ޖޯންގެ މިލްކިއްޔާތު 33 މިލިއަން ޑޮލަރުގައި

ބޮލީވުޑްގެ މިހާރުގެ އެންމެ ވަރުގަދަ އެކްޝަން ހީރޯއިންގެ ތެރޭގައި ހިމެނޭ އެކްޓަރު ޖޯން އަބްރަހަމްގެ މިލްކިއްޔާތު މިހާރު 251 ކްރޯޑް ރުޕީސް (32.89 މިލިއަން ޑޮލަރު) އަށް އަރާ ކަމަށް ރިޕޯޓްތައް ބުނެފި އެވެ.

ފިލްމު ކުޅުމުގެ އިތުރުން އަމިއްލައަށް ފިލްމު ޕްރޮޑިއުސް ކުރާ އެކްޓަރު އެވްރެޖްކޮށް ފިލްމެއް ކުޅެދެނީ 5-7 ކްރޯޑް ރުޕީސްއަށެވެ. އަބަދުވެސް ފުރުސަތުތައް ލިބޭ އެކްޓަރެއް ކަމަށްވާ ޖޯންއަކީ ހިތްގައިމު ލަގްޒަރީ ގެއެއް ވެސް މުމްބާއީގައި ހުންނަ ތަރިއެކެވެ. އެ ގޭގައި އޭނަގެ ވަރަށް ޕާސަނަލް، ވަރުގަދަ ޖިމެއް ވެސް ހުރެ އެވެ.

ބޮލީވުޑްގެ އެކްޓަރުންގެ ތެރެއިން ފިޓްނެސް އަށް އެންމެ ބޮޑު އިސްކަމެއްދޭ ވަރުގަދަ ހަށިގަނޑެއް ލިބިފައިވާ ޖޯން އަކީ އަމިއްލަ ވިޔަފާރި ވެސް ހިންގާ މީހެކެވެ. އޭގެ ތެރޭގައި ރެސްޓޯރަންޓަކާއި އަމިއްލަ ބްރޭންޑްގެ ސެންޓެއް ވެސް ހިމެނެ އެވެ.. ޖޯންގެ ސެންޓަކީ "ޖޯން އަބްރަހަމް ސެޑަކްޝަން" އެވެ.

މީގެ އިތުރުން ޖޯން، 49، އަކީ އަގު ބޮޑެތި ކާރުތަކާއި ވަރަށް ސްޓައިލިޝް ސައިކަލް ކަލެކްޝަނަށް ވެސް ގެންގުޅޭ ތަރިއެކެވެ. އަބަދުވެސް ބްރޭންޑެޑް ސައިކަލްތަކަށް ބޮޑު ޝައުގުވެރިކަމެއް ދޭ އެކްޓަރުގެ ސައިކަލް ކަލެކްޝަނުގައި 14 ސައިކަލް ހިމެނެ އެވެ.

މީގެ އަހަރުތަކެއް ކުރިން، އިންވެސްޓްމަންޓް ބޭންކަރެއް ކަމަށްވާ ޕްރިޔާ ރަންޗާލްއާ ކައިވެނިކުރި ޖޯން އަކީ ކިތަންމެ މަޝްހޫރު އެކްޓަރަކަށް ވިޔަސް އޭނާއަކީ ވަރަށް "ލޯ ޕްރޮފައިލް" ލައިފްސްޓައިލެއް ގެންގުޅޭ ތަރިއެކެވެ.

ދެހާސް ތިނެއްގެ "ޖިސްމު" އިން ބޮލީވުޑަށް ނުކުތް ޖޯންގެ އެންމެ ފަހުގެ ފިލްމަކީ މިދިޔަ މަހުގެ 25 ގައި ރިލީޒްކުރި "ސަތިއަމޭވް ޖަޔަތޭ 2" އެވެ. ދެން އެންމެ އަވަހަށް އޭނާ ފެންނާނީ އަންނަ މަހުގެ 28 ގައި ރިލީޒްކުރާ "އެޓޭކް" އިންނެވެ.

މިހާރު ބޮލީވުޑްގެ އެންމެ ކާމިޔާބު ޒުވާން އެކްޓަރުންގެ ތެރޭގައި ހިމެނޭ އަޔޫޝްމަން ކްރާނާ އަކީ ޖޯން 2012 ގައި ޕްރޮޑިއުސްކުރި "ވިކީ ޑޯނާ" އިން ނެރުނު އެކްޓަރެކެވެ. ޖޯންގެ ޖޭއޭ އެންޓަޓައިންމަންޓުން މިހާރު އަންނަނީ "މައިކް" އާއި "ތާރާ ވާސަސް ބިލާލް" ކިޔާ ފިލްމުތަކެއް ވެސް ހަދަމުންނެވެ.

ޖޯން ޕްރޮޑިއުސްކުރި ފިލްމުތަކުގެ ތެރޭގައި "މެޑްރާސް ކެފޭ" އަދި "ޕަރުމަނޫ: ދަ ސްޓޯރީ އޮފް ޕޮކްރާން" ހިމެނެ އެވެ.