މާބައިދޫގެ ރާޅުގަނޑުގައި ވެސް ޗެމްޕިއަނަކީ ހަމަ ތުލުސްދޫގެ އަންމަޑޭ

ލ. މާބައިދޫ މެޝިން ސާފް ބްރޭކުގައި ކުރިއަށް ގެންދިޔަ "ކެރަންޑޫ" މުބާރާތުގެ އޯޕަން ބައިގެ ޗެމްޕިއަންކަން އަހުމަދު އާގިލް (އަންމަޑޭ) ހޯދައިފި އެވެ.

ޖުމުލަ 25 ސާފަރުންނާ އެކު ބުދަ ދުވަހު ފެށި މުބާރާތުގެ ޗެމްޕިއަންކަން އަންމަޑޭ ހޯދާފައި ވަނީ މިއަދު ކުރިއަށް ގެންދިޔަ ފައިނަލް ހީޓުގައި، ޒުވާން ރާޅާއެޅުންތެރިޔާ ޔަސީން އަހުމަދު ނާޝިދާ ވާދަކޮށް، ޖުމްލަ އެއް ޕޮއިންޓްގެ ތަފާތަކުންނެވެ.

ފައިނަލް ހީޓުގައި ހަތް ރާޅުން އަންމަޑޭ ވަނީ 15.34 ޕޮއިންޓް ހޯދާފަ އެވެ. އޭނާގެ ފަހު ދެ ރާޅުގައި 8.17 އާއި 7.17 ޕޮއިންޓަކާ ސްކޯ ކުރި އެވެ. ޔަސީން ވަނީ އޭނާގެ ހަ ރާޅުގައި ޕާފޯމްކޮށްފަ އެވެ. އޭނާގެ ތިންވަނަ ރާޅަށް ހޯދި 8.67 ޕޮއިންޓާއި ފަހު ރާޅުގައި ހޯދި 5.67 ޕޮއިންޓާ އެކު އޭނާ އަށް ޖުމްލަ 14.34 ޕޮއިންޓް ހޯދައިފަ އެވެ.

މިއީ އުމުރުން 14 އަހަރުގެ ޔަސީން، އޯޕަން ބައިގެ ފައިނަލެއްގައި ވާދަކުރި ފުރަތަމަ ފަހަރެވެ. މީގެ ކުރިން އުމުރުން 14 އަހަރުގައި، މިދިޔަ އަހަރު އޮތް މުލީކޮޅު ރާޅުގަނޑުގެ އޯޕަން ބައިގެ ފައިނަލްގައި ޔޫސުފް ކަޔާން ހަމްދާން ޒަކީ ވަނީ ވާދަ ކޮށްފަ އެވެ.

ހަމައެއާއެކު ޔަސީން ވަނީ ކެރަންޑޫގައި ޖޫނިއާ ޗެމްޕިއަންކަން ވެސް ހޯދައިފަ އެވެ. އޭނާ އޯޕަން ބައިގެ ފައިނަލުން ޖާގަ ހޯދާފައި ވަނީ ސެމީ ފައިނަލްގެ ހީޓުގައި، ޖޫނިއާ ފައިނަލްގައި ވެސް ވާދަކުރި މުހައްމަދު އިނާން އަބްދުލް ހަންނާން ބަލިކޮށްފަ އެވެ.

ސެމީ ފައިނަލްގެ ހީޓުގައި ޔަސީން ވަނީ 13.37 ޕޮއިންޓް ސްކޯ ކޮށްފަ އެވެ. އިނާން އަށް ސްކޯ ކުރެވުނީ 10.93 ޕޮއިންޓެވެ.

އަންމަޑޭ ވަނީ ސެމީ ފައިނަލް ހީޓުގައި އަހުމަދު ހިޝާމް ޝަހީމާ ވާދަކޮށް ޖުމްލަ 13 ޕޮއިންޓް ހޯދައިފަ އެވެ. ހިޝާމް އަށް ލިބުނީ 6.60 ޕޮއިންޓެވެ.

ކުއާޓާ ފައިނަލްގައި އަންމަޑޭ ވާނީ ސައްޔިދު ސަލާހުއްދީނާ ވާދަކޮށް 12 ޕޮއިންޓް ހޯދައިފަ އެވެ. ނޫހް މުހައްމަދު ދުނެއިމް އިރުޝާދާ ވާދަކޮށް ހިޝާމް، ކުއާޓާގައި 10.07 ޕޮއިންޓް ހޯދި އިރު، އިނާން ވަނީ އަހުމަދު ލުޒެއިން އާ ވާދަކޮށް 12.50 ޕޮއިންޓް ސްކޯ ކޮށްފަ އެވެ. އަދި ޔަސީން ވަނީ ކުއާޓާގައި މުހައްމަދު ފާރިޒް އާ ވާދަކޮށް 13.50 ޕޮއިންޓް ސްކޯކޮށް، ޖުމްލަ 2.5 ޕޮއިންޓުން ކުރި ހޯދައިފަ އެވެ.

އަންމަޑޭ ވަނީ މިއަހަރުގެ ލީގުގެ ފުރަތަމަ މުބާރާތް ކަމަށްވާ މުލީކޮޅު ރާޅުގަނޑުގެ ޗެމްޕިއަންކަން ވެސް ހޯދައިފަ އެވެ. އެ މުބާރާތުގެ ޗެމްޕިއަންކަން އަންމަޑޭ ހޯދީ ފައިނަލްގައި އިސްމާއިލް ރަޝީދު (ސްމައިލީ) ބަލިކޮށްފަ އެވެ. މި މުބާރާތުގައި ސްމައިލީ ބައިވެރިވެފައި ނުވާއިރު، އޭނާ އަންނަނީ ރާއްޖޭގެ ފޯ ސީޒަންސް ރިސޯޓުގައި ބާއްވާ ސާފިން ޗެމްޕިއަންސް ޓްރޮފީގައި ވާދަ ކުރަމުންނެވެ.

މާބައިދޫގައި އެމްއެސްއޭ އިން ވަނީ ފުރަތަމަ ފަހަރަށް ބޮޑީބޯޑިން އިވެންޓެއް ވެސް ހިމަނައިފަ އެވެ. ބޮޑީބޯޑިން އޯޕަން ބައިގެ ޗެމްޕިއަންކަން ހޯދާފައި ވަނީ އަލީ ޖާވިދު (ޖާއްޓެ) އެވެ.

ގައުމީ ސާފް ލީގުގައި މިއަހަރު ދެން އޮންނާނީ މާލޭ ވަރުނުލާ ރާޅުގަނޑު ސަރަހައްދުގައި ބާއްވާ ރަންނަމާރި ޗެލެންޖެވެ.