ނިއުމާއަށް ޕްރޮޑިއުސަރުގެ ތޮފި ހެޔޮވަރު

މަޝްހޫރު ބަތަލާ ނިއުމާ މުހައްމަދު ސްކްރީނުން ފެނުން ކުރިއަށްވުރެ މަދެވެ. އެކަމަކު އޭނާ މިހާރު ހުރީ ކުރިން ކުޅުނު ގޮތަށް ފިލްމް ކުޅޭ ހިޔާލެއްގައެއް ނޫނެވެ. ނިއުމާ ބުނަނީ ސްކްރީނުން ނުފެނުނަސް ފިލްމީ ދާއިރާ އިން ނުގެއްލޭނެ ކަމެވެ.

އޭނާ ހުރީ ފިލްމްތައް ޕްރޮޑިއުސްކޮށް ބެލުންތެރިންނާ ހަމައަށް ގެނެސްދިނުމުގެ ފޯރީގަ އެވެ. އަދި އިތުރު ޑައިރެކްޝަނެއް ހަދަން ވެސް އޮތީ ވިސްނައިފަ އެވެ.

"ފަތިސްހަނވަރު" އާއި "ޔޫސުފް" އަދި "ކަލާޔާ ނުލާ" ފަދަ ކާމިޔާބު އެތައް ފިލްމެއް ކުޅެފައިވާ ނިއުމާ މި އަހަރު ސްކްރީނުން ފެންނާނެ އެވެ. އެއީ އޮގަސްޓް 2 ގައި ރިލީޒް ކުރާ "ނޯޓީ 40" އިންނެވެ. އެކަމަކު ބޮޑު ކާސްޓެއް ހިމެނޭ އެ ފިލްމުން އޭނާ ފެންނަނީ ހާއްސަ ފެނިލުމަކުންނެވެ.

"ހަމައެކަނި ސްޕެޝަލް އެޕިއަރެންސެއް މިއީ. އެހެންވެ ވަރަށް ކުޑަކުޑަ ރޯލަކުން ފެންނާނީ،" ޔޫސުފް ޝަފީއު (ޔޫއްޕެ) ޑައިރެކްޓް ކުރާ ފިލްމުގެ ޝޫޓިން އަށް މިހާރު ށ. މިލަންދޫގައި ހުރި ބަތަލާ ބުންޏެވެ.

ނިއުމާ އެ ރަށަށް ދިޔައީ ހޮނިހިރު ދުވަހު އެވެ. "ނޯޓީ 40" ގައި އޭނާ ނަގަން ޖެހޭ މަންޒަރުކޮޅު ނިމުމާ އެކު މާލެ އަންނާނެ އެވެ.

މި ފިލްމަކީ މިދިޔަ އަހަރު ރިލީޒްކޮށް، ބޮޑު ކާމިޔާބީއެއް ހޯދި ކޮމެޑީ ފިލްމް "ބައިވެރިޔާ" އަށް ފަހު ނިއުމާ އާއި އިސްމާއީލް ޝަފީގް ޕްރޮޑިއުސް ކުރާ ދެވަނަ ފިލްމެވެ.

"އަސްލު ޔޫއްޕެގެ ރިކްއެސްޓަކަށް ފިލްމުގެ ކާސްޓާ ބައިވެރިވާން ނިންމީ. އަނެއްކާ ނިއުމާމެން ޖެނެރޭޝަންގެ ތަރިންނަށް ބަލާ އިރު، ޔޫއްޕެ، ސީޒަން، މަނިކު އަދި ސައީދުމެން ކަހަލަ އެކްޓަރުން މި ފިލްމުގައި ތިބުމަކީ ވެސް މީގައި ބައިވެރިވާން ބޭނުންވި ސަބަބެއް،" މިދިޔަ އަހަރު "ވީ ބޭވަފާ" އިން ފެނުނު ބަތަލާ ބުންޏެވެ.

"ވަރަށް ހިތްހަމަޖެހޭ އަހަރެމެންގެ ޖެނެރޭޝަނާއި އަލަށް މި ދާއިރާގައި މިހާރު ވިދަމުން އަންނަ ކުދިންނާ އެއްކޮށް މަސައްކަތްކޮށްލަން ފުރުސަތެއް ލިބުނީމަ. އަދި އާ ކުދިންތަކެއް ވެސް މި ފިލްމުން އެބަ ތައާރަފުވޭ."

ނިއުމާ ބުނީ "ނޯޓީ 40" ގައި އޭނާ ފެނިގެންދާ ކެރެކްޓާގެ މާ ބޮޑު ތަފުސީލަކަށް އަދި ދާން ބޭނުން ނުވާ ކަމަށެވެ.

އެކަމަކު ޔޫއްޕެ، ސީޒަން އަދި މަނިކާ އެކު ނިއުމާ ސްކްރީން ހިއްސާ ކުރާނެތޯ އެއީ ފޭނުން ގައިމު ވެސް ބަލަން ބޭނުން ވާނެ ކަމެކެވެ.

"ފަހަރެއްގައި އެ މީހުންނާ އެކީގައި ވެސް ފެނިގެން ހިނގައި ދާނެ. ހިނގާ ދޯ މިއަށް އިންތިޒާރުކޮށްލަމާ،" އޭނާ ބުންޏެވެ. "އަނެއްކާ މިގޮތަށް ފިލްމެއްގެ ޝޫޓިންއަކަށް ނުދާތާ ވަރަށް ދުވަސްކޮށްފައި، މި ފަހަރު ޝޫޓިންއަކަށް މިއައީ."

