ލޮސް އެންޖެލްސް (ޖެނުއަރީ 22) – މެންޗެސްޓާ ޔުނައިޓެޑުގައި ވިދާލި މެކްސިކޯ ފޯވާޑް ހަވިއޭ ހެނާންޑޭޒް (ޗިޗަރީޓޯ) އެމެރިކާގެ މޭޖާ ލީގުގެ އެލްއޭ ގެލެކްސީ އަށް ބަދަލުވެއްޖެ އެވެ.
ރިޕޯޓްތައް ބުނާ ގޮތުުގައި އޭނާ ވެގެންދާނީ މޭޖާ ލީގުގެ އެންމެ މުސާރަ ބޮޑު ކުޅުންތެރިޔާ އަށެވެ. އޭނާ އަށް އެ ކްލަބުން އަހަރަކު ހަ މިލިއަން ޑޮލަރުގެ މުސާރައެއް ދޭނެ ކަމަށްވެ އެވެ.
ހެނާންޑޭޒް އެމެރިކާ އަށް މި މިސްރާބު ޖެހީ މިދިޔަ އަހަރުގެ ސެޕްޓެމްބަރު މަހު ސްޕެއިނުގެ ސެވިއްޔާއާ ތިން އަހަރުގެ ކޮންޓްރެކްޓެއްގެ ދަށުން ގުޅުމަށް ފަހު އެ ޓީމުގެ ކޮންޓްރެކްޓް އުވާލުމަށް ފަހު އެވެ.
އެލްއޭ ގެލެކްސީން ހެނާންޑޭޒް މި ގެންދިޔައީ އެ ޓީމު ދޫކޮށް އޭސީ މިލާނަށް ބަދަލުވެފައިވާ ސްވިޑަން ފޯވާޑް ޒަލަޓާން އިބްރަހިމޮވިޗުގެ ބަދަލުގަ އެވެ.
މެކްސިކޯގެ ގުއަޑަލަޖަރާ އިން ފާހަގަވި ހެނާންޑޭޒް މެންޗެސްޓާ ޔުނައިޓެޑަށް ކުޅުނީ 2010-2015 އަށެވެ. އެލެކްސް ފާގަސަންގެ ކޯޗުކަމުގައި އޭނާ ވަނީ އެ ޓީމާ އެކު ޕްރިމިއާ ލީގު ދެ ފަހަރު ކާމިޔާބުކޮށްފަ އެވެ. އޭގެ ތެރެއިން 2014-2015 އަށް ލޯން އުސޫލުން ރެއާލް މެޑްރިޑަށް ކުޅެ އެ ޓީމާ އެކު ފީފާ ކްލަބް ވޯލްޑް ކަޕް އުފުލާލި އެވެ. އެއަށް ފަހު ހެނާންޑޭޒް ކުޅުނީ ޖަރުމަނުގެ ބެޔާ ލެވަކޫސަން އާއި ޕްރިމިއާ ލީގުގެ ވެސްޓް ހޭމް ޔުނައިޓެޑަށް އަދި ދާދި ފަހުން ސްޕެއިނުގެ ސެވިއްޔާ އަށެވެ. އުމުރުން 31 އަހަރުގެ ފޯވާޑް ވަނީ މެކްސިކޯ ގައުމީ ޓީމަށް 2009 އިން ފެށިގެން 109 މެޗު ކުޅެދީ 52 ގޯލް ޖަހައިދީފަ އެވެ.
އެލްއޭ ގެލެކްސީ އަކީ ޔޫރަޕުގައި ކުޅެފައިވާ މަޝްހޫރު ވަރަށް ގިނަ ތަރިން ކުޅެފައިވާ ޓީމެކެވެ. އޭގެ ތެރޭގައި އިބްރަހިމޮވިޗުގެ އިތުރުން މެންޗެސްޓާ ޔުނައިޓެޑުގެ ކުރީގެ ކެޕްޓަން ޑޭވިޑް ބެކަމް އާއި ލިވަޕޫލުގެ ކުރީގެ ކެޕްޓަން ސްޓީވެން ޖެރާޑާއި އިނގިރޭސި ޑިފެންޑަރު އޭޝްލީ ކޯލް އާއި އަޔަލެންޑުގެ ކުރީގެ ފޯވާޑް ރޮބީ ކީން ހިމެނެ އެވެ.