ޖަރުމަނުގެ ޗާންސެލަރު ފްރެޑްރިކް މާޒް: ޣައްޒާގައި ބޭނުންކުރެވޭނެ އަސްކަރީ ސާމާނު އިޒްރޭލަށް ވިއްކުން މެދުކަނޑާލަން ވަނީ ނިންމަވާފައި. -- ފޮޓޯ: އޭއެފްޕީ
09 އޯގަސްޓް 2025 - 07:01
ޣައްޒާގައި ބޭނުންކުރެވޭނެ އަސްކަރީ އާލާތްތައް އިޒްރޭލަށް އެކްސްޕޯޓްކުރުން ހުއްޓާލާނެ ކަމަށް ޗާންސެލަރު ފްރެޑްރިކް މާޒް އިއުލާނުކުރައްވައިފި އެވެ.
މި ނިންމުމާ އެކު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ މިއީ "ހަމާސް އަށް ދިން އިނާމެއް" ކަމަށް ސިފަކޮށް ފާޑު ކިޔައިފަ އެވެ.
ޣައްޒާ ސިޓީ އިޒްރޭލު އަސްކަރިއްޔާގެ ދަށަށް ގެންދިއުމުގެ ޕްލޭން ފާސްކުރުމާ އެކު ޖަރުމަނުން މި ފިޔަވަޅު އެޅި އިރު ޖަރުމަނަކީ އިޒްރޭލަށް އެންމެ ބޮޑަށް ތާއީދުކޮށް ދިފާއުކޮށްދޭ ގައުމުތަކުގެ ތެރޭގައި އަބަދުވެސް އޮންނަ ގައުމެކެވެ. އެހެންވެ މި ނިންމުން ބެލެވިފައިވަނީ ޖަރުމަނުގެ ސިޔާސަތަށް އައި ބޮޑު ބަދަލަކަށެވެ.
ޗާންސެލަރު މާޒް ވަނީ ޣައްޒާގެ ރައްޔިތުންގެ ހާލާ މެދު ވަރަށް ބޮޑަށް ހިތާމަކުރައްވާ ކަމަށް ވެސް ވިދާޅުވެފަ އެވެ.
އޭނާ ވިދާޅުވީ ޣައްޒާ ހިފަން އުޅެނީ ހަމާސްގެ ހަތިޔާރު ބެހެއްޓުން މަޖުބޫރުކޮށް އެ ޖަމާއަތް ނައްތާލައި ރަހީނުން މިނިވަންކުރަން ކަމަށް ބުނާއިރު މި މަގްސަދުތައް ހާސިލްވާނެ ކަމާ މެދު މިހާރު ކުރިއަށްވުރެ ވެސް ބޮޑަށް ސުވާލު އުފެދޭ ކަމަށެވެ.
"ހާލަތު މިހެން އޮއްވައި، ޣައްޒާގައި ބޭނުންކުރެވިދާނެ އަސްކަރީ އެއްވެސް އާލާތެއް އިޒްރޭލަށް އެކްސްޕޯޓްކުރުމަށް، ވަކި ގޮތަކަށް އަލުން ކަނޑައަޅަންދެން، ޖަރުމަނު ސަރުކާރުން ހުއްދައެއް ނުދޭނެ،" ޗާންސެލަރުގެ އޮފީހުން ނެރުނު ބަޔާނުގައިވެ އެވެ.
މިކަމާ ގުޅިގެން ނަތަންޔާހޫގެ އޮފީހުން ނެރުނު ބަޔާނުގައި ބުނީ މާޒް އަށް ނަތަންޔާހޫ ގުޅައި މި ނިންމުމާ މެދު ހިތާމަކުރާ ކަމަށް ބުނެފައިވާ ކަމަށެވެ. އެ ބަޔާނުގައި ސިފަކޮށްފައިވާ ގޮތުގައި ޖަރުމަނުގެ ނިންމުމަކީ "ހަމާސްއާ ދެކޮޅަށް އިޒްރޭލުން ކުރަންޖެހިފައިވާ ހަނގުރާމަ" އަށް އެހީވުމުގެ ބަދަލުގައި "ހޮލޮކާސްޓަށް ފަހު ޔަހޫދީންނާ ދެކޮޅަށް އެންމެ ބޮޑު ޖަރީމާ" ހިންގި ހަމާސް ދިން ހަދިޔާއެކެވެ.
