ބިލިއަނަރު ޖެފް ބެޒޯސް 20 އަހަރުގެ މަސައްކަތުން ޖައްވަށް

އެމެރިކާގެ ބިލިއަނަރު ޖެފް ބެޒޯސް، އޭނާގެ އަމިއްލަ ޖައްވީ އުޅަނދު، ނިއު ޝެފަޑްގައި މިއަދު ޖައްވަށް ދަތުރުކޮށްފި އެވެ.

ޖެފްއާ އެކު މި ދަތުރުގައި ބައިވެރިވީ އޭނާގެ ކޮއްކޮ މާކް ބެޒޮސް އާއި ޖައްވީ ދަތުރުތަކުގެ ތަޖުރިބާކާރު ވޮލީ ފަންކް، 82، އާއި އުމުރުން 18 އަހަރުގެ ދަރިވަރެއް ކަމަށްވާ އޮލިވާ ޑައިމެން އެވެ. ޖައްވީ އުޅަނދު ނިއު ޝެފަޑްއަކީ ޖެފް ބެޒޯސްގެ އަމިއްލަ ޖައްވީ ކުންފުނި ބްލޫ އޮރިޖިން އިން އުފައްދާފައިވާ، ހަ މީހުންގެ ޖާގައިގެ އުޅަނދެކެވެ.

ދިހަ މިނެޓްގެ މި ދަތުރަށް ފުރުމުގެ ކުރިން ޖެފް ބުނީ، މި ދަތުރަށް އެތައް ތަމްރީންތަކެއް ހަދާފައިވާ ކަމަށާއި، ޖައްވީ އުޅަނދުވެސް މިހާރު އޮތީ ތައްޔާރަށް ކަމަށެވެ. އަދި އުޅަނދުގެ ފަޅުވެރިން ވެސް މިހާރު ތިބީ ތައްޔާރަށް ކަމަށާއި، މިއީ އާދަޔާ ހިލާފަށް ފައްކާ ޓީމެއް ކަމަށް ވެސް އޭނާ ބުންޏެވެ.

ނިއު ޝެފަޑް، ހަތަރު މީހުންނާއިގެން ޖައްވަށް ފުރީ، ޓެކްސަސްގެ ވެން ހޯން ކައިރީގައި އޮންނަ ބެޒޯސްގެ އަމިއްލަ ބިމެއްގައި ހަދާފައިވާ ސްޓޭޝަނަކުންނެވެ. ޖައްވީ އުޅަނދު ނިއު ޝެފަޑް ޖައްވަށް އުދުއްސައިލީ ބޫސްޓާ ރޮކެޓެއްގެ ކުރީގައި ލައިފަ އެވެ. ބިމުން ފެށިގެން 76 ކިލޯމީޓަރު (250000 ފޫޓު) އުހަށް އެރުމާއެކު، ބޫސްޓާ ރޮކެޓުން ނިއު ޝެފަޑް ވަކިވެ ޖައްވަށް އަރައިގެން ދިޔަ އެވެ. އެއާ އެކު، ބޫސްޓާ ރޮކެޓް އެނބުރި ބިމަށް ތިރި ކުރި އެވެ.

ޖައްވީ ދަތުރުވެރިން ގޮވައިގެން ދަތުރުކުރި އުޅަނދު ޖައްވުގެ ތެރެއަށް ވަދެ، ބިމުން ފެށިގެން 100 ކިލޯމީޓަރު (62 މޭލު) އުހަށް އެރި އެވެ. އަދި ބިމުގެ ދަމާބާރުން (ގްރެވިޓީ) ނެއްޓި، ތިން މިނެޓް ވަންދެން ޖައްވުގެ ތެރޭގައި މަޑުކޮށްލި އެވެ. އެ ވަގުތުކޮޅުގެ ތެރޭގައި، ހުރިހާ ދަތުރުވެރިން ވެސް އެމީހުންގެ ގޮނޑީ ކަމަރު ނައްޓާލައި، އުޅަނދުގެ ތެރޭގައި ފީނާލައި، އުޅަނދުގެ ކުޑަދޮރުތަކުން ޖައްވު ތެރެ ބަލައި އުޅުނެވެ.

ކުޑަ ވަގުތުކޮޅެއް ވަންދެން ޖައްވުގެ ތެރޭގައި މަޑުކޮށްލައިގެން އޮތުމަށް ފަހު، ނިއު ޝެފަޑް ބިމަށް އެނބުރި އައުމުގެ ދަތުރު ފެށި އެވެ. ބިމުގެ ވައިގެ ފަށަލައިގެ ތެރެއަށް ވަނުމަށް ފަހު، ވަކިވަރަކަށް ތިރިވުމުން، އޭގެ ބިޔަ ތިން ވައިކުޑަ ހުޅުވާލައި، ތިރިއަށް ފައިބާ ދުވެލި ދަށް ކުރި އެވެ. އެއަށް ފަހު ޓެކްސަސްގެ ސަހަރާގެ ތެރެއަށް ނިއު ޝެފަޑް ތިރިކުރީ އެވެ.

މިއަދުގެ ދަތުރަށް ކަނޑައެޅި ހަތަރު ޖާގައިގެ ތެރެއިން ހަތަރު ވަނަ ޖާގަ ދޫކޮށްލީ، ނީލަމުގައި އެންމެ ބޮޑު އަގެއްގައި އެ ޖާގަ ގަންނަ މީހަކަށެވެ. އެ ޖާގަ ވިކުނީ 28 މިލިއަން ޑޮލަރަށެވެ. ނަމަވެސް އެ ޖާގަ ގަތް މީހާ ބޭނުންވީ، މިއަދުގެ ދަތުރުގެ ބަދަލުގައި، އެހެން ދަތުރެއްގައި ޖައްވަށް ދާށެވެ.

އެހެންކަމުން، މިއަދުގެ ދަތުރުގެ ހަތަރު ވަނަ ޖާގަ އަށް ކަނޑައެޅީ، އެ ޖާގަ ހޯދުމަށް ނީލަމުގައި ދެ ވަނަ އަށް އެންމެ ބޮޑު އަގު ހުށަހެޅި ފަރާތެވެ. އެއީ ހޮލޭންޑްގެ ދަރިވަރެއް ކަމަށްވާ އުމުރުން 18 އަހަރުގެ އޮލިވާ ޑައެމެން އެވެ. ނަމަވެސް އޭނާ ހުށަހެޅި އަގެއް، ބްލޫ އޮރިޖިން ކުންފުނިން ހާމައެއް ނުކުރެ އެވެ.