އިޒްރޭލުގައި މިދިޔަ މަހުގެ 27 ގައި ބޭއްވި އާންމު އިންތިހާބަށް ފަހު، ސިޔާސީ ޕާޓީތަކުން ދޫދީ، ގުޅިފައިވާ ސަރުކާރެއް އެކުލަވައިލުމަށް އެ ގައުމުގެ ރައީސް އިޒާކް ހަރުޒޮގް ގޮވާލައިފި އެވެ.
އިންތިހާބުގެ ރަސްމީ ނަތީޖާ އިއްޔެ ގަބޫލުކުރުމަށް ފަހު ރައީސް ހަރުޒޮގް ބުނީ، އިތުރު އިންތިހާބަކަށް ދިއުން ހުއްޓުވުމަށްޓަކައި ހުރިހާ ޕާޓީތަކެއްގެ ވެރިން ވެސް ލުއި ފަސޭހަގޮތްތަކެއް ހިޔާރުކުރަންޖެހޭ ކަމަށެވެ. ގާނޫނު ހަދާ މަޖިލިސް، ނެސެޓްގައި 120 ގޮނޑި ހިމެނޭއިރު ބޮޑުވަޒީރު ބެންޖަމިން ނަތަންޔާހޫގެ ކަނާތު ފިޔައިގެ ބްލޮކަށް އަދި އިދިކޮޅު ލީޑަރު ގާދީ އެއިސެންކޮޓްގެ ބްލޮކަށް ވެސް އަޣްލަބިއްޔަތު ލިބިފައެއް ނުވެ އެވެ.
ރައީސް ހަރުޒޮގް ބުނީ ސިޔާސީ މަސްރަހު ކުރިއަށްދާ ގޮތް ބެލުމަށް ޕާޓީތަކާ އެކު މަޝްވަރާ ބައްދަލުވުންތައް ފަށާފައިވާ ކަމަށެވެ.
އިންތިހާބުގެ ނަތީޖާއާ މެދު ހިތްހަމަނުޖެހި، ބޮޑުވަޒީރު ނަތަންޔާހޫ ތުހުމަތުކުރި ގޮތުގައި އަރަބި ޕާޓީތަކުން އިންތިހާބު "ވަގަށް ނެގީ" އެވެ. އަދި އެއީ ބޭރުގެ އެހީތެރިކަމާއެކުގައި ކަމަށް ވެސް ބުންޏެވެ. ނަމަވެސް ސުޕްރީމް ކޯޓުގެ ފަނޑިޔާރު ނޯމް ސޯލްބާގް އިސްކޮށް ހުރި ސެންޓްރަލް އިލެކްޝަންސް ކޮމިޓީން ވަނީ އެ ތުހުމަތުތައް ދޮގުކޮށް، އިންތިހާބުގެ އިންސާފުވެރިކަމަށް އަސަރުކުރާނެ އެއްވެސް އޮޅުވާލުމެއް ހިނގާފައި ނެތް ކަމަށް ނިންމައިފަ އެވެ.
އިދިކޮޅު ފެކްޝަންތަކަށް ގިނަ ގޮނޑި ލިބިފައިވުމުން، އާ ސަރުކާރެއް އެކުލަވައިލުމުގެ ފުރަތަމަ ފުރުސަތު އެއިސެންކޮޓްގެ ޔާޝަރު ޕާޓީއަށް ލިބޭނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެ އެވެ. އަދި އިންތިހާބުގައި ތާރީހީ ކާމިޔާބީއެއް ހޯދި އަރަބި ޕާޓީތަކުގެ ތެރެއިން އެންމެ ކުރީގައި އުޅޭ ރާމް ޕާޓީން ވަނީ އެއިސެންކޮޓަށް ތާއީދުކުރާނެ ކަމަށް ރަސްމީކޮށް އިއުލާންކޮށްފަ އެވެ.
އާ ސަރުކާރެއް އެކުލަވައިލުމަށް ނަތަންޔާހޫ ނުވަތަ އެއިސެންކޮޓަށް ފުރުސަތު ދިނުމަށް ރައީސް ހަރުޒޮގަށް ހަފްތާތަކެއްގެ މުއްދަތު ލިބޭނެ އެވެ. ދެ ލީޑަރުންނަށް ވެސް ސަރުކާރެއް ނުއުފެއްދިއްޖެ ނަމަ، 2027 ގެ ކުރީކޮޅު އިޒްރޭލުގައި އަނެއްކާވެސް އާންމު އިންތިހާބެއް ބާއްވަން ޖެހޭނެ އެވެ.