މީރާ އާއި ފާލިހް މިއަދު ކައިވެނިކުރަނީ

އެތައް ބައެއްގެ ހިތްތައް ފަތަހަކޮށްފައިވާ މަޝްހޫރު ލަވަކިޔުންތެރިޔާ މީރާ މުހައްމަދު އޭނާގެ ލޯބިވެރިޔާ އަދި މޯލްޑިވިއަން އައިޑޮލްގެ ތަރި އަބްދުﷲ ފާލިހް މިއަދު ކައިވެނި ކުރާނެ އެވެ.

ކައިވެނީގެ ކުލަގަދަ ރަސްމިއްޔާތުގެ ވާހަކަ އަހަން ސަޕޯޓަރުން ކިތަންމެ ބޭނުންވިޔަސް މީރާ ބުނީ މިވަގުތު "އެއްވެސް އިންޓަވިއުއެއް" ދޭން ބޭނުމެއް ނުުވާ ކަމަށެވެ. ނަމަވެސް އޭނާގެ ހަޔާތަށް އަންނަ އުފާވެރިކަމުގެ ހާއްސަކަން ސޯޝަލް މީޑިއާ މެދުވެރިކޮށް، ކުރިއަށް އޮތް 24 ގަޑިއިރުގެ ތެރޭގައި ފޭނުންނާއި ސަޕޯޓަރުންނާ ހިއްސާކުރަމުން ގެންދާނެ ކަމަށް ބުންޏެވެ.

މީރާ ބުނަނީ ކައިވެނީގެ ހަފުލާ އާއި މިހާތަނަށް ކުރިއަށް ގެންގޮސްފައިވާ ތައްޔާރީތަކަކީ ވެސް ސިއްރެއް ކަމަށާއި އެއްވެސް މައުލޫމާތެއް އޭނާ މިވަގުތު ނުދޭނެ ކަމަށެވެ. ނަމަވެސް ވަރަށް "އެކްސައިޓިން" ކަންތައްތަކެއް ކުރިއަށް އެބަހުރި ކަމަށް ބުންޏެވެ. އެ ހުރިހާ ކުލައަކާއި މަންޒަރެއް ސްނެޕް ޗެޓް މެދުވެރިކޮށް ލައިވްކޮށް ފޭނުންނާ ހިއްސާކުރަމުން ގެންދާނެ ކަމަށް މީރާ ބުންޏެވެ.

މީރާ އަކީ ދިވެހިންގެ ހިތާއި މިއުޒިކުގައި ލެޖެންޑަރީ މަގާމެއް ހާސިލުކޮށްފައިވާ ކުޅަދާނަ މިއުޒީޝަން މެޒޯ މުހައްމަދުގެ އަންހެން ދަރިފުޅެވެ. ބައްޕަގެ ފިޔަވަޅު މަތިން ފެށި މިއުޒިކީ ހަޔާތުގައި މީރާގެ ތަރި އަރައިގެން ގޮސް ރާއްޖޭގެ އެންމެ އަލިގަދަ ތަރިންގެ ތެރޭގައި ވަނީ ހިމެނިފަ އެވެ. އޭނާގެ އެންމެ ފާހަގަކޮށްލެވޭ ހުށަހެޅުންތަކުގެ ތެރޭގައި އިންޑިއާގެ ބޭންޑް ސަނަމްއާ އެކު ރިކޯޑްކޮށްފައިވާ "ޔެ ވާދާ ރަހާ" ގެ ދިވެހި/ހިންދީ ކަވާ ލަވަ އާއި އޭގެ ވީޑިއޯ ހިމެނެ އެވެ.

އޭގެ އިތުރުން މިފަހުން އަމިއްލަ ރާގުތަކެއް އުފައްދައި އެއާ އެކު ގެނެސްދިން ތިން ވީޑިއޯ ލަވައަކީ ވެސް އާންމުންގެ ސަމާލުކަން ވަރަށް ބޮޑަށް ލިބުނު ލަވަތަކެކެވެ.

މިއުޒިކްގެ މި އުސްއަލިތަކުން އެއް ފަރާތަކަށް ޖެހި އެންމެފަހުން ޒާތީ ދިރިއުޅުމުގެ އެންމެ ހާއްސަ ދުވަހަށް ފާލިހްއާ އެކު މީރާ ކުޅެން ފެށި ލޯބީގެ ރާގަށް އާންމުންގެ ސަމާލުކަން ލިބުނުތާ މިހާރު ހައެއްކަ މަސް ވެއްޖެ އެވެ. މިއީ މީރާގެ އަލަތު ކައިވެނި ނަމަވެސް މި ކައިވެނި ވެގެންދާނީ ފާލިހްގެ ދެ ވަނަ ކައިވެންޏަށެވެ. ކުރީގެ ކައިވެނި ރޫޅިފައިވާއިރު ފާލިހްގެ ދަރިއަކު ވެސް އެބަހުއްޓެވެ.

ފާލިހް އަކީ މޯލްޑިވިއަން އައިޑޮލްގެ އަލަތު ސީޒަނުން އުފައްދައި ބްރޭންޑްކޮށްގެން އާންމުންނަށް ތައާރަފްކޮށްފައިވާ ކުޅަދާނަ ލަވަކިޔުންތެރިއެކެވެ. މޯލްޑިވިއަން އައިޑޮލްއާ އެކު ބޮޑު މަޝްހޫރުކަމެއް ލިބުނު ފާލިހަކީ އެ ސީޒަނުގެ ފަސް ވަނަ އެވެ.