މާލޭގައި ހުރި ކޭއެފްސީ އާއި ޕިއްޒާ ހަޓް ވެސް ބަންދު

މާލޭގައި ހުރި ކޭއެފްސީ އާއި ޕިއްޒާ ހަޓްގެ އައުޓްލެޓްތައް ވެސް ބަންދުކޮށްފި އެވެ.

އެ ދެތަން ބަންދުކުރީ މިދިޔަ ހަފްތާގަ އެވެ.

ވިޔަފާރި ވަރަށް ބޮޑަށް ދަށްވުމުން ހުޅުމާލޭގައި ހުރި ކޭއެފްސީ އާއި ޕިއްޒާ ހަޓް ރެސްޓޯރެންޓް މިދިޔަ އަހަރުގެ ނޮވެމްބަރު މަހު ވަނީ ބަންދުކޮށްފަ އެވެ.

ކޭއެފްސީ އާއި ޕިއްޒާ ހަޓް ރެސްޓޯރެންޓް މާލޭގައި އެންމެ ފުރަތަމަ ހުޅުވީ 2018 ވަނަ އަހަރު އެވެ. އޭގެ ފަހުން އެ ދެ ފްރެންޗައިސްގެ އައުޓްލެޓް ވަނީ ހުޅުމާލޭގައި ވެސް ހުޅުވައިފަ އެވެ.

މާލޭގެ ކޭއެފްސީ އާއި ޕިއްޒާ ހަޓް ބަންދު ކުރިއިރު، އެތަނުގެ ބައެއް ސާމާނުތައް ވިއްކާލުމުގެ މަސައްކަތްތައް ކުރިއަށްދާ ކަމަށް އެނގިފައިވެ އެވެ.

ފަލަސްތީނުގެ ޣައްޒާއަށް އިޒްރޭލުން ދެމުން ގެންދާ ހަމަލާތަކާ ދެކޮޅު ހަދައި، އިޒްރޭލާ ގުޅުން އޮންނަ ވިޔަފާރިތައް ބޮއިކޮޓްކުރުމަށް މުޅި ދުނިޔޭގައި ފެށި ކެމްޕެއިނުގައި ކޭއެފްސީ އާއި ޕިއްޒާ ހަޓް ވެސް ބޮއިކޮޓްކުރަން ފެށި އެވެ. އެކަމަކު ކޭއެފްސީން ވަނީ އެ ކުންފުނިން އިޒްރޭލަށް ތާއީދު ނުކުރާ ކަމަށާއި އެއީ ސިޔާސީ ކަމަކާ ގުޅުމެއް ނެތް ވިޔަފާރިއެއް ކަމަށް ބުނެފަ އެވެ.

ކޭއެފްސީ ރެސްޓޯރެންޓް. އެތަން ބަންދުކުރި އިރު ހުޅުމާލޭގައި ހުރި ކޭއެފްސީ އާއި ޕިއްޒާ ހަޓްވެސް ވަނީ ބަންދުކޮށްފައި -- ފޮޓޯ: މިހާރު

ރާއްޖޭގައި ވެސް މި ކެމްޕެއިން ކުރިއަށް ގެންގޮސް އެ ތަންތަނުގެ ކުރިމަތީގައި މުޒާހަރާ ވެސް ކުރި އެވެ. އަދި މާލޭގައި ހުންނަ މި ތަންތަނުގެ އައުޓްލެޓްގެ ބިއްލޫރިގަނޑު ތަޅާލައި ގެއްލުން ވެސް ދީފައިވެ އެވެ.

މުސްލިމުންގެ އާބާދީ ބޮޑު އިންޑޮނީޝިއާ އާއި މެލޭޝިއާގައި ވެސް މި ބޮއިކޮޓް ކެމްޕެއިނާ އެކު ކޭއެފްސީގެ ވިޔަފާރިތަކަށް ވަރަށް ބޮޑަށް ގެއްލުންވި އެވެ. މީޑިއާ ރިޕޯޓްތައް ބުނާ ގޮތުގައި މިދިޔަ އަހަރުގެ ފުރަތަމަ ކުއާޓާގައި ކޭއެފްސީގެ އިންޑޮނީޝިއާ އައުޓްލެޓަށް ވަނީ 35 މިލިއަން ޑޮލަރުގެ ގެއްލުންވެފަ އެވެ. އަދި އެ ގައުމުގައި މިދިޔަ އަހަރުން ފެށިގެން މިހާތަނަށް ކޭއެފްސީގެ 47 އައުޓްލެޓެއް ބަންދު ކޮށްފައިވާ ކަމަށްވެ އެވެ.