ބީއެމްއެލް ކާޑު މެޝިނުގެ މުއާމަލާތްތަކުގެ ވަކި އަދަދެއް ތިމާވެށި ހިމާޔަތްކުރަން ހޭދަކުރަނީ

ބީއެމްއެލްގެ ޕޮސް މެޝިންތަކުން ކުރާ މުއާމަލާތްތަކުން ބެންކަށް ލިބޭ ފައިދާގެ ވަކި އަދަދެއް ތިމާވެށި ހިމާޔަތްކުރުމުގެ މަސައްކަތްތަކަށް ހޭދަކުރުމަށް ހާއްސަކޮށް "އީއެންވީ ޕޮސް" އިނިޝިއޭޓިވް ލޯންޗުކޮށްފި އެވެ.

މި ޕްރޮގްރާމްގައި ބީއެމްއެލްގެ ޕޮސް މެޝިންތަކުން ކުރާ މުއާމަލާތްތަކުން ބެންކަށް ލިބޭ ފައިދާގެ ވަކި އަދަދެއް ތިމާވެށި ރައްކާތެރިކުރުމަށް ހޭދަކުރާނެ އެވެ.

ބީއެމްއެލްގެ ހެޑް އޮފީހުގައި ބޭއްވި ހާއްސަ ރަސްމިއްޔާތެއްގައި މި "އިނިޝިއޭޓިވް" އިފުތިތާހު ކޮށްދެއްވީ ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފާއި ޓޫރިޒަމް އެންޑް އެންވަޔަރަމަންޓް މިނިސްޓަރު ތޯރިގު އިބްރާހިމް އެވެ.

ބީއެމްއެލް އިން ލޯންޗްކުރި "އީއެންވީ ޕޮސް" ޕްރޮގްރާމަކީ ތިމާވެށި ރައްކާތެރިކުރުމުގައި އެ ބެންކުގެ ހުރިހާ ކަސްޓަމަރުންނަށް ބައިވެރިވެވޭ ޕްރޮގުރާމެކެވެ. މި ޕްރޮގުރާމުގައި ބީއެމްއެލްގެ ޕޮސް މެޝިންތަކުން ކުރާ މުއާމަލާތްތަކުން ބެންކަށް ލިބޭ ފައިދާގެ ވަކި އަދަދެއް ތިމާވެށި ރައްކާތެރިކުރުމަށް ހޭދަކުރާނެ އެވެ.

މި އިނީޝިއޭޓިވްއާ ގުޅޭ ގޮތުން ވާހަކަ ދައްކަވަމުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޝަރީފު ވިދާޅުވީ ރާއްޖޭގެ ކޮންމެ ރަށެއްގައި ހުރެގެން ވެސް އެ ޕްރޮގްރާމްގައި ބައިވެރިވެވޭނެ ކަމަށެވެ.

"ޖުލައި އެކަކުން ފެށިގެން ކާޑު މެޝިނުން ފައިސާގެ މުއާމަލާތް ކުރުމުން ކަސްޓަމަރުންނަށް ސީދާ ގޮތުން ތިމާވެށި ހިމާޔަތް ކުރުމުގެ މަސައްކަތްތަކުގައި ބައިވެރިވެވޭނެ. މިއީ ދިވެހިންނާއި ޓޫރިސްޓުންނަށް ވެސް ތިމާވެށި ހިމާޔަތް ކުރުމުގެ މަސައްކަތުގައި ބައިވެރިވެވޭ ގޮތަށް ފަރުމާކޮށްފައިވާ ޕްރޮގުރާމެއް،" ޝަރީފު ވިދާޅުވި އެވެ.

އޭނާ ވިދާޅުވީ އެ ޕްރޮގުރާމުން އެއްވެސް މާޗަންޓެއް ނުވަތަ ކަސްޓަމަރެއްގެ އަތުން އިތުރު ފީއެއް ނުނަގާނެ ކަމަށެވެ.

"މިއީ ހަމައެކަނި ޕޮސް މެޝިން މުއާމަލާތްތަކުން ބެންކަށް ލިބޭ އާމްދަނީން ހޭދަ ކުރާ އިނީޝިއޭޓިވްއެއް." ޝަރީފް ވިދާޅުވި އެވެ.

