އެސްޓޯނިއާ: އިޖާދީ ވިސްނުމުގެ ތެރެއިން ޑިޖިޓަލް އިގުތިސާދެއް ބިނާކުރުމުގައި މުޅި ދުނިޔެއަށް ނަމޫނާއެއް!

ރައްޔިތުންގެ ފެންނަ ނުފެންނަ ވޯޓަކުން، ސޯވިއެޓްގެ އިސްތިއުމާރުން އެސްޓޯނިއާ މިނިވަންވީ 1995 ވަނަ އަހަރު އެވެ. އެ މިނިވަންކަން ލިބުނުއިރު، ޔޫރަޕުގެ އެހެން ގައުމުތަކާ އަޅާބަލާއިރު، އާބާދީގެ ގޮތުން ކުޑަ، އެސްޓޯނިއާގެ ގުދުރަތީ ވަސީލަތްތައް ހުސްކޮށްލައި، އިގުތިސާދު އޮތީ ގާތްގަނޑަކަށް އިނދަ ޖެހިފަ އެވެ.

މިގޮތުން، 1993 ގައި އެސްޓޯނިއާގެ އިންފްލޭޝަން ހުރީ 90 ޕަސެންޓުގަ އެވެ. އިގުތިސާދު އަލުން ކޮޅަށް ޖެހުމުގެ ބުރަ މަސައްކަތް ފަށައި، އެސްޓޯނިއާ އިން ކެޕިޓަލިޒަމްގެ ސިޔާސަތު ހިޔާރުކޮށް، ވިޔަފާރި އާއި އިންޓަރެސްޓު ރޭޓު އޯޕަން މާކެޓަށް ދޫކޮށްލައި، ޔޫރަޕަށް ގައުމު ހުޅުވައިލަން ނިންމި ނިންމުމަކީ އޭރު ދުނިޔޭގެ ގައުމުތަކުން އިންގިލާބީ ބަދަލެއްގެ ގޮތުގައި ސިފަކުރި އެވެ.

މި އިންގިލާބީ އަދި އަވަސް އިސްލާހީ ފިޔަވަޅުތަކުގެ ފަހަތުގައި ހުންނެވީ އޭރު ބޮޑުވަޒީރުކަމުގައި ހުންނެވި މޯ ލާ އެވެ. އެ ފިޔަވަޅުތައް ވެގެންދިޔައީ، މިހާރު މުޅި ދުނިޔެ ނަމޫނާ އަކަށް ބަލައި ޑިޖިޓަލް އިގުތިސާދެއް އެސްޓޯނިއާގައި ބިނާކުރުމުގެ ބިންގަލަށެވެ.

ލާ އިސްވެ ގެންނެވި އިސްލާހުތަކުން، އެންމެ ދެ އަހަރު ދުވަހުގެ ތެރޭގައި 90 ޕަސެންޓުގައި ހުރި އިންފްލޭޝަން 29 ޕަސެންޓަށް ވެއްޓުނެވެ. އިގުތިސާދު މާކެޓަށް ހުޅުވައިލުމާ އެކު، 10،000 އަށް ވުރެ ގިނަ އާ ވިިޔަފާރިތައް 1995 ވަނަ އަހަރުގެ ތެރޭގައި އުފަންވި އެވެ.

އާ ފެށުމަކުން ފަށައިގަންނަން ލިބުނު ފުރުސަތުގެ ބޭނުން ހިފައި، އާންމު ވިޔަފާރި ކުރުމުގެ ބަދަލުގައި، އިޖާދީ ވިސްނުމާއި ހަރުދަނާ، ދުރުވިސްނޭ ތަސައްވުރެއްގެ ތެރެއިން ޒަމާނީ ޓެކްނޮލޮޖީ އާ ދިމާއަށް އެސްޓޯނިއާގެ މިސްރާބު އަނބުރައިލި އެވެ.

އެކަމުގެ ފެށުމެއްގެ ގޮތުން، އިންފޮމޭޝަން ޕޮލިސީއެއް ޑްރާފްޓުކޮށް، ދައުލަތުގެ ހިންގުން ހަރުދަނާކުރުމަށްޓަކައި، ގައުމީ އުފެއްދުންތެރިކަމުގެ ވަކި ޕަސެންޓެއް އިންފޮމޭޝަން ޓެކްނޮލޮޖީއަށް ހާއްސަކުރަން ނިންމައި، 1998 ވަނަ އަހަރު އެސްޓޯނިއާގެ ގާނޫނު ހަދާ މަޖިލީހުން ފާސްކުރި އެވެ.

