް ފަސްވަރަކަށް އަހަރު ވަންދެން،" ޒުވާން ރާޅާއެޅުންތެރިންނާ ގުޅޭގޮތުން ކޯޗު ބުންޏެވެ.

"އަހަރެއް ވަރު އެ ކުދިން އަހަރެންނާ އެކު ޓްރެއިން ކޮށްފި. އެކަމަކު އެއީ މުޅިން ވެސް ޓެކްނީކް ޓްރޭނިން. ފިޒިކަލް ޓްރޭނިން އާއި ޑައިޓްރީ ޓްރޭނިންގެ އިތުރުން މެންޓަލް ޓްރޭނިން ވެސް އެކުދިންނަށް މުހިއްމު. ބައިނަލްއަގުވާމީ މައިދާނުގައި އެންމެ މަތީ ފަންތީގެ 12 އަހަރު ނޫނީ 13 އަހަރުގެ ކުދިންނާ އެއް ފެންވަރަކަށް ދާން މި ހުންނަނީ ކުރަން މުހިއްމު ކަންކަން."