އެމެރިކާގެ މިޑްޓާމް އިންތިހާބުގައި މުސްލިމް ކެންޑިޑޭޓުން ބޮޑެތި ކުރިއެރުންތަކެއް ހޯދައި، އެ ގައުމުގެ ގާނޫނު ހަދާ މަޖިލިސް (ކޮންގްރެސް) އިން ރެކޯޑު އަދަދަކަށް ގޮނޑި ކާމިޔާބުކޮށް ތާރީހީ ކާމިޔާބީއެއް ހޯދައިފި އެވެ.
މި ކާމިޔާބީ ލިބުނީ އެމެރިކާގެ ރައީސް ޑޮނަލްޑް ޓްރަމްޕާއި ވައިޓް ހައުސްއިން މުސްލިމް ކެންޑިޑޭޓުންނާ ދެކޮޅަށް ވަރުގަދަ އެންޓި ކެމްޕޭނެއް ހިންގަމުން ދަނިކޮށެވެ. ޑިމޮކްރެޓިކް ޕާޓީގެ ޕްރޮގްރެސިވް މުސްލިމް ކެންޑިޑޭޓުންނަކީ އެމެރިކާގެ ސަލާމަތަށް ހުރި ނުރައްކަލެއްގެ ގޮތުގައި ސިފަކޮށް، ރިޕަބްލިކަން ކެންޑިޑޭޓުން ހޮވުމަށް ޓްރަމްޕް ވަނީ ވަރަށް ބޮޑަށް ބާރުއަޅުއްވައިފަ އެވެ. ނަމަވެސް، މި އެންޓި-ކެމްޕޭނާ އެކު ވެސް ރިޕަބްލިކަން ޕާޓީއަށް މި އިންތިހާބުގައި ވަނީ ބޮޑު ނާކާމިޔާބީއަކާ ކުރިމަތިލާން ޖެހިފަ އެވެ.
މި ފަހަރުގެ އިންތިހާބުގައި މުސްލިމް ކެންޑިޑޭޓުން ވަނީ ސެނެޓުގެ އެއް ގޮނޑީގެ އިތުރުން ހައުސް އޮފް ރެޕްރެޒެންޓެޓިވްސްގެ ހަތް ގޮނޑި ހިމެނޭހެން ޖުމްލަ އަށް ގޮނޑި ކޮންގްރެސް އިން ކާމިޔާބުކޮށްފަ އެވެ.
މި އިންތިހާބުގައި އެންމެ ފާހަގަކޮށްލެވުނު އެއް ކާމިޔާބީއަކީ އެމެރިކާގެ ސެނެޓަށް ފުރަތަމަ ފަހަރަށް މުސްލިމް މެންބަރަކު އިންތިހާބުވުމެވެ. މި ތާރީހީ ކާމިޔާބީ ހޯއްދެވީ މިޝިގަން ސްޓޭޓުން ޑިމޮކްރެޓިކް ޕާޓީގެ ޓިކެޓުގައި ވާދަކުރެއްވި ޑޮކްޓަރު އަބްދުލް އަލް-ސައްޔިދެވެ. އޭނާ މި ގޮނޑި ކާމިޔާބުކުރެއްވީ ރިޕަބްލިކަން ޕާޓީގެ މައިކް ރޮޖާސްއާ ވާދަކުރައްވައި ބޮޑު ތަފާތަކުންނެވެ.
ހައުސް އޮފް ރެޕްރެޒެންޓެޓިވްސް އަށް ބަލާއިރު، މިނެސޯޓާގެ ފިފްތު ޑިސްޓްރިކްޓުން ވާދަކުރެއްވި ސޯމާލިއާ ދަރިކޮޅުގެ އިލްހާން އުމަރު ވަނީ ތަފާތު ބޮޑުކޮށް ފަސް ވަނަ ފަހަރަށް އިންތިހާބު ކާމިޔާބުކުރައްވައި، މަގާމު ދިފާއުކުރައްވައިފަ އެވެ. މީގެ އިތުރުން ފަލަސްތީނު ދަރިކޮޅުގެ ރާޝިދާ ތަލީބާއި، އިންޑިއާނާގެ އެންޑްރޫ ކާސަން އަދި ކެލިފޯނިއާގެ ލަތީފާ ސައިމަން ވެސް ވަނީ އެ ބޭފުޅުންގެ ގޮނޑިތައް ފަސޭހަކަމާ އެކު ދިފާއުކުރައްވައިފަ އެވެ.
މި ފަހަރުގެ އިންތިހާބުގައި އަލަށް ކޮންގްރެސް އަށް އިންތިހާބުވި ބޭފުޅުންގެ ތެރޭގައި ނިއު ޖާޒީގެ 12 ވަނަ ޑިސްޓްރިކްޓުން ހޮވުނު ޑރ. އެޑަމް ހަމާވީ ހިމެނެ އެވެ. އޭނާއަކީ އެމެރިކާ ސިފައިންގެ ކުރީގެ ޑޮކްޓަރެއްގެ އިތުރުން ގައްޒާގައި ޒަހަމްވި މީހުންނަށް ފަރުވާދިނުމުގައި އުޅުއްވި ޕްލާސްޓިކް ސާޖަނެކެވެ. މިއީ ނިއު ޖާޒީން މުސްލިމް ބޭފުޅަކު ކޮންގްރެސް އަށް ހޮވުނު ފުރަތަމަ ފަހަރެވެ. ހަމައެއާ އެކު ނިއު ޔޯކުން ވާދަކުރެއްވި ދާރިއަލީޒާ އަވީލާ ޝެވަލިއޭ ވެފައިވަނީ ކޮންގްރެސް އަށް ހޮވުނު ފުރަތަމަ ލެޓީނޯ މުސްލިމް އަންހެނާއަށެވެ. ކެލިފޯނިއާގެ 14 ވަނަ ޑިސްޓްރިކްޓުން އައިޝާ ވައްހާބު ވެސް ވަނީ ފުރިހަމަ ދައުރަކަށް މި ފަހަރު ގޮނޑި ކާމިޔާބުކުރައްވައިފަ އެވެ.
ސްޓޭޓްލެވެލްގެ ގާނޫނު ހަދާ މަޖިލިސްތަކަށް ބަލާއިރު ވެސް މުސްލިމުން ވަނީ ގިނަ ގޮނޑިތަކެއް ކާމިޔާބުކޮށްފަ އެވެ. އެގޮތުން މިޝިގަން، ޓެކްސަސް، ޖޯޖިއާ، އޯހިއޯ އަދި އިލިނޯއީސް ފަދަ ސްޓޭޓްތަކުން ގިނަ އަދަދެއްގެ މުސްލިމް ކެންޑިޑޭޓުން ވަނީ ލޯކަލް މަޖިލިސްތަކުގެ ގޮނޑިތައް ކާމިޔާބުކޮށް، އެމެރިކާގެ ސިޔާސީ މަސްރަހުގައި މުސްލިމުންގެ ބާރުގަދަވަމުންދާކަން ސާބިތުކޮށްދީފަ އެވެ.