ދިވެހި އެތުލީޓުންގެ ފިޓްނަސް ހުރީ ކަންބޮޑުވާންޖެހޭ ހާލަތެއްގައިކަން ފާހަގަކޮށް، އެ މައްސަލައަށް ހައްލު ހޯދާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ރޭ ވިދާޅުވެއްޖެ އެވެ.
އާންމުކޮށް ހުޅުވާލައިގެން މިނިސްޓަރުންނާ ސުވާލުކުރުމަށް، ޕީއެސްއެމުން ބާއްވާ "އަހާ" ފޯރަމްގައި މިނިސްޓަރު ރާފިއު ވަނީ އެތުލީތުންގެ ފިޓްނަސްއާ ގުޅޭގޮތުން ކޮންބޮޑުވުންތަކެއް ހިއްސާ ކުރައްވައިފަ އެވެ.
އޭނާ ވިދާޅުވީ ބައިނަލްއަގުވާމީ އެއް މުބާރާތުން އަނެއް މުބާރާތާ ދެމެދު އެތުލީޓުންގެ ފިޓްނަސް ދަށަށްދާ ކަމަށެވެ.
މިނިސްޓަރުކަމަށް ވަޑައިގަތުމުގެ ކުރިން ސްޕޯޓްސް ފިޒީޝަނެއްގެ ގޮތުގައި ވެސް މަސައްކަތް ކުރެއްވި ރާފިއު ވިދާޅުވީ އެ މައްސަލަ ކުރިމަތިވަނީ އެކަށީގެންވާ ފެންވަރުގެ ކުޅިވަރުގެ ވަސީލަތްތައް ރާއްޖޭގައި ނެތުމުން ކަމަށެވެ.
"އަޅުގަނޑުމެންގެ ރާއްޖެއަށް ރީތި ނަން ހޯދައިދޭން ދާ އެތުލީޓުންނަކީ އެ މުބާރާތަކަށް ވަރަށް ރަނގަޅަށް ޕްރިޕެއާ ވެފައި ތިބޭ ކުދިން. އެހެން ނަމަވެސް މުބާރާތް ނިމުމުން އެ ކުދިންނަށް އެ ވަސީލަތްތައް ނެތީމަ ބަރާބަރަށް ފިޓްނަސް މެއިންޓެއިންއެއް ނުކުރެވޭ އަނެއް މުބާރާތް އަންނަދެން. އެހެންވީމާ އަނެއް މުބާރާތް އައުމާ ދޭތެރޭ ފިޓްނަސް ދަނީ ރާސްލާފައި ދަށަށް،" މިނިސްޓަރު ވިދާޅުވި އެވެ.
ބޭރުގެ މުބާރާތްތަކާއި ގޭމްސްތަކަށް ތައްޔާރުވުމުގެ މަރުހަލާގައި ގިނަ ކުޅިވަރުތަކުން ބޭރުގެ ޓްރޭނިން ކޭމްޕްތަކުގެ ބޭނުން ހިފަ އެވެ. އޭގެ ނަތީޖާ ވެސް ރަނގަޅެވެ. އޭގެ މިސާލަކީ މި އަހަރުގެ ޖެނުއަރީ މަހު ބޭއްވި ސާފް ފުޓްސަލް ޗެމްޕިއަންޝިޕް ކާމިޔާބުކުރި ގައުމީ ފުޓްސަލް ޓީމެވެ.
ރާއްޖޭގައި ފުޓްސަލްގެ ވަސީލަތް ނެތުމުން، މުބާރާތް ކައިރިވެފައިވަނިކޮށް، ޗައިނާގައި ތަމްރީން ކޭމްޕެއް ކުރިއަށް ގެންދިއުމުގެ ފުރުސަތު ގައުމީ ފުޓްސަލް ޓީމަށް ހޯދައިދިނެވެ.
މިނިސްޓަރު ވިދާޅުވީ ބައިނަލްއަގްވާމީ މުބާރާތްތައް ނިމުމަށް ފަހު، ރާއްޖޭގައި ތިބެގެން ވެސް ފެންވަރު ރަނގަޅު ވަސީލަތްތަކުގައި ތަމްރީނާއި ފިޓްނަސް ޕްރޮގްރާމްތަކުގެ ފުރުސަތު އެތުލީޓުންނަށް ފަހިކޮށްދެވޭނެ ގޮތަށް ކުޅިވަރުގެ ވަސީލަތްތައް ތަރައްގީ ކުރާނެ ކަމަށެވެ.
މާލެ ސަރަހައްދުގެ އިތުރުން ރާއްޖޭގެ އެކި ސަރަހައްދުތަކުގައި އަލަށް ހަދާ، އިންޑޯ ސްޕޯޓްސް ކޮމްޕްލެކްސްތައް އިމާރާތް ކުރާނީ އިންޑޯ ޖިމާއި ފިޓްނަސް ސެންޓަރުތައް ވެސް ހިމެނޭ ގޮތަށް ކަމަށް ރާފިއު ވިދާޅުވި އެވެ.
"(އެތުލީޓުންގެ) ފިޓްނަސް ކުރީގައި ހުރި މިންވަރަށް މެއިންޓެއިން ކުރެވެން އެބަޖެހޭ. އެހެންވީމާ މި ކޮމްޕްލެކްސްތަކުން އިރާދަކުރެއްވިއްޔާ އޭގެ ހައްލު ވަރަށް ބޮޑަށް ލިބިގެންދާނެ،" މިނިސްޓަރު ވިދާޅުވި އެވެ.
ރަށްރަށާއި މާލޭގައި ވެސް ހަދާ ފިޓްނަސް ސެންޓަރުތައް އިމާރާތް ކުރާނީ އާންމުންނަށް ވެސް ބޭނުން ކުރެވޭނެ ގޮތަށް ކަމަށް މިނިސްޓަރު ވިދާޅުވި އެވެ.