އޭނާ ވިދާޅުވީ ތިމާވެށި ރައްކާތެރިކުރަން ގައުމީ ފެންވަރުގައި ކުރާ މަސައްކަތްތަކުގައި ބައިވެރިވުމަކީ އެ ބެންކުގެ ޒިންމާއެއްގެ ގޮތުގައި ދެކެވަޑައިގަންނަވާ ކަމަށެވެ. އަދި ރާއްޖޭގެ ނާޒުކު ތިމާވެއްޓަކީ ދިރިއުޅުމުގެ މުހިންމު އަސާސެއް ކަމަށާއި ކުރިއަށް އޮތް ޖީލާ ހަމައަށް ރާއްޖޭގެ ގުދުރަތީ ރީތިކަން ފޯރުކޮށްދެވޭނީ ތިމާވެށި ހިމާޔަތް ކޮށްގެން ކަމަށް ވިދާޅުވި އެވެ.

އެމްޑީ ވިދާޅުވި ގޮތުގައި މި އިނީޝިއޭޓިވް އިން ހަރަދު ކުރާނީ އިތުބާރު ހިފޭ، ތަޖުރިބާ ހުރި އެކި ޖައްމިއްޔާތަކާއި ބައިވެރިންނާއި އެކު ތިމާވެށި ރައްކާތެރިކުރުމުގެ މަސައްކަތްތަކަށެވެ. އެގޮތުން ރަށްތަކުން ބޭނުން ކޮށްފައިވާ ޕްލާސްޓިކް ކުނިތަކާއި ފުޅި ރީސައިކަލް ކުރުމާއި އަލުން އެކްސްޕޯޓުކުރުމާއި ގަސް އިންދުމާއި ކުނި މެނޭޖުކުރުމާއި އެކި ޓްރީޓްމަންޓު ސޮލިއުޝަންތައް ހޯދާ ދިނުން ފަދަ ޕްރޮޖެކްޓުތަކަށް ހޭދަކުރަން ހަމަޖެހިފައިވާ ކަމަށް ވިދާޅުވި އެވެ.

ބެންކުން ކުރިއަށް އޮތް ތަނުގައި ތައާރަފްކުރާ ކްރެޑިޓް އަދި ޑެބިޓް ކާޑު ހަދާނީ ރާއްޖެ އިން އެކްސްޕޯޓުކޮށް ރީސައިކަލް ކުރެވޭ ޕްލާސްޓިކް ބޭނުން ކޮށްގެން ކަމަށް ވެސް ޝަރީފު ވިދާޅުވި އެވެ.

ބީއެމްއެލް އިން އިފުތިތާހު ކުރި ހާއްސަ އިނިޝިއޭޓިވްއާ ގުޅިގެން ކާޑު މެޝިނު ބޭނުން ކުރާ މިންވަރު އިތުރު ކުރުމަށް ހިތްވަރު ދިނުމުގެ ގޮތުން ހާއްސަ ޕްރޮމޯޝަންތަކެއް ވެސް އެ ބެންކުން ވަނީ އިއުލާނުކޮށްފަ އެވެ.

ކާޑު މެޝިން މެދުވެރިކޮށް އެމެކްސް ކާޑުގެ މުއާމަލާތްތައް ކުރާ ކަސްޓަމަރުންގެ ތެރެއިން ދެ ކަސްޓަމަރަށް އިތުރު މީހަކާ އެކު ސިންގަޕޫރުގައި އޮތް ފޯމިއަލާ ވަން ބަލާލުމުގެ ފުރުސަތު ލިބޭ ޕްރޮމޯޝަނެއް ޖުލައި މަހުގެ 1 އިން 31 އަށް ކުރިއަށް ގެންދިއުމަށް ވަނީ އިއުލާނުކޮށްފަ އެވެ. އަދި އޮގަސްޓު މަހުގެ އެކަކުން ފެށިގެން ތިން މަސް ދުވަހުގެ މުއްދަތުގެ ތެރޭގައި މާސްޓަކާޑް ބޭނުން ކޮށްގެން ދެ ކަސްޓަމަރަކަށް އިތުރު މީހަކާ އެކު އޮސްޓްރޭލިއަން އޯޕަން އަށް ދިއުމުގެ ފުރުސަތު ދޭ ޕްރޮމޯޝަނެއް ވެސް ވަނީ އިއުލާންކޮށްފަ އެވެ.

"އީއެންވީ ޕޮސް" ޕްރޮގުރާމަކީ ދިގު މުއްދަތުގެ ދެމެހެއްޓެނިވި މަސައްކަތެއް ކުރެވޭނެ ޕްރޮގުރާމެއްގެ ގޮތުގައި ބޭންކުން ދެކެ އެވެ.