ސިންގަޕޫރުގެ އެންމެ ބޮޑު ރިޒަވަޔާގައި ކިނބުލެއް އުޅޭ ކަމަށް ދައްކައިދޭ އޭއައި ފޮޓޯއެއް އާންމުކޮށް، މީހުންގެ ތެރޭގައި ބިރުވެރިކަން އުފެއްދި މައްސަލައިގައި މިއަންމާގެ ފިރިހެނަކަށް ދައުވާކޮށްފި އެވެ.
އުމުރުން 30 އަހަރުގެ މީހެއް ކަމަށްވާ ޔޭ ލިންގެ މައްޗަށް ދައުވާކުރުމަށް ސިންގަޕޫރު ފުލުހުން ދައުވާކޮށްފައިވަނީ ދޮގު މައުލޫމާތެއް ފެތުރުމާއި އިންސާފަށް ހުރަސްއެޅުމުގެ ތުހުމަތުގަ އެވެ.
ފުލުހުން ބުނި ގޮތުގައި، ޔޭ ލިން ވަނީ ލޮނުފެނުގައި އުޅޭ ކިނބުލެއްގެ ފޮޓޯއެއް އޭއައި ބޭނުންކޮށްގެން މިދިޔަ މަހު ހަދައި، އޭނާގެ އެކުވެރިއަކަށް ފޮނުވައިފަ އެވެ. އެއަށް ފަހު، ސިންގަޕޫރުގެ ހުޅަނގުގައި އޮންނަ، ދުވުމަށާއި ކަޔަކް ކުރުމަށް އާންމުން ވަރަށް ގިނައިން ދާ ޕަންޑަން ރިޒަވަޔާ ގައި ނުރައްކާތެރި މި ޖަނަވާރު އުޅޭ ކަމަށް އިދާރާތަކަށް ރިޕޯޓްކޮށްފައިވެ އެވެ.
މި މައުލޫމާތާ ގުޅިގެން ސިންގަޕޫރުގެ އިދާރާތަކުން ވަނީ އެ ރިޒަވަޔާގައި ހިންގާ ހުރިހާ ހަރަކާތްތަކެއް ހުއްޓުވައި، ކިނބޫ ހޯދުމުގެ ހާއްސަ އޮޕަރޭޝަނެއް ހިންގައިފަ އެވެ. ނަމަވެސް، ފަހުން ކުރި ތަހުގީގުން އެ ފޮޓޯއަކީ އޭއައި އިން ހަދާފައިވާ ފޭކް ފޮޓޯއެއްކަން އެނގުމުން މައްސަލަ ފުލުހުންނަށް ހުށަހެޅި އެވެ.
ފުލުހުންގެ ބަޔާނުގައިވާ ގޮތުން، މައްސަލަ ފަޅާއަރަން އުޅުމުން ޔޭ ލިން ވަނީ އެކަން ކުރިކަން ފޮރުވުމުގެ ގޮތުން އެ ފޮޓޯ އާއި، ފޮޓޯ އުފެއްދުމަށް ބޭނުންކުރި އެޕްލިކޭޝަން ފޯނުން ފޮހެލައިފަ އެވެ.
އަންގާރަ ދުވަހު ކޯޓަށް ހާޒިރުކުރުމުން ތަރުޖަމާނެއް މެދުވެރިކޮށް ޔޭ ލިން ބުނީ ކުށަށް އިއުތިރާފުވާން ބޭނުންވާ ކަމަށެވެ. ސިންގަޕޫރުގެ ގާނޫނުތައް ބުނާގޮތުން ދޮގު މައުލޫމާތާއި ފޮޓޯ ފެތުރުމުގެ ކުށުގައި ތިން އަހަރުގެ ޖަލު ހުކުމެއް ނުވަތަ 7,820 ޑޮލަރު (10,000 ސިންގަޕޫރު ޑޮލަރު) އިން ޖޫރިމަނާއެއް ކުރެވިދާނެ އެވެ. އަދި އިންސާފަށް ހުރަސްއެޅުމުގެ ކުށުގައި އިތުރު ހަތް އަހަރުގެ ޖަލު ހުކުމެއް ނުވަތަ ޖޫރިމަނާއެއް ކުރިމަތިވުން އެކަށީގެންވެ އެވެ.
މި މައްސަލައިގެ އިތުރު އަޑުއެހުމެއް އަންނަ ނޮވެމްބަރު މަހު ބޭއްވުމަށް ވަނީ ތާވަލުކޮށްފަ އެވެ.
ސިންގަޕޫރުގެ ފެންގަނޑުތަކުން ކިނބޫ ފެނުމަކީ އާންމު ކަމެއް ނޫން ނަމަވެސް، 2025 ވަނަ އަހަރުގެ ޖެނުއަރީން ފެށިގެން މިހާތަނަށް 30 އަށްވުރެ ގިނަ ފަހަރު ކިނބޫ ފެނިގެން ރިޕޯޓްކޮށްފައިވާ ކަމަށް އެ ގައުމުގެ މީޑިއާތަކުން ބުނެ އެވެ.