ކުޅިވަރުގެ ވަސީލަތްތަކުގެ މަރާމާތުގެ މަސައްކަތްތައް ހަރުދަނާކުރަން ރަށްރަށުގައި ހަދާ ފިޓްނަސް ރެކްރިއޭޝަން ސެންޓަރުތަކުގައި މަސައްކަތްކުރާ މުވައްޒަފުންގެ ދައުރު ފުޅާކުރައްވާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ރޭ ވިދާޅުވެއްޖެ އެވެ.
ޕީއެސްއެމްގެ "އަހާ" ފޯރަމްގައި މިނިސްޓަރު ވިދާޅުވީ ބައެއް ރަށްރަށުގެ ކުޅިވަރުގެ ވަސީލަތްތައް ހުރީ މިނިސްޓްރީގެ ބެލުމުގެ ދަށުގައި ނޫން ކަމަށެވެ.
އެހެންވެ، އެ ތަންތަން ވީރާނާ ވަމުންދާއިރު ވެސް މަރާމާތުގެ މަސައްކަތް އެއްވެސް ވަރަކަށް ނުކުރެވޭ ކަމަށް ރާފިއު ވިދާޅުވި އެވެ.
އޭނާ ވިދާޅުވި ގޮތުގައި، އޭގެ ސަބަބުން އެ ވަސީލަތްތަކުގެ އުމުރު ކުރުވެ، އެއްކޮށް އަލުން ބަދަލުކުރަންޖެހޭ ހިސާބަށް ހާލަތު ވަނީ ގޮސްފަ އެވެ.
ސްކޫލްތަކާއި ހޮސްޕިޓަލްތައް އެޑިއުކޭޝަން މިނިސްޓްރީ އާއި ހެލްތު މިނިސްޓްރީގެ ބެލުމުގެ ދަށުގައި ހުންނަ އުސޫލަށް، ރާފިއު މިސާލު ނެންގެވި އެވެ. އޭނާ ވިދާޅުވީ ކުޅިވަރުގެ ވަސީލަތްތައް ވެސް އަދި ރެކްރިއޭޝަން ސެންޓަރުތައް ވެސް ޔޫތު، ސްޕޯޓްސް މިނިސްޓްރީގެ ބެލުމުގެ ދަށުގައި ހުންނަންޖެހޭ ކަމަށެވެ.
އޭނާ ވިދާޅުވީ ބައެއް ރަށްރަށުގެ ކައުންސިލްތަކުގެ ބެލުމުގެ ދަށުގައި ހުރި ކުޅިވަރު ވަސީލަތްތައް މިނިސްޓްރީގެ ދަށަން ގެނައުމަށް 2024 ގެ ކުރީކޮޅު ސާކިއުލާއެއް މިނިސްޓްރީން ނެރުނު ކަމަށެވެ. އޭގެ ތެރޭގައި ހެޔޮއެދޭ ފަރާތްތަކުން ރަށްރަށުގައި ހަދާފައި ހުރި ކުޅިވަރުގެ ވަސީލަތްތައް ވެސް މިނިސްޓްރީގެ ބެލުމުގެ ދަށަށް ބަދަލުކުރުމަށް އެދި ސާކިއުލާގައި ހިމަނާފައިވާނެ ކަމަށް ވިދާޅުވި އެވެ.
"އަޅުގަނޑު ދެކޭގޮތުގައި ޔޫތު އެންޑް ސްޕޯޓްސް މިނިސްޓްރީގެ ދަށުގައި މި މަރުކަޒުތައް ހުންނަން އެބަޖެހޭ އަޅުގަނޑުމެންގެ މެންޑޭޓް ބަރާބަރަށް ފުލްފިލް ކުރަން،" ސްކޫލްތަކާއި ސިއްހީ މަރުކަޒުތަކާއި ހޮސްޕިޓަލްތައް އެ ދާއިރާތައް ނިސްބަތްވާ ދެ މިނިސްޓްރީއެެއްގެ ބެލުމުގެ ދަށުންގައި ހުންނަ އުސޫލަށް، މިސާލު ދައްކަވަމުން ރާފިއު ވިދާޅުވި އެވެ.
