ނ. ވިހަފަރުގައި އެއާޕޯޓު އެޅުމަށް ބޭނުންވާ ބިން ހިއްކަން މިއަދު ފަށައިފި އެވެ.
އެ ތަނުން ހިއްކާފައިވާ ކުޑަ ބިމުގައި ބޭއްވި ހަފުލާއެއްގައި، 42 ހެކްޓަރުގެ ބިން ހިއްކުން ފައްޓަވައި ދެއްވީ އިކޮނޮމިކް މިނިސްޓަރު މުހައްމަދު ސައީދު އަދި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ.
އެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގެންނެވި އެވެ.
އިކޮނޮމިކް މިނިސްޓްރީން ބުނީ ވެލިދޫއާ ކައިރީގައި އޮންނަ ބިން ހިއްކާނީ 1.6 މީޓަރުގެ އުސްމިނުގައި ކަމަށެވެ.
އާބާދީގައި 12،503 މީހުން ދިރިއުޅޭ ނ. އަތޮޅުގައި މި ވަގުތު ވެސް އިންޓަނޭޝަނަލް އެއާޕޯޓެއް އެބައޮތެވެ. އެ އަތޮޅު މާފަރުގައި ހިންގަނީ މިހާރު އެންމެ ގިނަ ޖެޓު ޖައްސާ އެއާޕޯޓެވެ.
ވިހަފަރު އެއާޕޯޓަކީ ނ. އަތޮޅުގެ ހުޅަނގު ބިތުގައި ދިރިއުޅޭ މީހުންނަށް ހާއްސަކޮށްގެން އަޅާ ތަނެކެވެ.
ބޮޑު ހަރަދެއް ކޮށްގެން ވިހަފަރުގައި އެއާޕޯޓެއް އަޅަން ފެށިއިރު، ގައުމީ އެއާލައިން މޯލްޑިވިއަނުން މި ފަހުން ވަނީ ވެލިދުއަށް ސީޕްލޭންގެ ދަތުރުތައް ފަށައިފަ އެވެ.
މިދިޔަ އަހަރުގެ ޖުލައި މަހު ނ. އަތޮޅަށް ކުރެއްވި ދަތުރުފުގައި ރައީސް މުއިއްޒު ވިދާޅުވީ ވެލިދޫ ކައިރީގައި އޮންނަ ވިހަފަރު ފިނޮޅުގައި އެއާޕޯޓެއް ހެދުމުގެ މަސައްކަތް ބާރު ސްޕީޑުގައި ނިންމުމަށް ކަނޑައަޅާފައި ވިޔަސް، ވެލިދު އަށް ހާއްސަ ކޮށްގެން ސީޕްލޭންގެ ހިދުމަތް ފަށަން ނިންމާފައިވާ ކަމަށެވެ.
އޭގެ އިތުރުން ވިހަފަރު އެއާޕޯޓަކީ އެ އަތޮޅާއި ޓޫރިޒަމް ތަރައްގީކުރަން އިންވެސްޓުކުރާ ފަރާތްތަކަށް ވަރަށް ފައިދާވާނެ ކަމެއް ކަމަށް ވެސް އެ މަނިކުފާނު ވިދާޅުވެފައި ވެ އެވެ.