ކުޅުންތެރިންގެ ޕްރޮފައިލް: މާކޯ ވެރާޓީ

އުފަން ދުވަސް: ނޮވެމްބަރު 5، 1992

އިސްކޮޅު: 5 ފޫޓް 5 އިންޗި

ގައުމު: އިޓަލީ

ކުޅޭ މަގާމު: މިޑްފީލްޑާ

ކްލަބު: ޕީއެސްޖީ

ޔޫރޯ 2012 އަށް ތައްޔާރު ވުމަށް އިޓަލީން އެކުލަވާލީ ޕްރިލިމިނަރީ ސްކޮޑްގައި، ވެރާޓީ ހިމެނުނެވެ. އޭރު އޭނާ ކުޅެމުން ދިޔައީ އިޓަލީގެ ދެ ވަނަ ޑިވިޝަންގައި، ކްލަބު ޕެސްކާރާ އަށެވެ. އިޓަލީގެ ދެ ވަނަ ޑިވިޝަންގައި ކުޅެމުން ދިޔަ ކުޅުންތެރިންގެ ތެރެއިން އޭރު ސްކޮޑްގައި ހިމެނުނު ހަމައެކަނި ކުޅުންތެރިޔަކީ ވެރާޓީ އެވެ.

އެ އަހަރު އޭނާ ބަދަލުވީ ޕީއެސްޖީއަށެވެ. އިންޓަނޭޝަނަލް މީޑިއާތަކަށް ވެރާޓީ ފާހަގަވީ އޭގެ ފަހުންނެވެ. އޭނާ އަކީ މިހާރު އިޓަލީގެ ގައުމީ ޓީމުގެ މިޑްފީލްޑްގެ ހިތެވެ. ކޯޗް ރޮބާޓޯ މަންޗިނީގެ ޕޮޒެޝަން އަދި ޕާސިން ގޭމްގައި މުޅި ގޭމް ކުޅުވާ ކުޅުންތެރިޔަކީ ވެރާޓީ އެވެ. ޕީއެސްޖީގައި އޭނާ ދައްކަމުންދާ ކުޅުމާ އެކު ބޮޑެތި ކްލަބުތަކުގެ ޝައުގުވެރިކަން ވަނީ އޭނާ އަށް ހުއްޓިފަ އެވެ. ބާސެލޯނާ އިން އޭނާ ގަންދަން މަސައްކަތް ކުރި އެވެ.

އިޓަލީގެ ގައުމީ ޓީމަށް ވެރާޓީ އެންމެ ފުރަތަމަ މެޗެއް ކުޅުނީ، އޯގަސްޓް 2012 ގައި އެވެ. އިންގްލެންޑާ ދެކޮޅަށް އިޓަލީ ކުޅުނު މެޗުގަ އެވެ. ޔޫއެފާ 21 އަހަރުން ދަށުގެ ޔޫރޯ ފުޓްބޯޅަ މުބާރާތުގެ ފައިނަލަށް ދަތުރު ކުރި އިޓަލީގެ ޓީމުގައި ވެރާޓީ ހިމެނުނެވެ. އެ މުބާރާތުގެ އޯލް ސްޓާ ޓީމަށް އޭނާ ހޮވުނެވެ.

ވެރާޓީގެ ޕާސިން ސްޓައިލް އާއި މިޑްފީލްޑްގައި އޭނާ ކުޅުމުގެ ސްޓައިލް އެންމެ ވައްތަރީ، އިޓަލީގެ ލެޖެންޑް އެންޑްރެއާ ޕިރްލޯގެ ކުޅުމުގެ ސްޓައިލްއާ ކަމަށް އިޓަލީގެ މީޑިއާތަކުން ސިފަ ކުރެ އެވެ. ނަމަވެސް އޭނާ ރޯލް މޮޑެލްއެއްގެ ގޮތުގައި ބެލީ އިޓަލީގެ ކުރިގެ ފޯވަޑް އެލެސެންޑްރޯ ޑެލް ޕިއޭރޯ އެވެ.

ޔޫރޯއާ ކުރިމަތިލާއިރު، ވެރާޓީގެ ފިޓްނަސްއަށް ވަނީ އަސަރު ކޮށްފަ އެވެ. އޭޕްރިލް މަހު ކޮވިޑް-19 އަށް ޕޮޒިޓިވްވެ، ދެ ހަފުތާއަށް ކުޅުމާ ދުރަށް ދާން ޖެހުނެވެ. އަދި އޭގެ ފަހުން ކަކުލަށް އަނިޔާއެއް ލިބުނެވެ. ނަމަވެސް މިހާރު ވަނީ ރިކަވާވެފަ އެވެ. ޔޫރޯގައި އިޓަލީގެ ޓީމުގައި އޭނާގެ ދައުރު ބޮޑުވާނެ ކަމަށް ބެލެވެ އެވެ.