ޓްވިޓާގައި ލައިކެއް ދިނުމުން ހިތްތައް ބުރައިގެންދާ މަންޒަރު ސިފަކޮށްލާށެވެ. ހިތްގައިމެއް ނޫންހެއްޔެވެ؟ ހަމަ އެގޮތަށް އެކި ވެބްސައިޓްތަކުގައި މިކަހަލަ ރީތި އެނިމޭޝަންތައް ލާފައި ހުރެ އެވެ. އެކަމަކު މިއީ އެ އެނިމޭޝަންތައް ލޮލަށް ފެނި ގެއްލޭހާ ކުޑަ ހިނދުކޮޅެއްގެ ތެރޭގައި ކޮށް ނިންމާލެވޭ ވަރުގެ މަސައްކަތެއް ނޫނެވެ.
ވެބްސައިޓްތަކާއި އެޕްލިކޭޝަންތައް ހަދާ މީހުން ހިތް އެދޭ ގޮތަށް އެނިމޭޝަނެއް ތައްޔާރުކުރުމަކީ ވަރަށް ބޮޑު ކަމެކެވެ. މި އެނިމޭޝަންތަކާއި މޯޝަން ގްރެފިކްސްތައް އަޑޯބީ އާފްޓަ އިފެކްޓްސް ކަހަލަ ސޮޕްޓްވެއާއަކުން ހަދައި ކޮންވާޓްކުރަން ޖެހެނީ މޫވީ ފޯމެޓަށެވެ. މިއީ އެނިމޭޝަން ކަމުދޭތޯ އެހެން މީހުންނަށް ދައްކާލުމަށެވެ. އެކަމަކު މި އެނިމޭޝަން ވެބްސައިޓެއްގައި ނުވަތަ އެޕެއްގައި ބޭނުންކުރަން އަނެއްކާވެސް އިތުރަށް އެތައް މަސައްކަތެއް ކުރަން ޖެހެ އެވެ. އެކަމަކު ތިން ހަތަރު މެގަބައިޓް މޫވީ ފައިލެއް ވެބަށް ނުވަތަ މޯބައިލް އެޕަކަށް ލައިގެން ގުޑާނުލައިނެތީ ދެން އަނެއްކާވެސް ޖެހެނީ އެތައް ބައިވަރު ކޯޑެއް ކޮށްގެން އެނިމޭޓް ކުރާށެވެ. އެހާވަރުން މަސައްކަތް ނިންމާއިރު ވެސް ފުރަތަމަ ހެދި އެނިމޭޝަނާއި ކޯޑްކޮށްގެން ހެދި އެނިމޭޝަން އެއްގޮތް ނުވެ އަލުންބަލުން މަސައްކަތްކުރަން ޖެހުމަކީ އާންމު ކަމެކެވެ. މި ސަބަބުތަކާ ހުރެ އެޕްލިކޭޝަންތަކުގައި އެނިމޭޝަން ބޭނުންކުރަން ޑިޒައިނަރުން ކިތަންމެ ބޭނުންވިޔަސް މިއީ ޑިވަލޮޕަރުން އެހާ ގަޔާވާ ކަމެއްނޫނެވެ. އެކަމަށް ހޭދަވާ ވަގުތާއި މަސައްކަތް ވެސް ބުރައީ އެވެ. މިކަމަށް ހައްލެއް ހޯދަން ފޭސްބުކް ކަހަލަ ދުނިޔޭގެ ބޮޑެތި ކުންފުނިތަކުން މަސައްކަތް ކުރި އެވެ.
މިކަން މިހެން އޮންނަތާ އެތައް އަހަރެއް ފަހުން ދިވެހި ޑިވެލޮޕަރުންތަކެއް މި ވަނީ މި ބުރަ ލުއިކޮށްދީ ދުނިޔޭގެ ސަމާލުކަން ހޯދައިފަ އެވެ.
