މަސްތަކެއް ބާސްކެޓަކަށް އަޅައިގެން ދަނީ -- ފޮޓޯ: މިހާރު
03 އެޕްރީލް 2025 - 18:47
އެމެރިކާއަށް އެހެން ގައުމުތަކުން އެތެރެކުރާ މުދަލުގެ ޓެރިފަށް ގެނައި ބަދަލާ އެކު ރާއްޖެއިން އެ ގައުމަށް މުދާ އެކްސްޕޯޓު ކުރުމަށް އިތުރު ފުރުސަތުތައް ފަހިވެގެން ދާނެ ކަމަށް ރާއްޖޭގެ އެކްސްޕޯޓަރުން ބުނެފި އެވެ.
އެމެރިކާއަށް އެތެރެކުރާ މުދަލުން ނަގާ ޓެރިފްގެ އަދަދުތައް އެ ގައުމުގެ ރައީސް ޑޮނަލްޑް ޓްރަމްޕް ކަނޑައެޅުއްވިއިރު، ރާއްޖެ ހިމެނެނީ 10 ޕަސެންޓްގެ ޓެރިފް ނަގާ ގައުމުތަކުގެ ތެރޭގަ އެވެ. އެއީ އެންމެ ކުޑަކޮށް ޓެރިފް ނަގާ ގައުމުތަކެވެ.
ރާއްޖެއިން އެންމެ ގިނައިން އެމެރިކާއަށް މަސް އެކްސްޕޯޓު ކުރާ ބިގް ފިޝްގެ ސީއީއޯ ޝާފިން އަހުމަދު ވިދާޅުވީ އެމެރިކާއަށް ޕްރޯޒަން ޓޫނާ އެކްސްޕޯޓު ކުރާއިރު އެންމެ ބޮޑު ވިޔަފާރީގެ ވާދަވެރިންނަކީ ވިއެޓްނާމާއި ފިލިޕީންސް އާއި ސްރީލަންކާ އާއި އިންޑޮނޭޝިއާ ފަދަ ގައުމުތައް ކަމަށެވެ.
އެމެރިކާ އިން ވިޔަފާރިއާ ގުޅޭ ޓެރިފްތަކަށް ގެނައި ބަދަލާ ގުޅިގެން، ވިއެޓްނާމުގެ އެކްސްޕޯޓަރުން އެމެރިކާއަށް އެތެރެކުރާ މުދަލަށް 46 ޕަސެންޓް ޓެރިފް ދައްކަން ޖެހެ އެވެ. އަދި ލަންކާއިން 44 ޕަސެންޓަށް ޓެރިފް ދައްކަން ޖެހޭއިރު، އިންޑޮނޭޝިއާ އިން 32 ޕަސެންޓް، އަދި ފިލިޕީންސް އިން 17 ޕަސެންޓްގެ ޓެރިފަށް ފައިސާ ދައްކަން ޖެހެ އެވެ.
ޝާފިން ވިދާޅުވީ ކުރިން އެމެރިކާއަށް އެއްވެސް ޓެރިފަކާ ނުލައި އެކްސްޕޯޓުކުރި ވިއެޓްނާމުން 40 ފަސެންޓަށް ވުރެ ބޮޑު އަދަދެއް ޓެރިފަށް ދައްކަން ޖެހުމުން، އެ ތަންތަނުގެ އެކްސްޕޯޓު ކުރާ ފަރާތްތަކުން ކުރަން ޖެހޭ ހަރަދު ވަރަށް ބޮޑުވާނެ ކަމަށެވެ. ނަމަވެސް ރާއްޖެއިން މިހާރެކޭ ވެސް އެއްފަދައިން އަގުތަކަށް މާ ބޮޑު ބަދަލެއް ނުގެނެސް، އެމެރިކާއަށް މަހުގެ ބާވަތްތައް އެކްސްޕޯޓު ކުރެވޭނެ ކަމަށް އޭނާ ވިދާޅުވި އެވެ.