އާންމު ހިދުމަތްތައް ހޯދުން ފަސޭހަވަމުން ދިޔަ ވަރަކަށް، އެސްޓޯނިއާ އިން ދިޔައީ އެހެން ހިދުމަތްތައް ވެސް މަޑުމަޑުން ޑިޖިޓަލައިޒް ކުރަމުންނެވެ. މިގޮތުން އީ-ބޭންކިން ތައާރަފްކުރުމުގެ އިތުރުން ކޮންމެ ރައްޔިތަކަށް ޑިޖިޓަލް އައިޑީއެއް ތައާރަފްކުރި ފުރަތަމަ ގައުމުތަކުގެ ތެރޭގައި އެސްޓޯނިއާ ހިމެނެ އެވެ. ހިދުމަތްތައް ޑިޖިޓަލައިޒް ކުރުމުގައި، ސަލާމަތާއި ރައްކާތެރިކަން ކަށަވަރު ކުރުމަށްޓަކައި، އެސްޓޯނިއާ އިން ދިޔައީ އެކަމުގެ އުމްރާނީ ވަސީލަތްތައް ވެސް ބިނާކުރަމުންނެވެ.

ވިހާތަނުން އެސްޓޯނިއާގެ ކޮންމެ ކުއްޖަކަށް ޑިޖިޓަލް އައިޑީ ކާޑެއް ދޫކުރާއިރު، އާންމު ހިދުމަތްތައް ހޯދައި، އިލެކްޓްރޯނިކް މުއާމަލާތްތައް ރައްކާތެރިކަމާ އެކު ކުރުމުގައި އެސްޓޯނިއާ އަކީ މިހާރު ދުނިޔޭގައި ދެވަނަ އެއް ނެތް ގައުމެކެވެ.

ޑިޖިޓަލް އިގުތިސާދަކާ ދިމާއަށް މިސްރާބު ޖެހުމުގެ ކުރިން، އެސްޓޯނިއާގެ ޖީޑީޕީ ހުރީ 3،134 އެމެރިކާ ޑޮލަރުގަ އެވެ. ނަމަވެސް، 2022 ވަނަ އަހަރު އެ އަދަދު ވަނީ ބޮލަކަށް 28،247 އެމެރިކާ ޑޮލަރަށް މަތިވެފަ އެވެ.

މިއީ އެންމެ 30 އަހަރެއްހާ ދުވަހުގެ ތެރޭގައި 800 ޕަސެންޓުގެ މަތިވުމެކެވެ. ދުނިޔޭގެ އެހެން ގައުމުތައް ފަހަތު ފަޔަށް ބުރަވެފައި ތިއްބައި، އެސްޓޯނިއާ އިން އޭރު ވަނީ ޒަމާނީ ޓެކްނޮލޮޖީގެ އެހީގައި ޑިޖިޓަލް އިގުތިސާދެއް ބިނާކުރުމުގެ ހިތްވަރު ނެރެފަ އެވެ.

ސްކައިޕް އާއި ބޯލްޓް ފަދަ އެއް ބިލިއަން ޑޮލަރުގެ 10 ކުންފުނި އެސްޓޯނިއާ އިން ވަނީ އުފަންކުރުވައިފަ އެވެ.

އެސްޓޯނިއާ އަކީ އަމިއްލަ ވިޔަފާރިތަކަށް އެންމެ ފަހި މާހައުލު އޮތް ގައުމުގެ ގޮތުގައި މުޅި ދުނިޔެ މިއަދު ގަބޫލުކުރެ އެވެ.

އެސްޓޯނިއާގެ ކާމިޔާބީގެ ފަހަތުގައި އޮތީ، އީޖާދީ ދުރުވިސްނޭ މީހުންނަށް ފުރުސަތު ދީ، އެއް ވިސްނުމެއްގައި އެއް މިސްރާބަކަށް ރައްޔިތުން މަސައްކަތް ކުރުމެވެ.

އަދުގެ ގޮންޖެހުންތަކަށް ފުރަގަސް ނުދީ، މުސްތަގުބަލަށް ނަޒަރު ބަހައްޓައިގެން، ގައުމެއްގެ ގޮތުގައި ހުރިހާ ރައްޔިތުން ގުޅިގެން ކުރި މަސައްކަތުން، އެސްޓޯނިއާ އަކީ ޑިޖިޓަލް އިގުތިސާދެއް ބިނާކުރުމުގައި ހަމައެކަނި ޔޫރަޕަކަށް ނޫނެވެ، މުޅި ދުނިޔެއަށް ވެސް ނަމޫނާ އެކެވެ.