އިންޑިއާގެ އެންމެ ކުޅަދާނަ ދެ ކޮމޭޑިއަނުންގެ ހަނގުރާމަ ހޫނުވެއްޖެ

ސޮނީ ޓިވީން ދައްކާ "ދަ ކަޕިލް ޝަރުމާ ޝޯ" އަކީ އިންޑިއާގައި މިހާރު ދައްކާ އެންމެ މަޝްހޫރު ކޮމެޑީ ޝޯ އެވެ. މި ޝޯގެ ހޯސްޓް ކަމަށްވާ ކަޕިލް ޝަރުމާ އަކީ މިހާރު ޝާހްރުކް ޚާނާއި ސަލްމާން ޚާން ފެންވަރުގެ އެކްޓަރެކެވެ. މަގްބޫލުކަމުގެ ގޮތުންނާއި ފައިސާގެ ގޮތުން ކަޕިލް އާއި ބޮލީވުޑްގެ އެންމެ އުހުގައި ތިބި އެކްޓަރުންނަކާ މާ ބޮޑު ތަފާތެއް ނެތެވެ.

ކަޕިލްގެ ޝޯގައި އޭނާގެ އިތުރުން ދެން އެންމެ މަގްބޫލު މީހަކަށް އުޅެނީ ސުނިލް ގްރޯވަރެވެ. ޑރ. މަޝްހޫރު ގުލާޓީ އާއި ރިންކޫ ބާބީގެ ބައި އޭނާ ކުޅޭލެއް ފުރިހަމަވެފައި މަޖަލެވެ. ކަޕިލް އާއި ސުނިލް ގުޅިގެން މި ޝޯ ވަނީ އިންޑިއާ މީހުންގެ ހިތްތައް އަތުލުމުގައި ކާމިޔާބު ހޯދާފަ އެވެ. އަދި ބޮލީވުޑް ތަރިން ވެސް އެމީހުންގެ އަލަށް ރިލީޒްވާ ފިލްމުތައް ޕްރޮމޯޓްކުރުމަށް އެންމެ ފުރަތަމަ ވެސް ދަނީ ކަޕިލް ޝަރުމާ ޝޯ އަށެވެ.

މިދިޔަ ހޯމަ ދުވަހު އިންޑިއާގެ ނޫސްތަކުން ބުނި ގޮތުގައި އޮސްޓްރޭލިއާއިން ނިއު ދިއްލީއަށް ދަތުރުކުރި ފްލައިޓެއްގެ ތެރޭގައި ވަރަށް ގަދަޔަށް މަސްތުވެގެން ހުރެ، ސުނިލްގެ ގައިގައި ކަޕިލް ތަޅައިގަތެވެ. އަދި ވަރަށް ހަޑި ހުތުރު އެއްޗެއް ގޮވުމުގެ ސަބަބުން، އެ ބޯޓުގައި ތިބި މީހުންނަށް އުނދަގޫވެގެން މައްސަލަ ޖެއްސި ކަމަށް ނޫސްތަކުގައި ބުނެފައިވެ އެވެ.

މި ޓީމު އިންޑިއާއަށް އަންނަން ދަތުރުކުރީ އޮސްޓްރޭލިޔާގެ އެކި ހިސާބުތަކުގައި ވަރަށް ކާމިޔާބު ޝޯތަކެއް ބޭއްވުމަށް ފަހުގަ އެވެ.

މި ވާހަކަ ފެތުރެން ފެށުމުން ކަޕިލް ފޭސްބުކްގައި އާންމުކުރި ލިޔުމެއްގައި ބުނީ އެއީ ހަމަ އާދައިގެ ގޮތަކަށް ދެ އެކުވެރިން ކުރި ޒުވާބެއް ކަމަށެވެ. އެއްވެސް ކަމެއް ސީރިއަސް ނޫންކަމަށް ބުނެފައިވެ އެވެ.

ނަމަވެސް އެއާ އެކު ކަޕިލް އަށް ޖަވާބުދީ ސުނިލް ގްރޯވަރު ކުރި ޓުވީޓެއްގައި ކަޕިލް ބޭޒާރު ކޮށްލާފައިވެ އެވެ. ކަޕިލް ކަންތައް ކުރިގޮތުން ވަރަށް ދެރަވެ ރުޅިއައިސްފައި ހުރިކަން އެ ރައްދުން ހާމަވެ އެވެ.

