އެމްއައިބީ ގެސްޓްހައުސް ސިމްޕޯޒިއަމްގައި، ގެސްޓް ހައުސް ޗެމްޕިއަންކަމަށް ހޮވޭ ރަށަކަށް 500،000ރ. ގެ އަގުހުރި ޕްރޮޖެކްޓެއް ހިންގުމުގެ ފުރުސަތު ދިނުމަށް އެ ބޭންކުން ނިންމައިފި އެވެ.
މި އިނާމު ލިބޭ ރަށް އިއުލާންކުރާނީ އެ ސިމްޕޯޒިއަމްގައި ބާއްވާ ގެސްޓް ހައުސް އެވޯޑުގަ އެވެ. މި އެވޯޑަށް ކުރިމަތިލުމުގެ ފުރުސަތު މިދިޔަ މަހުގެ 15 ވަަނަ ދުވަހު ހަމަވި އިރު އެކަމަށް ބޮޑު ތަރުހީބެއް ލިބިފައިވާކަން އެމްއައިބީން ވަނީ ފާހަގަކޮށްފަ އެވެ.
މި އެވޯޑް ލިބޭ ރަށަކަށް ދޭ ފައިސާއިން އެ ރަށުގެ ރައްޔިތުންނަށް އަދި ޒިޔާރަތްކުރާ މެހެމާނުންނަށް ފައިދާވާނެ ޕްރޮޖެކްޓަކަށް ޕްރޮޕޯސަލް ހުށަހެޅުމުގެ ފުރުސަތު ލިބޭނެ ކަމަށް އެމްއައިބީން ބުންޏެވެ. އެމްއައިބީން ބުނީ އެވޯޑު ކާމިޔާބު ކުރާ ރަށަކަށް، ޖުމްލަ 500،000ރ. އާ ހަމަޔަށް ދޭއިރު، އެ ފައިސާއިން ހިންގާ ޕްރޮޖެކްޓަކީ ރަށުގެ ރައްޔިތުނާއި މެހެމާނުންނަށް އިތުރު ލުއިފަސޭހަކަން ނުވަތަ ހިތްފަސޭހަކަން ލިބިގެންދާނެ ކަމަށް ޕްރޮޖެކްޓަކަށް ވާންޖެހޭނެ ކަމަށެވެ.
އެމްއައިބީއިން އިސްނަގައިގެން ކުރިޔަށް ގެންދާ ގެސްޓް ހައުސް ސިމްޕޯޒިއަމް އަދި އެވޯޑު ހަފްލާ އޮންނާނީ މި މަހުގެ 15 ވަނަ ދުވަހު ބާސެލޯ ނަސަންދުރާގަ އެވެ.