އިނގިރޭސި ލީގު ކަޕުގެ ތިން ވަނަ ބުރުން އާސެނަލް އާއި ޗެލްސީ އަދި ޓޮޓެންހަމް ހޮޓްސްޕާސް ކެޓިއިރު، ލިވަޕޫލާއި މެންޗެސްޓާ ސިޓީ ހަތަރު ވަނަ ބުރުން ފުރުސަތު ހޯދައިފި އެވެ.
އާސެނަލް ކެޓީ އަމިއްލަ ދަނޑުގައި ބްރައިޓަން އަތުން 3-1 އިން ބަލިވެގެންނެވެ. ލަންޑަނުގެ އަނެއް ޓީމު ކަމަށްވާ ޓޮޓެންހަމް ކެޓީ ރަށުން ބޭރުގައި ނޮޓިންހަމް ފޮރެސްޓް އަތުން 2-0 އިން ބަލިވުމުންނެވެ.
ޗެލްސީ ކަޓައި ސިޓީ ކުރިއަށް ދިޔައީ އެ ދެ ޓީމު ކުޅުނު މެޗު 2-0 އިން ސިޓީ ކާމިޔާބުކުރުމުންނެވެ. ލިވަޕޫލް ފުރުސަތު ހޯދީ ޕެނަލްޓީ ޖަހައިގެން ޑާބީ ކައުންޓީ އަތުން 3-2 އިން މޮޅުވެގެންނެވެ.
ޕްރިމިއާ ލީގުގެ އެއް ވަނައިގައި އޮތް އާސެނަލުން ވަނީ ބްރައިޓަންއާ ދެކޮޅަށް ކުޅުނު މެޗުގައި ލީޑު ނަގައިފަ އެވެ. މި ގޯލް ޖެހީ އެޑްވަޑް އެންކެޓިއާ އެވެ. ބްރައިޓަން މޮޅުވީ ފަހަތުން އަރައި ޖެހި ތިން ގޯލުންނެވެ. މި ގޯލުތައް ޖަހައިދިނީ އާސެނަލްގެ ކުރީގެ ފޯވާޑް ޑެނީ ވެލްބެކާއި ކޯރޫ މިޓޮމާ އާއި ތާރިގް ލަމްޕްޓޭ އެވެ.
ޓޮޓެންހަމް އަތުން ފޮރެސްޓް މޮޅުވީ ދެ ވަނަ ހާފުގައި ޖެހި ދެ ގޯލުންނެވެ. ފުރަތަމަ ގޯލް 50 ވަނަ މިނެޓުގައި ޖެހީ ރެނަން ލޮޑީ އެވެ. އޭގެ ހަތް މިނެޓު ފަހުން ދެ ވަނަ ގޯލް ޖެހީ މެންޗެސްޓާ ޔުނައިޓެޑުގެ ކުރީގެ ކުޅުންތެރިޔާ ޖެސޭ ލިންގާޑެވެ.
ސިޓީ އާއި ޗެލްސީގެ މެޗު އޮތީ ސިޓީގެ އިއްތިހާދު ސްޓޭޑިއަމުގަ އެވެ. މި މެޗުގައި ސިޓީގެ ދެ ގޯލް، ދެ ވަނަ ހާފުގެ ކުރީކޮޅު ޖަހައިދިނީ ރިޔާދް މާރޭޒާއި ހޫލިއަން އަލްވަރޭޒެވެ. އާ ކޯޗު ގްރަހަމް ޕޮޓާއާ އެކު ޗެލްސީން ފުރަތަމަ ނަތީޖާތައް ރަނގަޅުކުރި ނަމަވެސް މިދިޔަ ދެ ހަފުތާގައި ވަނީ އަނެއްކާ ވެސް އަޑިއަޅާލައިފަ އެވެ.
ލިވަޕޫލުން އަމިއްލަ ދަނޑުގައި ޑާބީއާ ދެކޮޅަށް ކުޅުނު މެޗު ނިމުނީ 0-0 އިން އެއްވަރުވެގެންނެވެ. ޕެނަލްޓީ ޝޫޓްއައުޓުގައި ޑާބީގެ ފަސް ޕެނަލްޓީގެ ތެރެއިން ތިން ޕެނަލްޓީ ނާކާމިޔާބުވި އެވެ. ލިވަޕޫލް މޮޅުވީ ފަސް ޕެނަލްޓީގެ ތެރެއިން ތިން ޕެނަލްޓީ ކާމިޔާބުކޮށްގެންނެވެ. ޕެނަލްޓީތައް ކާމިޔާބުކުރީ އެލެކް އޮކްލޭޑް ޗެމްބަލައިން އާއި ޑާވިން ނޫނޭޒް އަދި ހާވޭ އެލިއޮޓް އެވެ.
މުބާރާތުގެ ތިން ވަނަ ބުރުގައި މިރޭ މެންޗެސްޓާ ޔުނައިޓެޑުން އަމިއްލަ ދަނޑުގައި އެސްޓަން ވިލާއާ ދެކޮޅަށް ނުކުންނާނެ އެވެ.
