ރިހިވެލި ރިސޯޓު ކުއްޔަށް ދީފައިވާ ކުންފުނީގެ އަތުން އެ ރަށް އަތުލަން އެރަށުގެ ވެރި ފަރާތް، މާހަލް އިން އަނެއްކާވެސް ކޯޓަށް ހިނގައްޖެ އެވެ.
މިފަހަރު ރަށުގެ ވެރިންނާއި މައްސަލަ ޖެހިފައިވަނީ ސޭވް ދަ ޑްރީމް ފްރާންސް ނަމަކަށް ކިޔާ ކުންފުންޏަކާ އެވެ. ކ. މަހާނައެޅިހުރާގައި ހިންގަމުން އަންނަ ރިހިވެލި ރިސޯޓަކީ މާހަލް ޓުއާސް މޯލްޑިވްސް ކިޔާ ކުންފުންޏަކަށް ސަރުކާރުން ދޫކޮށްފައިވާ ރަށެކެވެ.
އެ ރަށް ހިންގަމުން އައި ކާސްޓަވޭ މޯލްޑިވްސްއާ އެކު ކުންފުނިން ވެފައިވާ އެއްބަސްވުން ޖެނުއަރީ 2، 2018 ގައި ބާތިލް ކުރުމަށް ފަހު އެ އަހަރުގެ ފެބްރުއަރީ 15 ގައި ސޭވް ދަ ޑްރީމާއި ހަވާލު ކުރި އެވެ. އޭރު އެއްބަސްވެފައި ވަނީ 2042 ވަނަ އަހަރާ ހަމަޔަށް ސޭވް ދަ ޑްރީމަށް އެރަށް ސަބްލީސް ކުރާށެވެ.
މައުލޫމާތު ލިބިފައިވާ ގޮތުގައި މިކަމުގައި އަނެއްކާވެސް މާހަލް އިން ސޭވް ދަ ޑްރީމާ މެދު ހިތްހަމަ ނުޖެހިގެން އެގްރީމެންޓް ބާތިލް ކުރަން ވަނީ ނިންމައިފަ އެވެ. އެގޮތުން އެ މައްސަލަ މިހާރު ވަނީ ސިވިލް ކޯޓަށް ހުށަހަޅައިފަ އެވެ. އެގްރީމަންޓް ބާތިލް ކުރަން ހުށަހެޅުމުން ސޭވް ދަ ޑްރީމް އިން ވެސް ވަނީ މައްސަލައެއް ކޯޓަށް ވައްދައިފަ އެވެ. އެއީ ކާސްޓަވޭއާ އެކު ކޯޓުގެ މަރުހަލާތައް ފުރިހަމަ ނުވަނީސް އެ ކުންފުންޏާ މެދު ގޮތެއް ކަނޑަ ނޭޅޭނެ ކަމަށް ބުނެ ހުށަހަޅާފައިވާ މައްސަލަ އެކެވެ. މާހަލް އިން ވަނީ ސޭވް ދަ ޑްރީމް އިން ވެއްދި މައްސަލައާ ގުޅިގެން އިޖުރާއީ ނުކުތާއެއް ހުށަހަޅައިފަ އެވެ.
އެ އިޖުރާއީ ނުކުތާގައި ބުނެފައި ވަނީ އެގްރީމަންޓް ޓާމިނޭޝަން ނޯޓިސް އަކީ މާހަލް ޓުއާސް މޯލްޑިވްސް އިން ސޭވް ދަ ޑްރީމަށް ފޮނުވާފައިވާ ނޯޓިސްއެއް ކަމުން، އެ ކުންފުނިން ސޭވް ދަ ޑްރީމަށް ޖަވާބުދާރީ ވާންޖެހޭނެ އެއްވެސް ގާނޫނީ ހަމައެއް ނެތް ކަމަށެވެ. އެހެން ނަމަވެސް ސިވިލް ކޯޓުން މި މަހުގެ 15 ގައި ވަނީ މާހަލް ޓުއާސްގެ މި އިޖުރާއީ ނުކުތާ ބަލައި ނުގަންނަން ނިންމައިފަ އެވެ.
މާހަލް ޓުރާސް އާއި ސޭވް ދަ މޯލްޑިވްސްއާ ދެމެދު އެގްރީމަންޓްގެ މިފަދަ މައްސަލައެއް ޖެހުނު އިރު މީގެ ކުރިން ކާސްޓަވޭ މޯލްޑިވްސް އާއި މާހަލް ޓުއާސްއާ ދެމެދު ވެސް ޖެހިފައި ވަނީ ހަމަ މިފަދަ މައްސަލައެކެވެ. އެގޮތުން ކާސްޓަވޭ އާއި ދެމެދު 2014 ވަނަ އަހަރު ހެދި އެގްރީމެންޓް ކޯޓަށް ގޮސް ބާތިލްކޮށް، ކާސްޓްއަވޭ ކުންފުނި އަތުން އެރަށް އަތުލައިފައިވެ އެވެ.
މި މައްސަލައިގައި އޭރު ހައި ކޯޓުގެ ހުކުމުގައި ވަނީ ސަބް ލީސް އެއްބަސްވުމުގެ ދަށުން ކާސްޓްއަވޭ ކުންފުނިން ދައްކަން ޖެހޭ ފައިސާ ގަވާއިދުން ދައްކަމުން ގޮސްފައިނުވާކަން ދެ ފަރާތުން ދެއްކި ވާހަކަތަކުން އެނގޭ ކަމަށާއި ހެޑް ލީސް ރެންޓާއި ސަބް ލީސް ރެންޓް އެއްބަސްވުމާ އެއްގޮތަށް ނުދައްކައިފި ނަމަ އެއީ އެއްބަސްވުން ބާތިލް ކުރެވިދާނެ ހާލަތެއްކަން އެއްބަސްވުމުން އެނގޭ ކަމަށެވެ.