ބަޔާނުގައި އިޝާރާތްކޮށްފައިވަނީ ހަމާސް އިން އޮކްޓޫބަރު 7، 2023 ގައި އިޒްރޭލަށް ދިން ހަމަލާއަށެވެ.
ޣައްޒާ ހިފުމަށް އިޒްރޭލުން ނިންމައި އިއްޔެ އެކަން އިއުލާނުކުރުމާ އެކު ގައުމުތަކުން ދަނީ އެ ނިންމުން ކުށްވެރިކުރަމުންނެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ލަމްޕު
09 August 2025
ފަލަސްތީނު ކުށެއް ނެތް ނިކަމެތިންނާ އެތަށް ކުޑަކުދީން ތިޔަ ހަތިޔާރުން މަރާތާ އެތަށް ދުވަހެއް ފަހުން ތިޔަ ނިންމުން ނިންމަން ފާސް ކުރިކަން ވެސް ރަނގަޅު. ސުވާލަކީ އަދި ކިތައް ނިކަމެތީން މަރާ ނިމުނީމަ ބާއޭ ތިޔަށް ޢަމަލު ކުރަން ފެށޭ ވަރު ވާނީ؟؟
އަފްރާސިޔާބު
09 August 2025
ގާޑަން އިން މޭވާ ހުސްވީބާ އިސްރާއީލަށް އޭގެ މޭވާތައް ފަރިއްކުޅުއްވަން ނުލިބެނީ. ގަސްތައް އަދައި ހުލިވީ ތޯއްޗެއް. ޖަރުމަނަކީ އަބަދުވެސް ކޮންމެވެސް ބައެއްގެ ލޭއިން ތައްތެޅިފައިވާ ވެރިކަމެއް ހިންގާ ބައެއް.
ލާމަސީލު
09 August 2025
މުޅި ޣައްޒާ ފުނޑާލާ ބިމާހަމަކޮށް ހުރިހާ ކުޑަކުދިންނާ އަންހެނުން ޤަތުލުކޮށް މީހުންކޮޅު މަރާ އެއްކޮށް ކަހަލަގޮތަކަށް ހުސްކޮށްލީމާ މިމީހުން މިފިޔަވަޅުނއެއަޅަނީ.
މައްކޫ
09 August 2025
މިވެސް ސްކޭމެއް، ރަނގަޅު ނިޔަތެއްގައެއް ނޫން. ޔޫރަޕް ގެ ޤައުމުތަކުން ފަލަސްޠީން ޤަބޫލުކުރިކަމަށް އެ ބުނަނީ ބޮޑު އޮޅުވާލުމެއް. ފަހަރަކު ޤައުމެއް އެބަކިޔައެއް ނޫން، ތިމަންނަމެން ފަލަސްޠީން ޤަބޫލުރާނަމޭ. އެއީ އޮކިއުޕައިޑް، ޕެރެލައިޒްޑް ސްޓޭޓެއްގެ ވާހަކަ.
އަފްރާސިޔާބު
09 August 2025
ގަތަރުން ކާބޯތަކެތި ފޯރުކޮށްދޭ. އެމެރިކާގެ އެހީވެސް ލިބޭ. ދެން ކާބޯތަކެތި ހޯދަން އެއްވާ މީހުންގެ ގަޔަށް ބަޑިޖަހައި ބޮންއެޅިމާތީ އަވަހަށް ކުޑަ ޚަރަދަކުން މަރައި ހުސްކޮށްލެވޭނީ. ގާޒާގެ އިސްރާއީލުގެ ޕްލޭނަށް އަރަބީން ތާއީދުކުރޭ. މައްސަލައަކީ ފަލަސްޠީނު ސަލަމާތް ކުރަން މީހަކު ފާޅުވާނޭ ބުނާތީ. އެކަމަށް ވަގުތު އަދި އެބައޮތް. އެހެންވީމާ އަރަބީން ވަކިކުރާނެ ކަމެއްނޯންނާނެ. އެމީހަކު އަންނަންދެން އުފާކޮށްލެވޭނެ ގޮތަށް ކަންކަން ރޭވީމާ އެ ނިމުނީ.