މޮގަދިޝޫ، ސޯމާލިއާ (ސެޕްޓެމްބަރު 29) - ކަނޑުފޭރޭ މީހުންގެ އަތްދަށުން ސޯމާލިއާގެ މެރިޓައިމް ފުލުހުން އަނެއްކާވެސް ތެޔޮ ޓޭންކަރެއް ސަލާމަތްކޮށްފި ކަމަށް އަންގާރަ ދުވަހު ބުނެފި އެވެ. މިއީ ހައްޔަރުކުރި ކަނޑުފޭރޭ ބަޔަކު، ސުވާލު އުފެދޭ ފަދަ ގޮތަކަށް ފިލައިގެން ދިޔަ ހާދިސާއަކަށް ފަހު ހިންގި އޮޕަރޭޝަނެކެވެ.
އޭޕްރީލް މަހުން ފެށިގެން ސޯމާލިއާ ސަރަހައްދުގައި ކަނޑުފޭރުމުގެ ހަރަކާތްތައް އަލުން އިތުރުވެފައި ވާއިރު، މަދުވެގެން މިފަދަ 15 ހާދިސާއެއް ހިނގާފައިވެ އެވެ. މިއީ 2013 ވަނަ އަހަރަށްފަހު މިއަދަދަށް ކަނޑުފޭރުމުގެ ހަމަލާތައް އިތުރުވި ފުރަތަމަ ފަހަރެވެ.
ސޯމާލިއާގެ އުތުރުގައި އަމިއްލަ ވެރިކަމެއް ކުރާ ޕަންޓްލޭންޑް ސަރަހައްދުގެ މެރިޓައިމް ޕޮލިސް ފޯސްއިން ބުނި ގޮތުގައި ސަލާމަތްކޮށްފައިވަނީ އޭޕްރީލް މަހު ހައިޖެކްކުރި ޕަލާއުގެ "އެމްޓީ އޮނާ 25" ތެޔޮ ޓޭންކަރެވެ. އޭގެ 17 ފަޅުވެރިން ސަލާމަތްކޮށްފައި ވާއިރު އެ އުޅަނދުގައި 18،500 ފީފާ ތެޔޮ ހުރި ކަމަށް ވެސް ފުލުހުން ބުންޏެވެ.
"ޕަންޓްލޭންޑް މެރިޓައިމް ޕޮލިސް ފޯސްގެ ކަނޑުގެ އަދި އެއްގަމު ފޯސްތަކުން ކުރިއަށް ގެންދިޔަ އޮޕަރޭޝަނެއް ބަންޑާ ބޭލާ ޑިސްޓްރިކްޓްގެ ދާރިން-ބާ ސަރަހައްދުގައި ވަނީ ހިންގާފައި،" ފުލުހުން ނެރުނު ބަޔާނެއްގައި ބުނެފައިވެ އެވެ.
މި އަހަރު އެ ސަރަހައްދުގައި ވަރަށް ހަރަކާތްތެރިކޮށް އުޅޭ ކަނޑުފޭރޭ އާ ނެޓްވޯކަކާ ދެކޮޅަށް ފިޔަވަޅު އަޅާފައިނުވާތީ ޕަންޓްލޭންޑް ފުލުހުންނަށް ވަނީ ފާޑުކިއުންތައް އަމާޒުވެފަ އެވެ. އެހެންވެ ފުލުހުން އައީ ސޯމާލިއާގެ ކަނޑުގެ ސަރަހައްދުން ހައިޖެކްކޮށްފައިވާ ތިން އުޅަނދެއް ސަލާމަތް ކުރުމުގެ މަސައްކަތް ކުރަމުންނެވެ. އަދި ހުކުރު ދުވަހު ވަނީ އޭގެ ތެރެއިން ތެޔޮ ޓޭންކަރެއް ކަމަށްވާ "ސިބޫ 1" ސަލާމަތްކޮށްފަ އެވެ.
ނަމަވެސް އެ އޮޕަރޭޝަނުގައި ހައްޔަރުކުރި 41 މީހުންގެ ތެރެއިން 28 މީހަކު ވަނީ ޖަލަށް ގެންދިޔަ މަގުމަތީގައި ފިލައިފަ އެވެ. އަދި ޕަންޓްލޭންޑް ސެކިއުރިޓީގެ ބައެއް އޮފިޝަލުން ވަނީ މިކަމުގައި ފުލުހުންގެ ބައިވެރިވުން އޮތް ކަމަށް ތުހުމަތުކޮށްފަ އެވެ.