ރާއްޖޭގައި ހިންގާ ވިޔަފާރީގެ އެއްވެސް މުއާމަލާތެއްގައި ކްރިޕްޓޯ ކަރަންސީ ބޭނުން ކުރުމަކީ ގާނޫނީ ގޮތުން ތަންދޭ ކަމެއް ނޫން ކަމަށް މަރުކަޒީ ބޭންކް، އެމްއެމްއޭ އިން ބުނެފި އެވެ.
ކްރިޕްޓޯގެ މުއާމަލާތްތައް ރާއްޖޭގައި ނުފެށޭނެ ކަމަށް އެމްއެމްއޭ އިން މި ބުނީ އެސް ހޮޓެލްސް އިން ކްރޮސްރޯޑްސް ގައި ހިންގާ ދެ ރިސޯޓު ކަމަށްވާ ހާޑްރޮކް މޯލްޑިވްސް އާއި ސާއި ލެގޫން އިން ކްރިޕްޓޯ ކަރަންސީ ބަލައިގަންނަ ކަން އިއުލާނުކޮށްފައި ވަނިކޮށެވެ.
މިކަމުގައި އެމްއެމްއޭ އިން އަމަލުކުރަނީ ކޮން ގޮތަކަށް ކަމެއް އަދި ސާފެއް ނުވެ އެވެ. އެކަމަކު އެ އިދާރާ އިން ބުނީ ކްރިޕްޓޯ ކަރަންސީގެ އެއްވެސް ބާވަތެއް ރާއްޖޭގައި ބޭނުން ނުކުރެވޭނެ ކަމަށެވެ.
މީގެ ކުރިން 2018 ވަނަ އަހަރު ވެސް އެމްއެމްއޭން ވަނީ ކްރިޕްޓޯ ކަރަންސީ ގަނެ ވިއްކުމާއި އެއިން މުއާމަލާތުކުރުމަކީ މަނާ ކަމެއް ކަން އިއުލާންކޮށްފަ އެވެ.
ޑިޖިޓަލް ކަރަންސީއަށް ދުނިޔޭގައި މަގްބޫލުކަން އިތުރުވަމުން ދިޔަ ނަމަވެސް އަދި ވެސް ގިނަ ގައުމުތަކަކުން މިގޮތަށް ވިޔަފާރީގެ މުއާމަލާތްތައް ކުރަން ރަސްމީކޮށް ހުއްދައެއް ނުދެ އެވެ. ޗައިނާއިން ވަނީ ކްރިޕްޓޯ ކަރެންސީ ބަލައި ނުގަންނަން ނިންމައިފަ އެވެ.
ކްރިޕްޓޯ ކަރަންސީއަކީ އެއްވެސް ބައެއްގެ ކޮންޓްރޯލެއް އޮންނަ ފައިސާއެއް ނޫނެވެ. އެހެން ނަމަވެސް މިފަދަ ޑިޖިޓަލް ފައިސާއަށް އޮތް ޑިމާންޑް ބޮޑުވެ، އަގުތައް އަންނަނީ އުފުލެމުންނެވެ.
ރާއްޖޭގައި ކްރިޕްޓޯ ކަރަންސީ ބޭނުންކުރަން ފެށި އެސް ހޮޓެލްސް އަކީ ދުނިޔޭގައި ވެސް އެންމެ ފުރަތަމަ މި ފައިސާ ބަލައިގަންނަން ފެށި އެއް ހޮޓެލް ޗެއިނެވެ. މިއީ ޓޫރިޒަމް ދާއިރާގެ އާ ޖީލުތަކަށް ހިދުމަތް ދިނުމަށާއި ޓޫރިޒަމް ދާއިރާ ޒަމާނާ އެއް ފެންވަރަކަށް ކުރިއެރުވުމަށް މުހިންމު ކަމެއް ކަމަށް އެ ކުންފުނިން ނެރުނު ބަޔާނެއްގައި ބުނެފައިވެ އެވެ.
އެ ދެ ރިސޯޓުން ބަލައިގަތުމަށް ނިންމީ ޑިޖިޓަލް ފައިސާގެ ތެރެއިން "ޔޫއެސްޑީ ކޮއިން" އާއި "ޓެދާ ޓޮކެންސް" (ޔޫއެސްޑީޓީ) އެވެ. ކްރިޕްޓޯ ކަރަންސީ މަނާކަން އެމްއެމްއޭ އިން އިއުލާން މިކުރީ ކުރިއަށް އޮތް ތަނުގައި އިތުރު ޑިޖިޓަލް ފައިސާ ވެސް ބަަލައިގަންނާނެ ކަމަށް އެސް ހޮޓެލްސް އިން ބުނެފައި ވަނިކޮށެވެ.