ކުޅިވަރު އެސޯސިއޭޝަންތަކުގެ ތެރޭގައި ހިނގާ ނުރަނގަޅު ކަންކަމާއި ކޮރަޕްޝަންގެ މައްސަލަތައް ހުއްޓުވުމަށްޓަކައި، އެ ތަންތަނުގެ ހިންގާ ކޮމިޓީ (އެކްސްކޯ) މެންބަރުން މިހާރަށް ވުރެ ބޮޑަށް ހޭލުންތެރިވެ، ޒިންމާދާރުވުމަށް ސްޕޯޓްސް މިނިސްޓަރު އަބްދުﷲ ރާފިއު އިލްތިމާސް ކުރައްވައިފިއެވެ.
ރާޒުވާ އެސޯސިއޭޝަންގެ ފައިސާ އަށް ހިޔާނާތްތެރި ވެފައިވާ ކަމުގެ ތުހުމަތުތަކާ އެ މައްސަލަ މިނިސްޓްރީން މިހާރު ދަނީ ބަލަމުންނެވެ. އިއްޔެ ބޭއްވި ނޫސް ކޮންފަރެންސްގައި އެކަމާ ބެހޭގޮތުން ސުވާލު ކުރުމުން މިނިސްޓަރު ރާފިއު ވިދާޅުވީ އެ މައްސަލަ މިހާރު ތަހުގީގީ މަރުހަލާއެއްގައި ވާތީ ސީދާ އެ އެސޯސިއޭޝަންގެ އެ މައްސަލައާ ބެހޭގޮތުން މިވަގުތު އެއްޗެއް ބުނެވެން ނެތް ކަމަށެވެ.
އެއަށް ފަހު މިނިސްޓަރު ވިދާޅުވީ އެފަދަ މައްސަލަތައް ކުޑަކުރުމަށްޓަކައި އެސޯސިއޭޝަންތަކުގެ އެކްސްކޯ މެންބަރުންނަށް ޒިންމާތަކެއް އެބައޮތް ކަމަށެވެ.
"އެކްސްކޯ މެންބަރުންނަށް ވެސް އަޅުގަނޑު ދަންނަވަން އޮތީ މާބޮޑަށް ގޯސްވަންދެން ނުތިއްބަވާށޭ. ރެގިއުލާކޮށް ޖަލްސާތައް ބާއްވައި ވާނުވާ ބެއްލެވުން އެއީ ވަރަށް މުހިންމު ކަމެކޭ (ހާއްސަކޮށް) މިހެން ދިމާވާ އެސޯސިއޭޝަންތަކަށް. ހާއްސަކޮށް އެކަހަލަ ކަމެއް އުޅޭ ކަމަށް ވެއްޖެއްޔާ،" މިނިސްޓަރު ވިދާޅުވި އެވެ.
ރާފިއު ވިދާޅުވީ ގިނަ ފަހަރަށް އެފަދަ މައްސަލަތައް އެނގެނީ ކަންކަން ބޮއްސުންލައިގެންދާ ފަހުން ކަމަށެވެ.
"ގިނަ ފަހަރަށް މި އޮންނަނީ މާ ފަހުން އަޅުގަނޑުމެންނަށް އެނގިފަ،" މިނިސްޓަރު ވިދާޅުވި އެވެ.
އެކަމަކު އެސޯސިއޭޝަންތަކުގެ އެކްސްކޯގައި ތިއްބަވާ ވަކިވަކި މެންބަރުން ވެސް އެ ބޭފުޅުންގެ ޒިންމާތައް ނަގައިގެން، އެ މައްސަލަތައް ސަމާލު ކަމަށް ގެނައުމުން، އެފަދަ މައްސަލަތައް ހުއްޓުވުމަށް މަގުފަހިވެގެންދާނެ ކަމަށް އޭނާ ވިދާޅުވި އެވެ.
"އޭގައި [އެސޯސިއޭޝަންތަކުގައި] ތިއްބަވާ ބައެއް މެންބަރުންނަށް ކަތިމަގަކުން ދިއުމުގެ ޗާންސް ވަރަށް ކުޑަވެގެންދާނެޔޭ. އެ މަގު ހަނިވާނެޔޭ،" އެކްސްކޯގައި ތިއްބަވާ މެންބަރުން އެފަދަ މައްސަލަތައް ރިޕޯޓްކޮށް ސަމާލުކަމަށް ގެނައުމުގެ މުހިންމުކަން ފާހަގަ ކުރައްވައި ރާފިއު ވިދާޅުވި އެވެ.
އޭނާ ވިދާޅުވީ ކުޅިވަރަކީ ވަރަށް މާތް މަގުސަދެއްގައި ކުރަން ޖެހޭ ކަމެއް ކަމަށެވެ. އެއީ އޭގެ ސަބަބުން މުޖުތަމައު އަށް ހަމަޖެހުން ގެނައުމުގެ ވަރަށް ބޮޑު ވަސީލަތަކަށް ކުޅިވަރު ވާތީ ކަމަށް ވަޒީރު ވިދާޅުވި އެވެ.