ހުޅުމާލޭގައި ފުޓްބޯޅަ ޓްރެއިނިން ސްކޫލެއް އަޅަނީ

ހުޅުމާލޭގައި ފީފާ ފެންވަރުގެ ފުޓްބޯޅަ ޓްރެއިނިން ސްކޫލެއް އެޅުމުގެ މަސައްކަތް ސަރުކާރުން ފަށައިފި އެވެ.

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި އިއްވެވި ރިޔާސީ ބަޔާނުގައި، ރައީސް އަބްދުﷲ ޔާމީން ކުޅިވަރުގެ ދާއިރާ އަށް އަލި އަޅުއްވާލައްވައި ދެއްކި ވާހަކަފުޅުގައި ވިދާޅުވީ ފީފާ ސްޓޭންޑާޑް ފުޓްބޯޅަ ޓްރެއިނިން ސްކޫލެއް ހުޅުމާލޭގައި މިއަހަރު ޤާއިމުކުރުމުގެ މަސައްކަތް މިހާރު ފަށާފައިވާ ކަމަށެވެ.

މިދިޔަ މަހު "ކޮކާކޯލާ ވޯލްޑް ކަޕް ޓްރޮފީ ޓުއާ" ގައި ވޯލްޑް ކަޕް ތަށި ރާއްޖެ އަށް ގެނައިއިރު ބޭއްވި ރަސްމީ ހަފްލާގައި ވާހަކަ ދައްކަވަމުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ވެސް ވަނީ ޓްރެއިނިން ސްކޫލެއް ގާއިމްކުރުމުގެ ވާހަކަ ދައްކައިފަ އެވެ.

މިކަމާ ގުޅޭގޮތުން ޔޫތު މިނިސްޓްރީން ބުނީ ހުޅުމާލޭގައި އަޅާ ޓްރެއިނިން ސްކޫލު ހިންގާނީ ކުދިން އެތަނުގައި ބަހައްޓައިގެން ކިޔެވުމުގެ ފުރުސަތު ވެސް ލިބޭގޮތަށް ކަމަށެވެ. އެއީ ތަމްރީންތަކާއި ތައުލީމުގެ ކަންތައްތައް ވެސް އެއް ފަހަރާ ކުރިއަަށް ގެންދެވޭ ގޮތަށެވެ.

މި މަސައްކަތަކީ ކުޅިވަރާ ބެހޭ މިނިސްޓްރީގެ ބަޖެޓުގެ ތެރެއިން އެފްއޭއެމާ ގުޅިގެން ކުރެވޭ މަސައްކަތެެކެވެ. އަދި މި އަހަރު ނިމުމުގެ ކުރިން ޓްރެއިނިން ސްކޫލުގެ މަސައްކަތް ނިންމުމަށް މަސައްކަތް ކުރާ ކަމަށް ކުޅިވަރާ ބެހޭ މިނިސްޓްރީން ވަނީ ބުނެ އެވެ.

އެފްއޭއެމުން މުސްތަގުބަލަށް ފުޓްބޯޅަ ކުޅުންތެރިން ބިނާ ކުރުމަށް ގިނަ މަސައްކަތްތަކެއް ކުރުމުގެ ގޮތުން މިދިޔަ އަހަރު ވަނީ "ޓުވާޑްސް ފިއުޗާ"ގެ ނަމުގައި ޕްރޮގްރާމެއް ފަށައިފަ އެވެ. މި ޕްރޮގްރާމްގެ މަގްސަދަކީ ދިވެހި ރާއްޖޭގެ އެކި ކަންކޮޅުތަކުން އަތްފުނާ އަޅައިގެން ފެންވަރު ރަނގަޅު ކުޅުންތެރިން ހޯދައި ގައުމީ ޓީމުތަކަށް އެ ކުޅުންތެރިން ފޯރުކޮށްދިނުން ކަމަށް އެފްއޭއެމުން މީގެ ކުރިން ވަނީ ބުނެފަ އެވެ.