ބޭރުގެ 100 ޕަސެންޓު ހިއްސާ އޮންނަ ކުންފުނިތަކަށް ރާއްޖޭގައި އެއާޕޯޓު ހިންގޭ ގޮތަށް ފޮރިން ޑައިރެކްޓް އިންވެސްޓްމަންޓް ޕޮލިސީ (އެފްޑީއައި) މިއަދު އިސްލާހު ކޮށްފި އެވެ.
އިކޮނޮމިކް މިނިސްޓްރީން މިދިޔަ އަހަރު ނެރުނު ޕޮލިސީގައި ބުނެފައިވާ ގޮތުގައި ރާއްޖޭގައި ފްރައިޓް ސާވިސްއާއެކު އެއާ ޓްރާންސްޕޯޓުގެ ހިދުމަތް ދެވޭނީ ބޭރުގެ 75 ޕަސެންޓު ހިއްސާ އޮންނަ ކުންފުނިތަކަށެވެ. އެ ކުންފުންޏަކުން ފަސް އަހަރުގެ ދުވަހުގެ ތެރޭގައި މަދުވެގެން ފަސް މިލިއަން ޑޮލަރުގެ އިންވެސްޓްމަންޓެއް ރާއްޖޭގައި ކުރަން ޖެހޭނެ ކަމަށް ވަނީ ބުނެފަ އެވެ.
ނަމަވެސް އިކޮނޮމިކް މިނިސްޓްރީން މިއަދު ގެޒެޓުކުރި އިސްލާހުގައި ބުނެފައިވާ ގޮތުގައި ފްރައިޓް ސާވިސް ނުހިމެނޭހެން ރާއްޖޭގައި އެއާ ޓްރާންސްޕޯޓުގެ ހިދުމަތް ބޭރުގެ 100 ޕަސެންޓު ހިއްސާވާ ކުންފުނިތަކަށް ދެވޭނެ އެވެ. ނަމަވެސް ކުރިން އޮތް ގޮތަށް އެ ކުންފުންޏަކުން ރާއްޖޭގައި ފަސް އަހަރު ދުވަހުގެ ތެރޭގައި މަދުވެގެން ފަސް މިލިއަން ޑޮލަރުގެ އިންވެސްޓްމަންޓެއް ކުރަން ޖެހޭނެ އެވެ.
މި އިސްލާހުގައި ބުނެފައި ވަނީ، އެ ކުންފުނިތަކަށް ރާއްޖޭގައި އެއާޕޯޓު ހިންގުމާއި އެއާޕޯޓު އަދި އެއާ ޓްރެފިކް ކޮޮންޓްރޯލް ކުރުމާއި ގްރައންޑް ސާވިސް ހިދުމަތް ވެސް ފޯރުކޮށްދެވޭނެ ކަމަށެވެ.
މި އިސްލާހަށް މިއަދުން ފެށިގެން އަމަލު ކުރަން ފަށާނެ އެވެ.
އެފްޑީއައި ޕޮލިސީއަށް އިކޮނޮމިކް މިނިސްޓްރީން ބަދަލު ގެނެސްފައިވާއިރު، ހަނިމާދޫ އެއާޕޯޓު ހިންގަން އިންޑިއާގެ ކުންފުންޏަކާ ހަވާލު ކުރުމަށް ސަރުކާރުން މަސައްކަތް ކުރާ ވާހަކަތައް ދަނީ ދެއްކެވެމުންނެވެ. ހަނިމާދޫ އެއާޕޯޓު ތަރައްގީ ކުރުމަށް އިންވެސްޓު ކުރަނީ ވެސް އިންޑިއާގެ އެގްޒިމް ބޭންކުންނެވެ.