"މަޝްހޫރުކަމާ އެއްވެސް ގުޅުމެއް ނެތް އަންހެނުންތަކެއްގެ ކުރިމަތީގައި ހަޑި ހުތުރު ބަހުން މީހުންނަށް އެއްޗެހި ގޮވުމާ ދުރުހެލިވޭ. އެމީހުންނަކީ ނަސީބު ދިމާކުރިގޮތުން އެއް ފްލައިޓެއްގައި ދަތުރު ކުރެވުނު ބައެއް. އަމިއްލަ ޝޯއެއް ވީމާ ކޮންމެ ގަޑިއަކު ވެސް ކޮންމެ މީހަކު ވެސް ވަކިވެސް ކުރެވިދާނެކަން އިނގޭ. ....،" ސުނިލް ކުރި ޓުވީޓްގައި ލިޔެފައި ވެއެވެ.

އޭގެ ފަހުން ކަޕިލް ބައެއް ޓުވީޓްކޮށް ސުނިލްގެ ރުޅި މައިތިރި ކުރެވޭތޯ މަސައްކަތް ކުރި ނަމަވެސް ސުނިލް ހުރީ ކަޕިލް އަށް މައާފު ކުރާ ގޮތަކަށް ނޫނެވެ. ބައެއް ނޫސްތަކުން ބުނަނީ ކަޕިލްގެ ޝޯއިން ސުނިލް ވަކިވެއްޖެ ކަމަށެވެ. އަދި އެއާ އެކު ސުނިލް އަށް ކަންތައް ކުރި ގޮތުން ރުޅިއައިސްގެން، ޝޯގައި މާމަގެ ރޯލު ކުޅޭ އަލީ އަސްގަރް އާއި ޗަންދޫގެ ބައި ކުޅޭ ޗަންދަން ޕްރަބާކަރަން ވެސް ޝޯއިން ވަކިވާން ނިންމާފައިވާ ކަމަށް ނޫސްތަކުން ބުނެފައިވެ އެވެ.

ކަޕިލް އާއި ސުނިލް އަކީ ވަރަށް ޒަމާންވީ ދެ އެކުވެރިންނެވެ. ކޮމެޑީ ޝޯތަކުގައި ބައިވެރިވަމުން އައިސް ދެ މީހުންގެ އެކުވެރިކަން ބަދަހިވީ އެވެ. އަދި ކަލާޒް ޗެނަލް އިން "ކޮމެޑީ ނައިޓްސް ވިތު ކަޕިލް" ކިޔާ ޝޯއެއް ކަޕިލް ލޯންޗުކުރުމާ އެކު އެ ޝޯގައި ސުނިލް ވެސް ބައިވެރިވާން ފެށި އެވެ. އެ ޝޯގައި އޭނާ އަންހެނަކަށް ވެގެން ކުޅެފައިވާ ގުއްތީގެ ކެރެކްޓާ ވަރަށް މަޝްހޫރުވި އެވެ. ނަމަވެސް ވަކި ހިސާބަކުން ކަޕިލްގެ ޝޯ ދޫކޮށް ސުނިލް އޭނާގެ އަމިއްލަ ޝޯއެއް އުފެއްދި އެވެ. ސްޓާ ޕްލަސް އިން ދެއްކި "މޭޑް އިން އިންޑިއާ" ކިޔާ މި ޝޯ ރަނގަޅަށް ހިނގާގޮތް ނުވެ ޝޯ ހުއްޓާލަން ޖެހުމުން ސުނިލް އަނެއްކާ ވެސް ކަޕިލްގެ ޝޯއާ ގުޅުނީ އެވެ. އޭގެ ފަހުން ކަޕިލް އާއި ކަލާޒް ޗެނަލް މައްސަލަތަކެއް ޖެހި އެ ޗެނަލުން ކަޕިލް ވަކިވެ އެ ޝޯ ވެސް ހުއްޓާލި އެވެ.

ފަހުން ކަޕިލް ސޮނީ ޓީވީއާ ގުޅިގެން އާ ކޮމެޑީ ޝޯއެއް "ދަ ކަޕިލް ޝަރުމާ ޝޯ"ގެ ނަމުގައި އުފެއްދި އެވެ. ކަޕިލްއާ އެކު ކަލާޒްގެ ޝޯގައި ބައިވެރިވި އެންމެން ވެސް ކަޕިލް އަށް ވަފާތެރިކަން ދައްކައި ކަލާޒް ދޫކޮށް، ސޮނީން ކަޕިލް ފެށި ޝޯގައި ބައިވެރިވި އެވެ. މިމީހުންގެ ތެރޭގައި ސުނިލް ވެސް ހިމެނުނެވެ. ނަމަވެސް ސުނިލް އާއި ކަޕިލްގެ ގާތް މީހުން ބުނަނީ އަބަދުވެސް މި ދެ އެކްޓަރުންގެ މެދުގައި ޕްރޮފެޝަނަލް ވާދަވެރިކަން ވަރަށް ބޮޑު ކަމަށެވެ. އަދި އެކަކީ އަނެކަކަށް ވުރެ މޮޅު މީހެއް ކަމަށް ދެ މީހުންނަށް ވެސް ހީވާ ކަމަށެވެ.

