މިނިސްޓްރީތަކާއި ސަރުކާރުގެ އޮފީސްތަކުގެ ބިޑް ކޮމިޓީތަކުގެ މެމްބަރުކަމަށް، ސިޔާސީ ބޭފުޅުންނާއި އިންތިޚާބީ މަގާމުތަކުގައި ތިބޭ މީހުން އައްޔަން ނުކުރެވޭނެ ކަމަށް ޕްރޮކިއުމަންޓް ޕޮލިސީ ބޯޑުން މިއަދު ނިންމައިފި އެވެ.
މާލިއްޔަތު ގަވާއިދުގައި ބުނެފައިވާގޮތުގައި ބިޑް ކޮމިޓީތައް އުފައްދައި އެ ކޮމިޓީތަކަށް މެމްބަރުން އައްޔަން ކުރާނީ މިނިސްޓަރުންނެވެ. ނަމަވެސް މި ކޮމިޓީ އަށް ސިޔާސީ މުވައްޒަފުން އައްޔަން ނުކުރެވޭނެ ކަމަކަށް ގަވާއިދުގައި ބުނެފައެއް ނޯވެ އެވެ. އެހެންވެ، ގިނަ ބިޑް ކޮމިޓީތަކުގެ ޗެއާކަން ވެސް ކުރައްވަނީ ސިޔާސީ ބޭފުޅުންނެވެ.
ބިޑް ކޮމިޓީތަކުގައި ސިޔާސީ ބޭފުޅުން ތިއްބެވުމުގެ ސަބަބުން މިނިސްޓްރީތަަކުގެ ވަޒީރުންގެ ނުފޫޒު ފޯރާ ކަމުގެ ތުހުމަތުތައް ކުރެ އެވެ. އެގޮތުން، ނުފޫޒު ފޯރުވުން ކުޑަކުރުމަށްޓަކައި މާލިއްޔަތު ގަވާއިދަށް ބަދަލު ގެންނާނެ ކަމަށް މީގެ ކުރިން ފިނޭންސް މިނިސްޓަރު އަދި ޕްރޮކިއުމަންޓް ޕޮލިސީ ބޯޑުގެ ޗެއާޕާސަން އިބްރާހިމް އަމީރު ވަނީ ވިދާޅުވެފަ އެވެ.
މިދިޔަ މަހު "މިހާރު" އަށް ދެއްވި އިންޓަވިއުއެއްގައި އަމީރު ވިދާޅުވީ މި ބަދަލާއެކު ބިޑް ކޮމިޓީތަކަށް ސިޔާސީ ނުފޫޒު ފޯރުވުން ކުޑަކުރެވޭނެ ކަމަށެވެ. އަދި ބިޑް ކޮމިޓީތަކުން ސިޔާސީ ބޭފުޅުންނަށް ފުރުސަތު ނުދޭން ނިންމަވާއިރު، ކަމުގެ ފަންނީ ބޭފުޅުން ނެތުމުގެ މައްސަލަ ބައެއް ރަށްރަށުގައި ކުރިމަތި ވެދާނެތީ އެކަމާ މިހާރު ވެސް ވާހަކަ ދައްކަވަމުން ގެންދަވާ ކަމަށް މިނިސްޓަރު ވިދާޅުވި އެވެ.
"އަޅުގަނޑުގެ ވިސްނުން އެބަހުރި ރަށެއްގެ ރަށު ކައުންސިލްގެ ބިޑް ކޮމިޓީ ހަދާއިރު، އެ ރަށެއްގެ ސިވިލް ސާވިސްގެ ހުރިހާ އިދާރާއެއް އެއްކޮށްލައިގެން ވެސް ބިޑް ކޮމިޓީއެއް ހެދިދާނެއޭ. މިސާލަކަށް ސިއްހީ މަރުކަޒާއި ސްކޫލް ފަދަ ތަންތަނުގައި އުޅުއްވާ ބޭފުޅުން ހިމެނިދާނެ،" އަމީރު ކުރިން ވިދާޅުވި އެވެ.
ފިނޭންސް މިނިސްޓްރީން ވަނީ ސަރުކާރުގެ އޮފީސްތަކުގެ މާލީ ކަންކަން ބެލެހެއްޓުމަށްޓަކައި، "ޗީފް އެކައުންޓްސް އެގްޒެކެޓިވް" ގެ ނަމުގައި ހާއްސަ މަގާމެއް ވެސް މިހާރު އުފައްދައިފަ އެވެ. މި މަގާމަށް މީހުން ހޮވުމާއި އައްޔަންކުރުމުގައި އަމަލުކުރާނީ ސީއެސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާ އުސޫލުތަކާ އެއްގޮތަށެވެ.