ރާއްޖޭގެ ޓޫރިޒަމް ޕްރޮމޯޓްކުރާ ކުންފުނި، ވިޒިޓް މޯލްޑިވްސްގެ ރަސްމީ ވޮލެޓުގެ ގޮތުގައި ބީއެމްއެލްގެ ޑިޖިޓަލް ވޮލެޓް ސްވައިޕް މިއަދު ހަމަޖައްސައިފި އެވެ.
އެ ބޭންކުގެ ހެޑް އޮފީހުގައި ބޭއްވި ރަސްމިއްޔާތެއްގައި ސްވައިޕް އަދި ވިޒިޓް މޯލްޑިވްސްއާ ދެމެދު ސްޓްރެޓިޖިކް އެއްބަސްވުމުގައި ބީއެމްއެލްގެ ސީއީއޯ މުހައްމަދު ޝަރީފު އަދި ވިޒިޓް މޯލްޑިވްސްގެ މެނޭޖިން ޑިރެކްޓަރ އިބްރާހީމް ޝިއުރީ ވަނީ ސޮއިކުރައްވައިފަ އެވެ.
އެ އެއްބަސްވުމާއެކު ރާއްޖެ އަންނަ ފަތުރުވެރިންނަށް، އެންމެ ފަހުގެ ޓެކްނޮލަޖީގެ އެހީގައި ތަޖުރިބާ އިތުރަށް ފުރިހަމަކުރުވޭނެ ކަމަށް ބީއެމްއެލް އިން ބުންޏެވެ.
ސްވައިޕަކީ ސަަތޭކަ ޕަސެންޓު ދިވެހި އުފެއްދުމެކެވެ. އިންޓަނޭޝަނަލް މިންގަނޑުތަކާ އެއްގޮތަށް އެ ވޮލެޓު ތައާރަފްކުރީ މިދިޔަ އަހަރުގެ އޮކްޓޯބަރު މަހުގެ ތެރޭގަ އެވެ.
އެ ވޮލެޓް މެދުވެރިކޮށް ރާއްޖެއާއި ރާއްޖެއިން ބޭރުގެ މުއާމަލާތްތައް ކުރެވޭނެ އެވެ. އަދި ބީއެމްއެލް އެކައުންޓްތަކުގެ އިތުރުން ކޮންމެ ކްރެޑިޓް، ޑެބިޓް އަދި ޕްރިޕެއިޑް ކާޑަކުން ވެސް ސްވައިޕް ވޮލެޓަށް ފައިސާ ޖަމާކުރެވޭނެ އެވެ.