މި އަހަރުގެ އެންމެ އުންމީދީ އެއް ފިލްމް ކަމަށްވާ "ހައްދު" އަކީ ވެސް ނިއުމާގެ ހިއްސާ އޮތް ފިލްމެކެވެ. ސެޕްޓެމްބަރު ހައެއްގައި ރިލީޒް ކުރާ އެ ފިލްމަކީ ޑައިރެކްޓަރު އަބްދުލް ފައްތާހާއި ނިއުމާ ގުޅިގެން ޕްރޮޑިއުސް ކުރާ ފިލްމެކެވެ.

"އަސްލު ވަރަށް ބޭނުންވޭ މިހާރު ކޮލިޓީ އެއްޗެހިތަކެއް ބެލުންތެރިންނާ ހަމައަށް ގެނެސް ދޭން. އެހެންވެ މިހާރު ފިލްމްތަކަށް ފައިނޭންސް ކުރަނީ. އެގޮތުގައި ދެމި ހުންނާނަން،" ފިލްމީ ދާއިރާއިން ރާއްޖޭގައި މިހާތަނަށް ނުލިބޭ ކާމިޔާބީއެއް ނެތް ބަތަލާ ބުންޏެވެ. "ހައްދުއަކީ ހަމަ ޔަގީނުން ވެސް ބެލުންތެރިންނަށް ވަރަށް ކަމުދާނެ ފިލްމަކަށް ވާނެ."

މިހާރު ވެސް ޔަގީންވާ ކަމަކީ ނިއުމާ ޕްރޮޑިއުސްކުރާ ދެ ފިލްމެއް ސިނަމާ އަށް އަންނާނެ ކަމެވެ. އެކަމަކު އެވަރަކުން އަދި މި އަހަރަށް ނިންމައިލަނީކީ ނޫނެވެ.

"ސެޕްޓެމްބަރުގެ ފަހުން ސީދާ ހަމަ އަހަރެން އެކަނި ޕްރޮޑިއުސް ކުރާ ފިލްމެއް އިއުލާން ކުރާނަން." ނިއުމާ ބުންޏެވެ.

ފިލްމް "ނިއުމާ" އަށް ފަހު، ނިއުމާ އަންނަނީ ދެވަނަ ޑައިރެކްޝަނަކަށް ވެސް ވިސްނަމުންނެވެ. އޭގެ ސްކްރީންޕްލޭގެ 80 ޕަސެންޓް މިހާރު އޮތީ ނިމިފަ އެވެ.

"މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު އޭގެ މަސައްކަތް ވެސް ފަށާނަން،" އޭނާ ބުންޏެވެ.

ނިއުމާ ބުނީ ދެވަނަ ޑައިރެކްޝަނެއް ހަދަން ބޭނުންވާ ސަބަބަކީ އަންހެން ވަރުގަދަ ކެރެކްޓާއެއް ދައްކުވައިދޭ ކަހަލަ ފިލްމެއް ގެނެސް ދިނުން ކަމަށެވެ.

"އެކަހަލަ ފިލްމްތައް އަދިވެސް މަދު ކަންނޭނގޭ. ފިލްމުގެ ސްކްރީންޕްލޭއަކީ ވަރުގަދަ އަންހެން ކެރެކްޓާއަކަށް ބޭސްކޮށްގެން ލިޔާ އެއްޗެއް،" އޭނާ ބުންޏެވެ.

އެކަމަކު ދެވަނަ ޑައިރެކްޝަނުން ނިއުމާ ފެންނާނެތޯ އަދި އޮތީ ސުވާލެއްގެ ތެރޭގަ އެވެ. އެހެން މީހަކާ ހަވާލުކުރުމުގެ ވިސްނުން ވެސް ގެންގުޅެ އެވެ.

"ކުޅެމުން ޑައިރެކްޓް ކުރަންވެއްޖިއްޔާ އެހާ ފަސޭހައެއް ނުވާނެ ކަންނޭނގޭ،" އޭނާ ބުންޏެވެ. "އެހެންވެ އެކަމާ އަދި މުޅިން ގޮތެއް ނުނިންމަން."

ފިލްމް "ނިއުމާ" އަކީ އޭގެ ޓައިޓްލް ރޯލް ކުޅެ، ނިއުމާ ޑައިރެކްޓް ވެސް ކުރި ފިލްމެކެވެ. އަދި އެ ފިލްމުން ނިއުމާ ވަނީ 2015 ވަނަ އަހަރު އެންމެ މޮޅު ބަތަލާގެ ގައުމީ އެވޯޑް ވެސް ހޯދައިފަ އެވެ.

އަދި އެމްއެފްއޭ އެވޯޑްސްގައި ނިއުމާ ވަނީ "ނިއުމާ" އިން އެންމެ މޮޅު ޑައިރެކްޓަރުގެ އެވޯޑް ވެސް އުފުލާލައިފަ އެވެ.

އެހެންވެ ނިއުމާގެ ހުނަރާ މެދު އެއްވެސް މީހަކު މިހާރު ޝައްކެއް ނުކުރާނެ އެވެ.