"އެވްރެޖުކޮށް މަހެއްގެ މައްޗަށް ގާތްގަނޑަކަށް ދޭއް ނޫނީ ތިން ފްރޯޒަން ޓޫނާގެ ކޮންޓެއިނާ ފޮނުވަން،" އޭނާ ވިދާޅުވި އެވެ.
އޭނާ ވިދާޅުވީ، ބިގް ފިޝް އިން އެކަނި އެމެރިކާއަށް މަހުގެ ބާވަތްތައް އެކްސްޕޯޓުކޮށްގެން މަހެއްގެ މައްޗަށް ދެ މިލިއަނެއްހާ ޑޮލަރުގެ އާމްދަނީއެއް ލިބޭނެ ކަމަށެވެ.
ރާއްޖެއިން އެމެރިކާއަށް ރޯ މަސް އެކްސްޕޯޓް ކުރާ އެންސިސްގެ ކޮމާޝަލް ޑައިރެކްޓާ ހުސެއިން އަފީފު ވިދާޅުވީ އެ ކުންފުނިން ރޯ މަސް އެމެރިކާއަށް އެކްސްޕޯޓު ކުރި ނަމަވެސް އެކްސްޕޯޓުކުރާ މިންވަރު ވަރަށް ބޮޑަށް ދަށްވެފައިވާ ކަމަށެވެ. ސަބަބަކީ ބޭނުންވާ ސައިޒާއި ކޮލިޓީގެ މަސް ނުލިބުން ކަމަށް އޭނާ ވިދާޅުވި އެވެ.
އެހެންވެ، އެމެރިކާއިން ޓެރިފަށް ބަދަލެއް ގެނައި ނަމަވެސް، އޭގެ އެންމެ އެދެވޭ ފައިދާ ރާއްޖެއަށް ހޯދަން އުނދަގޫވާނެ ކަމަށް އޭނާ ވިދާޅުވި އެވެ.
"މިދިޔަ ފަސް އަހަރަށް ބަލާ އިރު ޔޫއެސްއަށް ފޮނުވާ ކޮލިޓީ އާއި ސައިޒު ވަނީ ވަރަށް ބޮޑަށް ދަށްވެފައި. ކުރީގެ 2017 ވަނަ އަހަރު ހިސާބުގައި ލިބުނު ފަދަ ސައިޒުތައް އެކްސްޕޯޓުކޮށްފި ނަމަ ލަންކާ ފަދަ ގައުމުތަކަށް އެޑްވާންޓޭޖެއް ލިބޭނެ. އެކަމަކު މިއީ ސެލެބްރޭޓު ކުރާ ވަރު ކަމެއް ނޫން،" އޭނާ ވިދާޅުވި އެވެ.
ވޭތުވެދިޔަ ދެ އަހަރު ތެރޭ ރާއްޖޭގެ މަހުގެ އެކްސްޕޯޓު ވަނީ 50 ޕަސެންޓަށް ދަށްވެފަ އެވެ. އެމެރިކާއިން ނަގާ ޓެރިފަށް ބަދަލު ނުގެނައި ނަމަވެސް، އެކަމުން ރާއްޖެއަށް ފައިދާ ހޯދޭނީ އެކްސްޕޯޓުގެ އަދަދު އިތުރު ކުރުމުން ކަމަށް އެކްސްޕޯޓަރުން ފާހަގަކުރެ އެވެ.
ކަސްޓަމްސްގެ ހިސާބުތަކުން ދައްކާ ގޮތުން މިދިޔަ އަހަރު ރާއްޖެއިން އެމެރިކާއަށް ގާތްގަނޑަކަށް 4 މިލިއަން ޑޮލަރުގެ މަސް އެކްސްޕޯޓުކޮށްފައިވެ އެވެ. އޭގެ ތެރޭގައި ކަޅުބިލަ މަހާއި ކަންނެލީގެ އިތުރުން ހުއިފިލަނޑާ ވެސް ހިމެނެ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ބޭބީ ޝާކް
04 April 2025
ކޮބައިތަ ނަހުލާ؟
އަފްރާސިޔާބު
04 April 2025
ޓްރަމްޕަކީ ބޯނުބައި މީހެއްނޫނޭ އެކްސްޕޯޓް ނުކުރާ އެއްޗަކުން ޑިއުޓީނަގާކަށް. މިރާއްޖޭން އެކްސްޕޯޓް ކުރަނީ އިންސާނުން. އެއިން ވިސާފީ ނަގާ.
