"އެވެޓާ" ސީކްއެލްތަކަށް ޒުވާން ކާސްޓެއް

ބޮކްސް އޮފީހުގެ ރެކޯޑްތައް މުގުރާލި ޖޭމްސް ކެމެރަންގެ 2009 ގެ "އެވެޓާ" ހަތަރު ފިލްމެއް ކުރިއަށް ޕްލޭންކޮށްފައިވާ އިރު، މީގެ ސީކްއެލްތަކުގެ ފުރަތަމަ ބައިގެ މަސައްކަތް ފެށުމުގެ އެންމެ ފަހުގެ ތައްޔާރީތައް މިހާރު ވަނީ މެކުހަށް ޖަހައިފަ އެވެ.

"އެވެޓާ" ގެ ފިލްމްތަކަށް އިންތިޒާރު ކުރާ މީހުންނަށް އޮތް އުފާވެރި ހަބަރަކީ ޕްރިކްއެލްއާ ހިލާފަށް ސީކްއެލްތަކުން ވަރަށް ޒުވާން ކުދިންތަކެއް ފެނިގެން ދިއުމެވެ. ފިލްމުގެ ކާސްޓަށް އިތުރުކޮށްލި ޒުވާން ޓީމް މިހާރު ވަނީ ތައާރަފް ވެސް ކޮށްފަ އެވެ. އެހެންވެ ޒޯއާ ސަލްދަނާ އާއި ސޭމް ވޯތިންޓަންއާ އެކު، މީގެ ކުރިއަށް ހުރި ފިލްމްތަކުގައި ޒުވާން ރަހަތައް ވަރަށް ބޮޑަށް ހިމެނޭނެ އެވެ.

މިކަމާ ބެހޭ ގޮތުން ޕްރޮޑިއުސަރު ޖޮން ލަންޑޯ ބުނީ ޒުވާން ކާސްޓަކާ އެކު، ޕެންޑޯރާގެ މުސްތަގުބަލު ފެންނާމީ ވަރަށް އުޖާލާކޮށް ކަމަށެވެ. އަދި މި ބަދަލަކީ ފިލްމުން ބެލުންތެރިންނަށް ވަރަށް ކަމުދާނެ ބަދަލަކަށް ވާނެ ކަމަށް ބުންޏެވެ.

"ޕްރިކްއެލްއާ ހިލާފަށް މި ފަހަރު މީގެ ތެރެއަށް ވަރަށް ޒުވާން ކާސްޓެއް މިއޮތީ ގެނެސްފައި. މި ޖެނެރޭޝަނަކީ ޕެންޑޯރާގައި ވަރަށް މުހިއްމު ދައުރެއް އަދާ ކުރާނެ ބައެއް،" ޖޮން ބުންޏެވެ. "އޭގެ މާނައަކީ އެވެޓާގެ ކުރިއަށް އޮތް ކޮންމެ ފިލްމަކުން މި ޖެނެރޭޝަން ފެނިގެން ދާނޭ."

"އެވެޓާ" ގެ ކުރިއަށް އޮތް ހަތަރު ފިލްމް ރިލީޒް ކުރާނެ ތާރީހުތައް ވެސް އިއުލާންކޮށްފައިވާ އިރު، ފުރަތަމަ ބައި ބެލުންތެރިންނާ ހަމައަށް އަންނާނީ ޑިސެމްބަރު 18، 2020 ގަ އެވެ. ތިން ވަނަ ބައި ސިނަމާ އަށް ގެންނާނީ ޑިސެމްބަރު 17، 2021 ގަ އެވެ. އޭގެ ފަހުން ހަތަރު ވަނަ ބައި ސިނަމާ އަށް ގެންނާނީ ޑިސެމްބަރު 19، 2025 ގަ އެވެ.

"ޓައިޓޭނިކް" ވެސް ބެލުންތެރިންނަށް ގެނެސް ދިން ކެމެރަން ބުނި ގޮތުގައި "އެވެޓާ" ގެ ސީކްއެލްތަކުގެ ސްކްރިޕް މިހާރު ނިމިފައިވާ އިރު، މިހާރު ކުރިއަށް ދަނީ ސީކްއެލްތަކުގެ ފުރަތަމަ ބައިގެ މަސައްކަތް ފެށުމަށް ވާން ޖެހޭ އެންމެ ފަހުގެ ތައްޔާރީތަކެވެ.