ޕީކޭ އަށް ޝަކީރާ މަލާމާތްކުރި ލަވަޔަށް ރެކޯޑެއް

މަޝްހޫރު ލަވަކިޔުންތެރިޔާ ޝަކީރާ، އޭނާގެ ކުރީގެ ބައިވެރިޔާ ސްޕެއިންގެ ފުޓުބޯޅަ ކުޅުންތެރިޔާ ޖެރާޑް ޕީކޭއާ އަށް ރައްދު ދީ ނެރުނު ވީޑިއޯ ލަވަޔަށް ޔޫޓިއުބުގެ ރެކޯޑެއް ލިބިއްޖެ އެވެ.

"އައުޓް އޮފް ޔުއާ ލީގު" ނަން ދީފައިވާ އެ ލަވައިގެ ވީޑިއޯ ވަނީ އަޕްލޯޑް ކުރިތާ 24 ގަޑިއިރު ތެރޭ 63 މިލިއަނަށް ވުރެ ގިނަ ވިއުސް ލިބި، އެ މުއްދަތުގައި އެންމެ ގިނަ މީހުން ބެލި ލެޓިން ލަވައިގެ ރެކޯޑު މުގުރާލައިފަ އެވެ.

ލަވަކިޔުންތެރިޔާ ޝަކީރާ އަދި ފުޓު ބޯޅާ ކުޅުންތެރިޔާ ޕީކޭ

އާޖެންޓީނާގެ ޕްރޮޑިއިއުސަަރަކާ ގުޅިގެން ނެރުނު އެ ލަވަ މިހާތަނަށް 100 މިލިއަނާ ގާތްކުރާ އަދަދަކަށް މީހުން ބަލާފައިވެ އެވެ،

ދެ މީހުންގެ ވަކިވުމާ ގުޅިގެން ޝަކީރާ ހެދި މިއީ ދެވަނަ ލަވަ އެވެ. މީގެ ތިން މަސްކުރިން "މޮންޓޯނިއާ" ކިޔާ ހިތާމަވެރި ލަވަޔެއް ވެސް އޭނާ ވަނީ ނެރެފަ އެވެ.

އުމުރުން 45 އަހަރުގެ ޝަކީރާ އަދި 35 އަހަރުގެ ޕީކޭ ލޯބީގެ ގޮތުން ގުޅިގެން 10 އަހަރު އުޅުމަށް ފަހު، ވަކިވީ މިދިޔަ އަހަރު އެވެ. އެ ދެމީހުންގެ، ދެ ދަރިން ވެސް ތިބެ އެވެ.

ޝަކީރާ އާއި ޕީކޭ އަދި އެ ދެމީހުންގެ ދެ ދަރިން

މި ދެ މީހުން ވަކިވީ ޕީކޭ އެހެން އަންހެނަކާ ގުޅުން ބޭއްވިކަމުގެ ތުހުމަތަށް ފަހުގަ އެވެ އެ ވާހަކަ ޝަކީރާގެ އާ ލަވާގައި ބުނެ އެވެ.

ޖެހުނު މައްސަލައާ ގުޅުވައި ޝަކީރާގެ ސްޕެނިޝް ލަވާގައި ރައްދު ދީފައިވާ ގޮތް ގިނަ ބަޔަކަށް ވަނީ މަޖާ ވެފަ އެވެ. ޕީކޭ މިހާރު ރައްޓެހިވެގެން އުޅޭ ކަމަށް ބުނާ 23 އަހަރުގެ އަންހެން މީހާއާ ގުޅުވައި ލަވާގައި ބުނަނީ "އަހަންނަކީ އުމުރުން 22 އަހަރުގެ ދެ މީހުންގެ އަގު ހުރި މީހެއް" ކަމަށެވެ. އަދި ޝަކީރާ ވަނީ އޭނާއާ ޕީކޭގެ މިހާރު ލޯބިވެރިޔާ އަޅާކިޔަމުން އޭނާ އަކީ ފެރާރީއެއް ކަމަށާއި މިހާރު ގެންގުޅޭ މީހާ އަކީ ޓްވިންގޯއެއް ކަމަށް ވެސް ބުނެފަ އެވެ. އަގުހުރި ފެރާރީ ކާރެއްގެ ބަދަލުގައި ޕީކޭ ހޯދީ އަގު ހެޔޮ ޓްވިންގޯއެއް ކަމަށް އޭގައި މާނަކުރެ އެވެ.

މީގެ އިތުރުން ޕީކޭ ކެސިއޯ ގަޑިއެއް ހޯޑަން ރޮލެކްސް ގަޑިއެއް ދޫކޮށްލީ ކަމަށް ވެސް ބުނެ އެވެ.

ދެ މީހުންގެ ވަކިވުމާ ގުޅޭ ގޮތުން ޝަކީރާ ލަވަތައް ކިޔައި އެކި ވާހަކަ ދެއްކިޔަސް ރަސްމީ ސިފައެއްގައި ޕީކޭ މި ވާހަކައެއް ނުދައްކަ އެވެ.