ރާއްޖޭގެ ކުޅަދާނަ ޑިވެލޮޕަރުން ކަމަށްވާ ނަސްރުﷲ އަދުނާން (ނައްޓު)، ޝާފިއު ހުސައިން، މާއިލް ރަޝީދު، އަދި ނާއިލް އަބްދުލްރަހްމާން (ކުޑަނާއި) ގުޅިގެން އުފެއްދި "ލޮޓީފައިލްސް" އާއި އޭގެ އެޕްތަކާއެކު މިހާރު ވަނީ މަންޒަރު ބަދަލުވާން ފަށައިފަ އެވެ. ލޮޓީފައިލްސް އަކީ ވަކި އުފެއްދުމެއް ނަމަވެސް، މިއީ ރާއްޖޭގައި ރެޖިސްޓާކޮށް، ހިންގަމުންދާ "އިންޓެލިއާ ޕާރޓްނާޝިޕް" އަށް ނިސްބަތްވާ ޒުވާނުންނެވެ. އަދި މިއަހަރު ފޯބްސް 30 އަހަރުން ދަށުގެ ލިސްޓުގައި ހިމެނުނު ބޫޓާންގެ ސޯނަމް ޕެލްޑެން ވަނީ ލޮޓީފައިލްސްގެ ޓީމާ ގުޅިފަ އެވެ. ސޯނަމް އަކީ ދި އިކޮނޮމިސް މެގަޒިން އަދި ސާވިސްހީރޯ ފަދަ ކުންފުނިތަކުގައި މަސައްކަތް ކޮށްފައިވާ ހުނަރުވެރި ޒުވާނެކެވެ.
ލޮޓީ އާއި ލޮޓީފައިލްސް
އާފްޓައިފެކްޓްގައި ހަދާ އެނިމޭޝަން މޫވީ ނޫން ޑޭޓާ (ޑިވެލޮޕަރުންނަށް ފަސޭހަ) ފޯމެޓަކަށް މިހާރު ކޮންވާޓު ކުރެވެ އެވެ. މިކަން ކުރެވެނީ އެކަމަށް ތައްޔާރުކޮށްފައިވާ ހާއްސަ އެކްސްޓެންޝަނެއް ބޭނުންކޮށްގެނެވެ. އަދި މި އެނިމޭޝަންތައް ވެބް އަދި މޯބައިލް ޕްލެޓްފޯމްތަކުގައި ބޭނުންކުރެވެ އެވެ. މި ފައިލްތައް މޯބައިލް ޕްލެޓްފޯމްތަކުގައި ބޭނުންކުރެވޭ ގޮތަށް ހެދީ ދުނިޔޭގެ މަޝްހޫރު ކުންފުނި އެއާބީއެންބީގެ ޑިޒައިނަރުންނާއި ޑިވެލޮޕަރުން ގުޅިގެންނެވެ. އަދި އެއަށް "ލޮޓީ"ގެ ނަން ދީ އާންމުކޮށް ބޭނުންކުރުމަށް ހުޅުވާލި އެވެ. މިއާ އެކު ޑިވަލޮޕަރުންގެ މަސައްކަތް ކިތަންމެ ފަސޭހަވި ނަމަވެސް، ޑިޒައިނަރުން މިފައިލްތައް ބަލަން ޑިވަލޮޕަރުންގެ އެހީ ހޯދަންޖެހެ އެވެ. މިކަން ހައްލުކޮށްދިނީ ދިވެހި ޑިވެލޮޕަރުންގެ "ލޮޓީފައިލްސް" އެވެ.
