މިސްރުގެ ޖީޒާ ގަވަރްނޮރޭޓްގެ ބައިބޯ އަވަށެއް ކަމަށްވާ އަރުޟުއް ލިވާގައި، އިމާރާތެއްގެ ބެލްކަނިން ތިރިއަށް ވެއްޓުނު ފަސް އަހަރުގެ ކުޑަކުއްޖަކު ބިމުގައި ޖެހުމުގެ ކުރިން ހިފި ޒުވާނަކަށް ގިނަ ބައެއްގެ ތައުރީފު ލިބިއްޖެ އެވެ.
މި ހާދިސާ ހިނގި ވަގުތު ކައިރީގައި ހުރި ސީސީޓީވީ ކެމެރާއަކަށް ރެކޯޑު ކުރެވިފައިވާ ވީޑިއޯއެއް ސޯޝަލް މީޑިއާގައި ވަނީ ވައިރަލްވެފަ އެވެ.
ކުއްޖާ ސަލާމަތްކުރީ، މިސްރުގެ މީޑިއާތަކުން ރިޕޯޓްކޮށްފައިވާ ގޮތުގައި، ސެޓެލައިޑް ޑިޝް ޓެކްނީޝަނެއްގެ ގޮތުގައި ވިޔަފާރިކުރާ އަހްމަދު ރަޖަބް، 25، އެވެ. ބެލްކަނިން ކުއްޖާ ވެއްޓޭތަން ފެނި، މަގުމަތީގައި ހުރި އެހެން ކުއްޖަކު ހަޅޭއްލަވައިގަތް އަޑަށް އަހްމަދު ރަޖަބް ވަގުތުން އެ ދިމާއަށް ދުއްވައިގަތެވެ.
އިމާރާތުގެ ތިންވަނަ ފަންގިފިލާގެ ބެލްކަނިން ކުއްޖާ ތިރިއަށް ވެއްޓުނު ވަގުތު، އެ ދިމާ ތިރީގައި ދަމާފައި ހުރި، އަންނައުނު ހިއްކާ ރޯނެއްގައި ކުއްޖާ އަޅައިގަނެ އިރުކޮޅަކު ހަރުލާފައި އޮވެ އެވެ. އެ ސިކުންތުކޮޅުގެ ތެރޭގައި އަހްމަދު ރަޖަބް ކުއްޖާއާ ދިމާލަށް ތިރިއަށް ގޮސް، ކުއްޖާ ވެއްޓުނު އިރު ބިމުގައި ޖެހުނަނުދީ ހިފައި ސަލާމަތްކުރީ އެވެ.
ވެއްޓުނު ފަސް އަހަރުގެ މި ކުއްޖާއަކީ އެ އަވަށުގައި ދިރިއުޅޭ ސޫދާން މީހެއްގެ ދަރިއެކެވެ. ކުއްޖާއަށް ބޮޑު އެއްވެސް އަނިޔާއެއް ނުވެ އެވެ.
މިސްރުގެ މަޝްހޫރު ޓީވީ ޝޯ އަލް-ޙިކާޔާ އަށް ދިން އިންޓަވިއުއެއްގައި އަހްމަދު ބުނީ، އޭނާއަށް ވިސްނާލާނެ ވަގުތެއް ނުލިބޭ ކަމަށާއި، ހަމައެކަނި ބޭނުންވީ ކޮންމެ ފަދަ ނުރައްކަލަކާ ކުރިމަތިލައިގެން ވެސް ކުއްޖާ ބިމުގައި ޖެހުނަނުދީ ސަލާމަތްކުރަން ކަމަށެވެ.