ސްރީ ލަންކާގައި ރާވައިގެން ހިންގާ ޖަރީމާތަކާއި ގޭންގު މާރާމާރީތައް އިތުރަށް ވަރުގަދަވެ، މި އަހަރުގެ މިހާތަނަށް ދިން ބަޑީގެ 38 ހަމަލާ ދީފައިވާ ކަމަށާއި އެ ހަމަލާތަކުގައި 25 މީހަކު މަރުވެ 15 މީހަކު ޒަހަމްވެފައިވާ ކަމަށް ފުލުހުންގެ ހިސާބުތަކުން ދައްކައިފި އެވެ.
ލަންކާގެ ފުލުހުންގެ ތަފާސްހިސާބުތަކާ ހަވާލާދީ އެ ގައުމުގެ މީޑިއާގައި ރިޕޯޓްކޮށްފައިވާ ގޮތުގައި މިއީ މައިގަނޑު ގޮތެއްގައި، މަސްތުވާތަކެތީގެ ވިޔަފާރިކުރާ ވާދަވެރި ގުރޫޕްތަކުގެ މެދުގައި އުފެދިފައިވާ މައްސަލަތަކާ ގުޅިގެން ދީފައިވާ ހަމަލާތަކެއް ކަމަށް ފުލުހުން ބުނެ އެވެ.
ފުލުހުންގެ މީޑިއާ ސްޕޯކްސްޕާސަން އެސިސްޓެންޓް ސުޕްރިންޓެންޑެންޓް އެފް.ޔޫ. ވޫޓްލާ ވިދާޅުވި ގޮތުގައި، މިހާތަނަށް ތަހުގީގުކުރި ހުރިހާ މައްސަލައަކުން ވެސް މި ހަމަލާތައް ގުޅެނީ ރާވައިގެން ކުށުގެ އަމަލުތައް ހިންގުމާއި މަސްތުވާތަކެތީގެ ވިޔަފާރިއާކަން ވަނީ ހާމަވެފަ އެވެ. އަދި ވާދަވެރި ގުރޫޕްތަކުން ނުފޫޒު ވަރުގަދަކުރުމަށާއި، ފައިސާގެ މައްސަލަތައް ހައްލުކުރުމަށް އަދި ވާދަވެރިން ނައްތާލުމަށް ނުރައްކާތެރި ހަމަލާތައް ދެމުންދާ ކަމަށް އޭނާ ވިދާޅުވި އެވެ.
ފުލުހުން ހާމަކުރި ގޮތުގައި، މި މާރާމާރީތަކުގެ ތެރެއިން ގިނަ ހަމަލާތަކެއް ރޭވުމުގައި ބޭރު ގައުމުތަކުގައި ތިބި ލަންކާގެ ކުށްވެރިން އިސްކޮށް ހަރަކާތްތެރިވެ އެވެ. އަދި ބައެއް ހާލަތްތަކުގައި، އުޖޫރައަށް މީހުން މެރުމުގެ ކޮންޓްރެކްޓްތަކަށް ފައިސާގެ ބަދަލުގައި މަސްތުވާތަކެތި ދީގެން ވެސް ހަމަލާތައް ދީފައިވާ ކަން ތަހުގީގަށް ވަނީ އެނގިފަ އެވެ.
މިފަދަ ހަމަލާތަކުގައި އަމާޒުކުރި މީހާގެ ބަދަލުގައި އެހެން އާންމުން މަރުވި ހާދިސާތައް ވެސް ވަނީ ހިނގައިފަ އެވެ. އެގޮތުން، އޯގަސްޓް މަހު މައުންޓް ލެވީނިއާގައި ސައިކަލެއްގައި ދިޔަ ދެ މީހަކު ދިން ބަޑީގެ ހަމަލާއެއްގައި މަރުވީ ގަރާޖެއްގެ ކައިރިން މީހަކު މަރާލާފައި ވާއިރު ހަމަލާގެ އަސްލު އަމާޒަކީ މަސްތުވާތަކެތީގެ ގުރޫޕަކާ ގުޅުން އޮތް ގަރާޖުގެ ވެރިމީހާ ކަމަށް ފުލުހުން ބުންޏެވެ. މީގެ އިތުރުން މާލިގާވައްތައިގައި ހާޑްވެއާ ފިހާރައެއްގެ ވެރިއެއް ކަމަށްވާ މުހައްމަދު އަސްމިން މުއީއްދީން މަރާލި ހާދިސާގައި، އެ ހަމަލާ ރޭވީ ފްރާންސްގައި ދިރިއުޅޭ "ކުޑޫ އަންޖޫ" ނަމަކަށް ކިޔާ ކުށްވެރިއެއް ކަމަށް ފުލުހުން ތުހުމަތުކުރެ އެވެ.
މިފަދަ ޖަރީމާތައް ހުއްޓުވުމަށް ލަންކާ ފުލުހުން ވަނީ އިންޓެލިޖެންސް އޮޕަރޭޝަންތައް ވަރުގަދަކޮށްފަ އެވެ. ދާދިފަހުން ވަނީ ދުބާއީގައި އުޅޭ ނުރައްކާތެރި ކުށްވެރިއެއް ކަމަށްވާ ލަލިތު ކަންނަންގަރާ (ބަސް ލަލިތު) ލަންކާއަށް ގެންގޮސްފަ އެވެ. އަދި ފާއިތުވި ތިން އަހަރު ތެރޭ ވަނީ، ކުށްކޮށްގެން ހޯދާފައިވާ 3.878 ބިލިއަން ރުޕީސްގެ މުދާ ހިފެހެއްޓުމުގެ ގާނޫނީ މަރުހަލާ ފަށައިފަ އެވެ. މީގެ އިތުރުން 2024 ވަނަ އަހަރުން ފެށިގެން އިންޓަޕޮލްގެ ރެޑް ނޯޓިސް މެދުވެރިކޮށް، ކުށްވެރިންގެ 42 މީހަކު ލަންކާއަށް ގެންގޮސްފައި ވާއިރު، އިތުރު 109 މީހަކު ހޯދުމުގެ މަސައްކަތް ލަންކާ ފުލުހުން އަންނަނީ ކުރަމުންނެވެ.