އިމްއާން އާއި ސައުސަން އަށް ފުރުސަތު ގެއްލި އޮލިމްޕިކްސް އަށް މުބާލް އާއި ސާޖިނާ

މި މަހު ފަށާ އޮލިމްޕިކްސް ގޭމްސްގެ ފެތުމުގެ ކެޓަގަރީން ރާއްޖެއިން ކުރިން ފޮނުވާ ގޮތަށް ނިންމި އަލީ އިމްއާން އާއި އައިޝަތު ސައުސަން އަށް ގޭމްސްއިން ފުރުސަތު ގެއްލިއްޖެ އެވެ.

އޮލިމްޕިކްސްގައި ސްވިމިންއިން ރާއްޖެ ތަމްސީލު ކުރާނީ މުބާލް އައްޒާމް އިބްރާހިމް އާއި އައިޝަތު ސާޖިނާ އެވެ. މުބާލް ވާދަކުރާނީ 100 މީޓަރު ފްރީސްޓައިލް އިވެންޓް ގަ އެވެ. އަދި ސާޖިނާ ވާދަކުރާނީ 200 މީޓަރު ބްރެސްޓްސްޓްރޯކް އިވެންޓްގައެވެ.

މުބާލް އާއި ސާޖިނާ ގެންދަނީ އޮލިމްޕިކްސްގެ ޓްރޭނިން ސްކޮލާޝިޕެއްގެ ދަށުން ރާއްޖެއިން ބޭރުގައި ޓްރޭނިން ހަދަމުންނެވެ. އެގޮތުން މުބާލްގެ ޓްރޭނިންތައް ކުރިއަށް ގެންދަނީ އޮސްޓްރޭލިއާގަ އެވެ. ސާޖިނާގެ ޓްރޭނިންތައް ކުރިއަށް ގެންދަނީ މެލޭޝިއާގަ އެވެ.

ސްވިމިން އެސޯސިއޭޝަނުން ބުނިގޮތުގައި އިމްއާން އާއި ސައުސަން އަށް އޮލިމްޕިކުގެ ފުރުސަތު ދޭން ހަމަޖައްސާފައި ވަނިކޮށް، އެ ދެ އެތުލީޓުންނަށް އެ ފުރުސަތު ގެއްލުނީ އޮލިމްޕިކްސް އަށް ކޮލިފައި ނުވާ ގައުމުތަކުން ވާދަކުރާ ފެތުތެރިންގެ އުސޫލަށް ދުނިޔޭގެ ސްވިމިންގެ މައި ޖަމިއްޔާ (ފީނާ) އިން މިދިޔަ މަހު 25 ގައި ބަދަލު ގެނައުމުންނެވެ.

އެ އެސޯސިއޭޝަނުން ބުނީ ރާއްޖެއިން ވާދަކުރާ ފެތުންތެރިން ވާން ޖެހޭނީ "ފީނާގެ ބައިލޯޒް" ދަށުން ފީނާގެ ރޭންކިން ގައި ރާއްޖެއިން އެންމެ ކުރި ލިބޭ ދެ ފެތުންތެރިންނަށް ކަމަށް ފީނާއިން އަންގައިފައިވާ ކަމަށެވެ.

ފީނާގެ ރޭންކިންގައި ރާއްޖެއިން އެންމެ ކުރީގައި އުޅޭނީ މުބާލް އާއި ސާޖީނާ އެވެ.

ކުރިން އިމްއާން އާއި ސައުސަން ފޮނުވަން ހޮވީ ވެސް ފީނާ އިން އޭރު އެންގި އުސޫލާ އެއްގޮތަށް ކަމަށް ސްވިމިން އެސޯސިއޭޝަނުން ބުންޏެވެ.

"ރާއްޖެއިން އޮލިމޕިކްސްގައި ވާދަކުރާ ދެ ފެތުންތެރިން ހޮވަން ވާނީ އައިޝަތު ސާޖިނާ، އައިޝަތު ސައުސަން، މުބާލް ޢައްޒާމް އިބްރާހީމް އަދި ޢަލީ އިއްމާންގެ ތެރެއިން ކަމަށް ވެސް ފީނާއިން ވަނީ އަންގާފައެވެ." ސްވިމިން އެސޯސިއޭޝަނުން މިއަދު ނެރުނު ބަޔާނުގައި ބުނެފައި ވެއެވެ.

އިމްއާން އާއި ސައުސަން ހޮވީ ހަތަރު ފެތުންތެރިންގެ މެދުގައި ބޭއްވި ޓައިމް ޓްރެއަލްގައި އެންމެ ކުރި ހޯދި ދެ ފެތުންތެރިންނަށް ވުމުންނެވެ.

އޭޕްރީލް 23 އިން މެއި 5ގެ ނިޔަލަށް ކުރިއަށް ގެންދިޔަ ޓައިމް ޓްރެއަލްގައި އެންމެ ގިނަ ޕޮއިންޓް ހޯދީ އިމްއާން އާއި ސައުސަން އެވެ. ޓައިމް ޓްރައަލްގައި ފިރިހެން ކެޓެގަރީގައި އިމްއާން ވަނީ 3،140 ޕޮއިންޓް ސްކޯ ކޮށްފަ އެވެ. މުބާލްއަށް ސްކޯ ކުރެވުނީ 3،024 ޕޮއިންޓެވެ. އަންހެން ބައިން ސައުސަން އެއް ވަނަ ހޯދީ 2،997 ޕޮއިންޓް ސްކޯ ކޮށްގެންނެވެ. ސާޖިނާއަށް ސްކޯ ކުރެވުނީ 2،905 ޕޮއިންޓެވެ.