ނިއު ދިއްލީ (އެޕްރީލް 4) - ފޭކް ނިއުސް ލިޔާ ނޫސްވެރިންނަށް އަދަބު ދިނުމަށް އިންޑިއާގެ އިންފޮމޭޝަން މިނިސްޓްރީން ނިންމި ނިންމުން ބަދަލު ކުރަން ބޮޑު ވަޒީރު ނަރެންދުރަ މޯދީ އަންގަވައިފި އެވެ.
އިންޑިއާގެ އިންފޮމޭޝަން މިނިސްޓްރީން ކުރިން ނެރުނު އަމުރެއްގައި ވަނީ ފޭކް ނިއުސް ލިޔެގެން ޝަކުވާއެއް ލިބިއްޖެ ނަމަ ވަކިވަކި ނޫސްވެރިންނާއި މީޑިއާ އޮގަނައިޒޭޝަންތަކުގެ އެކްރެޑިޓޭޝަން ބާތިލް ކުރާނެ ކަމަށެވެ. ސަރުކާރުގެ އިހްތިފާލްތަކާއި ސަރުކާރުގެ އޮފީސްތަކަށް ދިއުމަށް ނޫސްވެރިންނަށް ޕްރެސް އިންފޮމޭޝަން ބިއުރޯ (ޕީއައިބީ) ގެ އެކްރެޑިޓޭޝަން ބޭނުންވާނެ އެވެ.
މޯދީ ވިދާޅުވީ އެ ފިޔަވަޅު އަޅަން އިންފޮމޭޝަން މިނިސްޓްރީން ނިންމީ ދޮގު ޚަބަރު ފެތުރުން ހުއްޓުވުމަށް ކަމަށެވެ. ނަމަވެސް އެ ނިންމުމަށް ފާޑުކިޔުންތައް އަމާޒުވެ ދުނިޔޭގެ އެންމެ ބޮޑު ޑިމޮކްރެސީން ޚިޔާލުފާޅު ކުރުމުގެ މިނިވަން ކަމަށް ހުރަސް އަޅަން އުޅޭ ކަމުގެ ތުހުމަތާ އެކު މޯދީ ވަނީ ނިންމުން ބަދަލު ކުރަން އަންގަވައިފަ އެވެ.
އިންޑިއާގެ އިންފޮމޭޝަން އެންޑް ބްރޯޑްކާސްޓިން މިނިސްޓަރު ސްމްރިޓީ އިރާނީ ވެސް ވިދާޅުވީ ފޭކް ނިއުސް ލިޔާ ނޫސްވެރިންނަށް "އަދަބެއް" ދިނުމަށް ނިންމި ނިންމުން ބޮޑު ބަހުސަކަށްވި ކަމަށެވެ.
ނޫސްވެރިންގެ މިނިވަންކަމުގެ ދަރަޖައިގައި، ރިޕޯޓާސް ވިތައުޓް ބޯޑާސް އިން، އިންޑިއާ މިދިޔަ އަހަރު ރޭންކްކޮށްފައި ވަނީ 180 ގައުމުގެ ތެރޭން 136 ވަނައިގަ އެވެ.