"އެހެންވީމާ ދާއިމީ ގޮތެއްގައި އަޅުގަނޑުމެންނަށް މި ތަންތަން (ކުޅިވަރުގެ ވަސީލަތްތައް) ބެލެހެއްޓިގެން، މަރާމާތަށް ބޮޑު ހަރަދެއް ނުކޮށް އެ ތަނުގެ އުމުރު ގިނަ ދުވަސްވަންދެން ދެމެހެއްޓޭނެ ގޮތަކީ. އެހެން ނޫނިއްޔާ މަރާމާތުކުރަން ވަރަށް ބޮޑު ހަރަދުތަކެއް މި ހުންނަނީ ކުރަންޖެހިފައި."
އެކަން ހަރުދަނާކުރުމަށް ރަށްރަށުގައި ގާއިމުކުރާ ފިޓްނަސް ރެކްރިއޭޝަން ސެންޓަރުތަކުގައި މިނިސްޓްރީގެ މުވައްޒަފުން ތިބެ އަވަސްއަވަހަށް މަރާމާތު ކުރުމުގެ މަސައްކަތް ކުރާގޮތަށް އިންތިޒާމުތައް ހަމަޖައްސާނެކަމަށް ރާފިއު ވިދާޅުވި އެވެ.
"އެކަން ކުރުމަށްޓަކައި އަޅުގަނޑުމެންގެ މަސައްކަތްތަކެއް ގާއިމުކުރެވިގެން އެބަދޭ ކޮންމެ ރަށެއްގައި ވެސް. ފިޓްނަސް އެންޑް ރެކްރިއޭޝަން ސެންޓަރު. މިއީ އަޅުގަނޑުމެންގެ ސްޓާފުން އެ ތަނުގައި މަސައްކަތް ކުރަން ތިބޭ ތަން. އެ ތަނުގައި މަސައްކަތުގައި ރިޕެއާ ކުރާ މީހުންނާއި [މުވައްޒަފުންނާއި] އެޑްމިނިސްޓްރޭޓިވް ސްޓާފުންނާއި އަދި އެކިއެކި ޕްރޮރާމްތައް ހިންގާ ބޭފުޅުން އެތަނުގައި ތިބޭނެ،" ރާފިއު ވިދާޅުވި އެވެ.
މިނިސްޓަރު ވިދާޅުވިގޮތުގައި އެ މުވައްޒަފުންގެ މަސްއޫލިއްޔަތުތަކުގެ ތެރޭގައި ކުޅިވަރާއި ފިޓްނަސްގެ ވަސީލަތްތަކާއި ޖިމްތަކުގެ ހާލަތު ބަލައި މަރާމާތުކުރަން ޖެހޭ ނަމަ އެ މަސައްކަތް ކުރުން ވެސް ހިމެނޭނެ އެވެ.
"ޑެއިލީ މޮނިޓަރިން ހަދަމުން އަދި ރެގިއުލާކޮށް އަޅުގަނޑުމެންގެ އައުޓްޑޯ ޖިމްތަކާއި ދަނޑުތައް (އެ މުވައްޒަފުން) ބެލެހެއްޓެމުން ދާނެ. އަދި މެއިންޓެނެންސް މަސައްކަތް ކޮންޓިނިއުސްކޮށް އަޅުގަނޑުމެންނަށް ކުރެވިގެންދާނެ. މިއީ މިކަމަށް ލިބޭނެ އެންމެ ރަނގަޅު ހައްލަކީ،" މިނިސްޓަރު ވިދާޅުވި އެވެ.
"ކޮންމެ ސެންޓަރަކަށް މެއިންޓެނެސް ބަޖެޓެއް ހަމަޖެހިގެން، ބަޖެޓްގެ ތެރެއިން އެކަން ކުރެވޭ ގޮތަށް ވަށާޖެހޭ ގޮތަށް އެކަން ކުރެވިގެން އަޅުގަނޑުމެންނަށް މިކުން ކުރެވޭނީ."
ރާފިއު ވިދާޅުވީ ރަށްރަށުގައި ހުރީ ޓާފް ދަނޑުތަކުގެ އާޓިފިޝަލް ވިނަގަނޑު ގަވާއިދުން ސާފުކޮށް ބެލެހެއްޓުމުން ވެސް އެ ދަނޑުތަކުގެ އުމުރު ގިނަ ދުވަސްތަކެއް ވަންދެން ދެމެހެއްޓެނެ ކަމަށެވެ.