"ޕުޝްޕާ"ގެ ޕްރޮޑިއުސަރު މަރުވި މީހާގެ އާއިލާއަށް ފަސް މިލިއަން ރުޕީސް ދީފި

"ޕުޝްޕާ 2" ޕްރިމިއާކުރުމަށް ހައިދަރުއާބާދުގެ ސިނަމާއެއްގައި ބޭއްވި އިވެންޓުގައި ފިތިބާރުވެގެން މަރުވި މީހާގެ އާއިލާއަށް އެ ފިލްމުގެ ޕްރޮޑިއުސަރު ފަސް މިލިއަން ރުޕީސްގެ އެހީއެއް ދީފި އެވެ.

ރިޕޯޓްތައް ބުނި ގޮތުގައި، "ޕުޝްޕާ"ގެ ޕްރޮޑިއުސަރު ނަވީން ޔެރްނޭނީ ވަނީ އެ ހާދިސާގައި މަރުވި އަންހެން މީހާގެ އާއިލާއަށް އެހީގެ ގޮތުގައި ފަސް މިލިއަން ރުޕީސް ދީފަ އެވެ. އެ ފައިސާ އާއިލާއާ ހަވާލުކުރީ ނަވީން އިއްޔެ ބޭއްވި ނޫސްވެރިންގެ ބައްދަލުވުމެއްގަ އެވެ.

އެ ނޫސްވެރިންގެ ބައްދަލުވުން ބޭއްވީ އެ ހާދިސާގައި އަނިޔާވި އަންހެން މީހާގެ ދަރިފުޅުގެ ހާލު ބެލުމަށް ނަވީން ހޮސްޕިޓަލަށް ދިޔުމަށް ފަހުގަ އެވެ. އެ ކުއްޖާއަށް ފަރުވާދެނީ އިންޑިއާގެ މަޝްހޫރު ކިމްސް ހޮސްޕިޓަލުގަ އެވެ. އަންހެން މީހާގެ އާއިލާގެ ފަރާތުން ފައިސާގެ ޗެކާ ހަވާލުވީ އޭނާގެ ފިރިމީހާ އެވެ.

އެ ކުއްޖާއަށް އަދިވެސް އެޑްމިޓުކޮށްގެން ފަރުވާދެމުން އަންނައިރު، ބޭސްފަރުވާގެ ހުރިހާ ހަރަދެއް ކޮށްދެނީ "ޕުޝްޕާ"ގެ ލީޑު އެކްޓަރު އައްލޫ އަރްޖުން އެވެ.

އަންހެން މީހާ މަރުވި މައްސަލާގައި ހައިދަރުއާބާދުގެ ފުލުހުން ވަނީ އައްލޫ އަރްޖުން ހައްޔަރު ވެސް ކޮށްފަ އެވެ. ނަމަވެސް، އަންހެން މީހާގެ އާއިލާއިން އެކަމާ ދެކޮޅު ހެދި އެވެ. އަރްޖުންގެ ވަކީލުން ވަނީ ޓެލަންގާނާ ހައި ކޯޓުގައި އެ މައްސަލަ އިސްތިއުނާފުކޮށް، ކަފާލާތުގެ ދަށުން އޭނާ މިނިވަންކޮށްފަ އެވެ.

އަރްޖުން ވެސް ބައިވެރިވި އެ އިވެންޓު ބޭއްވީ މި މަހުގެ ހަތަރު ވަނަ ދުވަހުގެ ރޭ ހައިދަރުއާބާދުގެ ސަންދިޔާ ތިއޭޓަރުގަ އެވެ. އެ ފިލްމު ބަލަން ދިޔަ މީހުންނާއި އަރްޖުން ދެކިލަން ސިމަނާ ކައިރިއަށް އެއްވި މީހުންނާ އެކު، އެ ސަރަހައްދު އޮތީ ފުރި ބާރުވެފަ އެވެ. އެ ހާދިސާގައި މަރުވީ ކުޑަކުއްޖަކު ގޮވައިގެން އެ ފިލްމު ބަލަން ދިޔަ އަންހެނެކެވެ.