ތެދު ނޫން ޚަބަރުތަކާއި އޮޅުންބޮޅުން އަރާ ފަދަ މައުލޫމާތުތައް ޓްވިޓާގައި ޝެއާކުރުން ގިނަކަމުން އެކަމާ ދެކޮޅަށް އަންނަނީ ގިނަ ފިޔަވަޅުތަކެއް އަޅަަމުންނެވެ. އެގޮތުން އަނެއްކާ ވެސް މި ވަނީ އާ ފީޗާއެއް ޓެސްޓްކުރަން ފަށައިފަ އެވެ.
އެންޑްރޮއިޑް ޑިވައިސްތަކުގައި ޓެސްޓްކުރަމުން އަންނަ މި ފީޗާ އަކީ ޓްވިޓާގައި ލިޔުމެއް ޝެއާކުރާ ނަމަ އެ އެއްޗަކީ ފުރަތަމަ އެ މީހަކު އަމިއްލަ އަށް ކިޔާފައިވާ އެއްޗަކަށްވާން ޖެހުމެވެ. އެގޮތުން ފެންނަހާ ލިންކެއް ބަލައިނުލައި ޝެއާއެއް ނުކުރެވޭނެ އެވެ. އޭގެ ބަދަލުގައި ފުރަތަމަ އެ މީހަކު ޖެހޭނީ އެ ލިންކެއްގައި އިނީ ކޯއްޗެއްތޯ އަމިއްލަ އަށް ދެނަގެންނާށެވެ. ނުވަތަ އެ ލިންކެއްގައި އިން އެއްޗެއް ކިޔާށެވެ.
ޓްވިޓާ އިން ބުނީ މި ކަމަކީ ސައްހަ ނޫން މައުލޫމާތު ޓްވިޓާ މެދުވެރިކޮށް ފެތުރުން ހުއްޓުވަން އަނެއްކާ ވެސް ގެންނަ ބަދަލެއް ގެންނަ ކަމަށެވެ. އަދި ޓްވިޓާ އަކި އަބަދު ވެސް އެ ޕްލެޓްފޯމުން ކަނޑައަޅާ އުސޫލުތައް ދަމަހައްޓާނެ އެއްޗެއް ކަމަށް ބުންޏެވެ.
ދާދި ފަހުން ޓްވިޓާ އިން ވަނީ ކޮވިޑް-19 އާ ބެހޭ ގޮތުން ވެސް ސައްހަ ނޫން މައުލޫމާތުތައް ހިމެނޭ އެއްޗެހި ޓްވިޓާ އިން ބޭރުކުރަން ފަށައިފަ އެވެ.
