އެކި މީހުންގެ ހަމުގެ ކުލަ އަށް ހާއްސަކޮށްގެން އިނގިރޭސިވިލާތުގެ ކުންފުނި ޓެސްކޯ އިން ބޭސްމަލަންތަކެއް ނެރެފި އެވެ.
ހޯމަ ދުވަހު މިކަން އިއުލާނުކުރަމުން އެ ކުންފުނިން ބުނީ އަލަށް ނެރުނު ބޭސްމަލަން ކަލެކްޝަނަކީ މައިގަނޑު ތިން ޝޭޑަކަށް ތައްޔާރުކުރި އެއްޗެއް ކަމަށެވެ. އޭގެ ތެރޭގައި ހިމެނެނީ ލައިޓް، މީޑިއަމް އަދި ޑާކެވެ. މީގެ މާނަ އަކީ ޓެސްކޯގެ ބޭސްމަލަނުގައި ކޮންމެ މީހެއްގެ ހަމުގެ ކުލައާ ވެސް ގުޅޭ ބޭސްމަލަން މިހާރު ލިބޭނެއޭ އެވެ. މީގެ ނަތީޖާ އަކީ ބޭސްމަލަންކޮޅެއް ޒަހަމެއްގައި އަޅާފައި ހުއްޓަސް އެކަން ފާހަގަނުކުރެވުމެވެ.
ޓެސްކޯ އިން ބުނީ އަލަށް ތައާރަފުކުރި ބޭސްމަލަން މިހާރު އެ ކުންފުނިން ދުނިޔޭގެ އެކި ކަންކޮޅުތަކުގައި ހިންގާ 741 އައުލެޓުންނާއި އޮންލައިންކޮށް ވެސް ގަންނަން ލިބޭނެ ކަމަށެވެ. މީގެ ފޮއްޓެއްގެ އަގަކީ 1 ޕައުންޑް (1.29 ޑޮލަރު) އެވެ. ކޮންމެ ފޮށްޓެއްގައި 40 މަލަންކޮޅު އޮންނާނެ އެވެ.
ޓެސްކޯ އިން ބުނިގޮތުގައި އެކި ކުލައިގެ ހަމަށް ހާއްސަކޮށްގެން ބޭސްމަލަން ނެރެން ނިންމީ އެކަމަށް ވަރަށް ގިނަ ބަޔަކު އެދެމުން ވެސް ދާތީ އެވެ. އަދި މި އުފެއްދުމަކީ ކުލައިގެ ސަބަބުން ކުރިމަތިވާ ތަފާތުކުރުންތަކަށް އެހީއަކަށް ވާނެ ކަމަށް ބުންޏެވެ.
ޓެސްކޯގެ ހެލްތު، ބިއުޓީ އެންޑް ވެލްނެސް ޑިރެކްޓަރު ނިކޮލާ ރޮބިންސަނޖް ވިދާޅުވީ ވިޔަފާރި ކުންފުންޏެއްގެ ހައިސިއްޔަތުން ޓެސްކޯ އަކީ ޑައިވަސިޓީ އަށް މަރުހަބާކިޔާ ކުންފުންޏެއްކަން ކަސްޓަމަރުންނަށް ސާބިތުކޮށްދޭން ޖެހޭ ކަމަށެވެ.
"އަހަރެމެންގެ ހިދުމަތަކީ ހުރިހާ ބަޔަކަށް ހާއްސަ ހިދުމަތެއް. މީގައި ކުލައެއް، ނަސްލެއް ތަފާތުކުރުމެއް ނޯންނާނެ." އޭނާ ވިދާޅުވި އެވެ. "އަލަށް ނެރުނު ބޭސްމަލަނުން ދައްކުވައިދޭނީ އެކަން."