ކަޕިލް ކަންތައް ކުރި ގޮތުން އޭނާ ދެކެ ވަރަށް ގިނަބަޔަކު ވަނީ ފޫހިވެފަ އެވެ.

"ދަ ސުނިލް ގްރޯވަރު ޝޯ"ކިޔާ ޝޯއެއް ތައްޔާރުކުރަން ވެސް ބައެއް މީހުން ސުނިލް އަށް ޚިޔާލު ދީފައި ވެ އެވެ. އަދި މިފަދަ ޝޯއެއް ދައްކަން ފަށައިފި ނަމަ ކަޕިލްގެ ޝޯގެ ޓީއާރުޕީ ވެއްޓި ސުނިލް އަށް ކާމިޔާބު ލިބޭނެކަމަށް ވެސް އޭނާއަށް ތާއީދުކުރާ ބައެއް މީހުން ބުނެފައިވެ އެވެ.

މި ދެ މީހުންގެ އަރާރުން ފިނިކުރެވޭތޯ ސޮނީ ޗެނަލް އިން ވެސް ވަނީ މަސައްކަތް ފަށައިފަ އެވެ. ސަބަބަކީ ކަޕިލްގެ ޝޯ އަކީ ސޮނީ އަށް ވަރަށް މުހިއްމު ޝޯ އަކަށް ވާތީ އެވެ. ސޮނީ ވަރަށް ބޮޑަށް ވަޅުޖަހައި އެންމެ މަގްބޫލު ފަސް ޗެނަލުގެ ތެރޭގައި ވެސް ނުހިމެނި އޮއްވާ ކަޕިލްގެ ޝޯ ދައްކަން ފެށުމުން އެ ޗެނަލްގެ މަގްބޫލުކަން އިންތިހާއަށް އިތުރުވެގެން ދިޔަ އެވެ.

އަންނަ ހޮނިހިރު ދުވަހުގެ ރޭ ދައްކަން ހަމަޖެހިފައިވާ "ދަ ކަޕިލް ޝަރުމާ ޝޯ" މިދިޔަ ހޯމަ ދުވަހު ޝޫޓް ކޮށްފައިވާއިރު ޝޯގެ އެންމެ މުހިއްމު ބައިތައް ކުޅޭ ގިނަ މީހުން އެ ޝޫޓިންއަށް ނުދާ ކަމަށް އެވެ. އޭގެ ތެރޭގައި ސުނިލްގެ އިތުރުން ޗަންދަން (ޗަންދޫ) އާއި އަލީ އަސްގަރް (ދާދީ) ހިމެނެ އެވެ.

ކަޕިލް އަކީ ފަގީރު ހާލުގައި ގިނަ ދުވަސްތަކެއް ވަންދެން އުޅެފައިވާ މީހެކެވެ. ކޮމެޑީ ޝޯތަކުގައި ބައިވެރިވަމުން ގޮސް އޭނާގެ ނަސީބު އަތުގައި ހިފީ ކަލާޒް އަށް އޭނާ އުފައްދައިދިން "ކޮމެޑީ ނައިޓްސް ވިތު ކަޕިލް" ކާމިޔާބު ވުމުންނެވެ. އެއަށްފަހު ސޮނީ އަށް "ދަ ކަޕިލް ޝަރުމާ ޝޯ" އޭނާ ތައްޔާރުކޮށްދޭން ފެށީ ކަލާޒް ގެ ޝޯއަށް ވުރެ އެތައް ގުނައެއް އަގު ބޮޑުކޮށެވެ. ސޮނީގެ ޝޯގެ އެންމެ އެޕިސޯޑަކަށް ވެސް ކަޕިލް އަށް 10 މިލިއަން ރުޕީޒް އަށް ވުރެ ގިނައިން ލިބޭ ކަމަށްވެ އެވެ. މީގެ އެންމެ ރަނގަޅު ހެއްކަކީ މިފަހަރު އިމްކަމް ޓެކްސް ދެއްކި ތަރިންގެ ލިސްޓުގެ އެންމެ ކުރީގައި އުޅޭ ތަރިންގެ ތެރޭގައި ކަޕިލްގެ ނަން ހިމެނިފައި އޮތުމެވެ.