ރަންނަ
04 April 2025
ތިލިޔުމުގަ ވާގޮތުން އެކްޕޯޓަރުންގެ ހިސާބުގެ 20 ޕަސެންޓެވެސް ކަސްޓަމްސް ގަ ރެކޯޑްވެފަ ނެތް. އެވެސް ގުނަކުރަންވީ ހަތަރަކާތޯ އެއްލައްކަވޭތޯ ބަލަން
ޑރ ވާންޗޯ
04 April 2025
އަމިއްލަ ގައުމުން ރޯޔަލްޓީޢާ ޓެކްސްގެ ނަމުގަ 200 ޕަސެންޓާހަމަޔަށް ޓެކްސްނަގާތީ އުޅޭބަޔަކު އެހެން ގައުމަކުން 10 ޕަސެންޓްނަގައިގެން ސޯޓުބޭލޭކަށްނުޖެހޭ.!.
ޅިޔަނުގެ މަންމަ
04 April 2025
ބިގްފިޝް ބުނި އެތި ނުބައިކޮށް އެހެރީ ލިޔެފަ، ހީވަނީ އަހަރަކު ޔޫއެސްއެސް ފޮނުވާ ފްރޯޒަން ވާހަކަ ހެން. ނޫނީ އޭނަ އޮޅިގެން އެހެން ބުނެވުނީ، ކީއްވެތަ އެހާ ހިތް ނުބައީ ތިކުދިން؟
ކަކުނިބޯ
03 April 2025
ބިގްފިޝްއިން އެކްސްޕޯޓްކުރަނީ ކަނޑުމަސް އާމްދަނީ މަހަކު 2 މިލިޔަންޑޮލަރ އެކަމު ކަސްޓަމްސް ހިސާބު އަހަރަކަށް 4 މިލިޔަންޑޮލަރ އެހެންވީމާ އެކްސްޕޯޓް އަގު އޮޅުވާލެވިފައި ދެން އަނެއްބަޔަކަށް ކޮލިޓީމަސްނުލިބޭ ނުވެއްކިރޭ 2 ދުވަހު ކިޔުގައި މަސްކޮޅުކިރަން ކިރުމުގެ މަކަރު އިންތިހާ މިކަމުގައި ފައިދާއެއްނުވޭ އެކްސްޕޯޓްކުރަން ކޮލިޓީމަހެއްނެތް ހެޔުނުވާނެ އެހެން ބަޔަކުނުކުރާތި ކޮމްޕެޓިޓަރުންގެ ޑިޔުޓީ 30% އިން ބޮޑުވީމަވެސް މިމީހުންނަށް ދެކޮޅުނުޖެހޭ
ހޒވސ
03 April 2025
އެއްޗެއް ލިބޭކަމަކަށްނުވޭ ތިވަރުވާއިރުވެސް.
އއއ22
03 April 2025
އޭނާ ވިދާޅުވީ، ބިގް ފިޝް އިން އެކަނި އެމެރިކާއަށް މަހުގެ ބާވަތްތައް އެކްސްޕޯޓުކޮށްގެން މަހެއްގެ މައްޗަށް ދެ މިލިއަނެއްހާ ޑޮލަރުގެ އާމްދަނީއެއް ލިބޭނެ ކަމަށެވެ. ކަސްޓަމްސްގެ ހިސާބުތަކުން ދައްކާ ގޮތުން މިދިޔަ އަހަރު ރާއްޖެއިން އެމެރިކާއަށް ގާތްގަނޑަކަށް 4 މިލިއަން ޑޮލަރުގެ މަސް އެކްސްޕޯޓުކޮށްފައިވެ އެވެ.
ކުދުބެއްޔާ
03 April 2025
ތީ ވަރަށް ބޮޑު ސުވާލެއް. ކަސްޓަމްގެ އިސް ވެރިންނާ ކުރަން ޖެހޭ ސުވާލެއް