ޓޫރިޒަމް ދާއިރާގެ 8،800 މުވައްޒަފުންނަށް ވެކްސިން ދީފި

ރިސޯޓު މުވައްޒަފަކު ވެކްސިން ޖެހުމަށް ރަޖިސްޓްރީ ކުރަނީ-- ފޮޓޯ: ޓޫރިޒަމް މިނިސްޓްރީ

އިދުހާމް ނައީމް، މިހާރު

05 މާޗް 2021 - 19:15

ޓޫރިޒަމް ދާއިރާގައި ކުރީ ސަފުގައި މަސައްކަތް ކުރާ 8،800 މުވައްޒަފުންނަށް މިހާތަނަށް ކޮވިޑް-19 ވެކްސިން ދީފައިވާ ކަމަށް ޓޫރިޒަމް މިނިސްޓްރީން މިއަދު ބުނެފި އެވެ.

އެ މިނިސްޓްރީން ކުރި ޓްވީޓެއްގައި ބުނީ މިހާތަނަށް ވެކްސިން ދިނީ މުޅި އިންޑަސްޓްރީގެ ފްރޮންޓްލައިން މުވައްޒަފުންގެ ތެރެއިން 30 ޕަސެންޓަށް ކަމަށެވެ.

މީގެ އިތުރުން ރާއްޖެއަކީ މިހާތަނަށް ޓޫރިޒަމް ދާއިރާގެ ހުރިހާ މުވައްޒަފުންނަށް ހަމަހަމަ ކަމާއެކު ވެކްސިން ޖެހުމުގެ ފުރުސަތު ދޭ ފުރަތަމަ ގައުމުކަމަށް ވެސް އެ މިނިސްޓްރީން ވަނީ ފާހަގަކޮށްފަ އެވެ.

With over 8,800 (30%) of tourism frontline team vaccinated already, #Maldives is on track to be among the first countries to give COVID19 vaccination opportunity to all working in the tourism sector.
— Ministry of Tourism (@MoTmv) March 5, 2021

ޓޫރިޒަމް މިނިސްޓްރީން މިއަދު ކުރި ޓްވީޓު

ޓޫރިޒަމް މިނިސްޓްރީ އާއި އެޗްޕީއޭ ގުޅިގެން ރިސޯޓުތަކުގައި ވެކްސިން ދޭން ފަށައިފައިވަނީ މިދިޔަ މަހުގެ 14 ވަނަ ދުވަހު އެވެ. އެގޮތުން، އެންމެ ފުރަތަމަ ވެކްސިން ދޭ ސެންޓަރެއް ހުޅުވީ ބަނޑޮހުގަ އެވެ.

ސަރުކާރުން ވަނީ ރާއްޖެއަށް އެންމެ ފުރަތަމަ ގެނައި ވެކްސިންގެ 10،000 ޑޯޒު ޓޫރިޒަމް ދާއިރާގައި މަސައްކަތް ކުރާ މުވައްޒަފުންނަށް ހާއްސަކޮށްފަ އެވެ. މީގެ ތެރޭގައި ރިސޯޓުތަކުގައި މަސައްކަތް ކުރާ މުވައްޒަފުންގެ އިތުރުން ގެސްޓް ހައުސްތަކާއި ލިވަބޯޑުތަކާއި އެއާޕޯޓުގައި މަސައްކަތް ކުރާ ރެޕުން ވެސް ހިމެނެ އެވެ.

މިހާތަނަށް ރާއްޖޭގެ 137،124 މީހަކަށް ވަނީ ކޮވިޑް-19ގެ ވެކްސިންގެ ފުރަތަމަ ޑޯޒު ޖަހައިފަ އެވެ. މީގެ ތެރޭގައި މާލެ ސަރަަހައްދުގައި ދިރިއުޅޭ 84،891 މީހުންނާއި އަތޮޅު ތެރޭގެ 52،233 މީހުން ހިމެނެ އެވެ.

އެޗްޕީއޭ އިން މިހާރު ވަނީ 20 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލައިފަ އެވެ.