ލޮޓީފައިލްސް ވެބްސައިޓަށް މި އެނިމޭޝަން ފައިލް "ޑްރެގް އެންޑް ޑްރޮޕް" ކޮށްލުމުން ނިމުނީ އެވެ. އެނިމޭޝަނެއް މަސައްކަތް ކުރޭތޯ ބަލައިލަން ޑިވެލޮޕަރުންގެ އެހީ ހޯދުން ނިމުމަކަށް އައީ އެވެ. ދުނިޔޭގެ މަޝްހޫރު ޑިޒައިނަރުން އެމީހުން ހަދާ އެނިމޭޝަންތައް ލޮޓީފައިލްސްގައި ހިއްސާކުރަން ފެށި އެވެ. ކުޑަ ދުވަސްކޮޅެއްގެ ތެރޭގައި ވެފައި ވަނީ އެނިމޭޝަން ހަދާ މީހުންގެ މައިދާނަކަށެވެ. މިއަހަރު ކުރީކޮޅު ހެދި ލޮޓީފައިލްސް ބޭނުންކޮށްގެން 50،000 ވުރެ ގިނަ ފައިލް ޑިޒައިނަރުން ޓެސްޓުކޮށްފައިވެ އެވެ. އަދި އާންމުކޮށް ފެންނަން ހުރި އެނިމޭޝަންތައް ލައްކައަކަށްވުރެ ގިނައިން ޑައުންލޯޑް ކޮށްފައިވެ އެވެ. ޑިވެލޮޕަރުން މި އެނިމޭޝަންތައް އެމީހުން ހަދާ އެޕްލިކޭޝައިން ތަކުގައި ބޭނުންކުރެ އެވެ.
މި ފަސޭހަޔާ އެކު އެއާބީއެންބީ އާއި ބޮޑެތި އެހެން ބައެއް ކުންފުނިތަކުން ލޮޓީފައިލްސްގެ ވާހަކަ ދައްކަން ފެށި އެވެ. އޫބާ، ގޫގަލް، މައިކޮރޮސޮފްޓް ފަދަ ކުންފުނިތަކުގެ ޑިޒައިނަރުން ލޮޓީފައިލްސް ބޭނުންކުރަންފެށި އެވެ. އެނިމޭޝަންތައް ވެބް އަދި މޯބައިލް ޕްލެޓްފޯމުތަކަށް ގެނައުމަށް ހުރި ގޮންޖެހުންތައް ހައްލުކުރުމަށް އެއާބީއެންބީގެ ލޮޓީ ޓީމާއި ލޮޓީފައިލްސްގެ ޓީމު ބައްދަލުކޮށް އެކުގައި ވަނީ މަސައްކަތް ފަށައިފަ އެވެ.
ވެބްސައިޓުގެ ތިރީގައި "މޭޑް ވިތު ލަވް ފްރޮމް މޯލްޑިވްސް" ޖަހާފައިވާ ލޮޓީފައިލްސް އަށް ކުޑަ ދުވަސްކޮޅެއްގެ ތެރޭގައި ލިބުނު ތަރުހީބާ އެކު އިންވެސްޓަރުންގެ ޝައުގުވެރިކަން ހުއްޓުނެވެ. އެމީހުންގެ ލަފާގެ މަތިން މި ޕްލެޓްފޯމް މިހާރުވަނީ ބައްޓަން ކުރަން ފަށައިފަ އެވެ.
ދިވެހި ޑިވެލޮޕަރުންނަށް ފުރުސަތު އެބަ އޮތެވެ. މިފަދަ އުފެއްދުންތަކުން ސާބިތުކޮށްދެނީ، ދިވެހި ޒުވާން ޑިވެލޮޕަރުންނަކީ ވެސް ބައިނަލްއަގުވާމީ މައިދާނުގައި ފައިތިލަ ސާބިތުކޮށްލެވޭ ފެންވަރުހުރި ބައެއްކަމެވެ. ހުރަސްތަކެއް ހުރި ނަމަވެސް ޒުވާނުން އަންނަނީ ފަހަރަކު ކަމެއް ގިރާކުރަމުން، އުޖާލާ ކުރިމަގެއް ބިނާކުރަމުންނެވެ.
މި އުފެއްދުންތެރި އީޖާދުގެ ފަހަތުގައި އޮތް ޓީމުގެ މުހިންމު މެމްބަރެއް ކަމަށްވާ ނައްޓު ބުނި ގޮތުގައި ދިވެހި މިފަދަ އުފެއްދުންތަކަށް ދުނިޔޭގެ މާކެޓުން ޖާގަ ހޯދުމުގެ ފުރުސަތު އެބައޮތެވެ. އެހެން ޑިވެލޮޕަރުން ވެސް މިސްރާބު ބަހައްޓަންވީ ދުނިޔޭގެ ފެންވަރުގައި ޕްރޮޑަކްޓްތައް ތައްޔާރުކޮށް މާކެޓް ކުރުމަށެވެ.
