ބްރެޑް ޕިޓްގެ އާ ލޯބިވެރިޔަކީ "ކުޑަކުއްޖެއް"

ބްރެޑް ޕިޓާއި އެންޖެލީނާ ޖޮލީގެ ގުޅުމުގައި ސިއްކަ ޖެހުނު ވާހަކައާ އެކު ދޭތެރެ ދޭތެރެ އެ ދެ ތަރިންގެ އާ ލޯބިވެރިންގެ ވާހަކަތައް މީޑިއާތަކަށް ތިލަވެ އެވެ. މި ދޭތެރެ އިން އެންމެ ގަދައަށް ދެކެވުނު އެއް ވާހަކައަކީ އޮސްޓްރޭލިއާގެ ބަތަލާ މާގޯ ރޮބީ އާއި ޕިޓް ރައްޓެހިވެގެން އުޅޭ ވާހަކަ އެވެ.

އެކަމަކު އެ ގުޅުމުގެ ވާހަކައިގެ އަޑު މަޑުވެފައި ވަނިކޮށް އަނެއްކާ ވެސް އެހެން ބަތަލާއަކާއި ޕިޓާ ގުޅުވައިގެން މިހާރު މީޑީއާތަކުގައި އަންނަނީ ވަރަށް ގަދައަށް ވާހަކަ ދެކެމުންނެވެ.

މި ފަހަރުގެ ބަތަލާއަކީ ޖޮލީ 2014 ގައި ކުޅުނު ފިލްމް "މެލެފިޝަންޓް" ގައި އޭނާގެ ފުރާވަރުގެ ރޯލް ކުޅުނު އިނގިރޭސި ބަތަލާ އެލާ ޕަނެލް އެވެ. މީޑިއާ ރިޕޯޓްތައް ބުނާ ގޮތުގައި އެލާ، 21، އާއި ޕިޓް، 53، މިހާރު އުޅެނީ ވަރަށް ސީރިއަސްކޮށް ލޯބީގެ ގޮތުން ގުޅިގެންނެވެ.

އެ ދެ މީހުން ބައްދަލުވީ މިދިޔަ އަހަރު ރިލީޒް ކުރި އެލާގެ ފިލްމް "މިސް ޕެރެގްރިންސް ހޯމް ފޮ ޕެކިއުލިއާ ޗިލްޑްރެން" ގެ މަސައްކަތް ކުރި ދުވަސްވަރު ކަމަށްވެ އެވެ. އޭގެ ފަހުން ޕިޓްގެ ކަޅި އެލާ އަށް ވަރަށް ބޮޑަށް ހުއްޓިފައިވާ ކަމަށާއި ޕިޓްގެ ސީރީޒް "ސްވީޓްބިޓާ" އިން ވެސް އެލާ އަށް ފުރުސަތު ދީފައިވެ އެވެ.

އެލާގެ ގާތް މީހަކާ ހަވާލާދީ ބައެއް މީޑިއާތަކުން ބުނެފައިވާ ގޮތުގައި ޕިޓްގެ ފަރާތުން ލިބުނު ސަމާލުކަމާ އެކު އެލާ މިހާރު ހުރީ މެދު އުޑުގަ އެވެ. އަދި ޕިޓަކީ އޭނާ އަބަދު ވެސް އެންމެ ގަޔާވާ އެކްޓަރު ކަމަށް ބުނެފައިވެ އެވެ.

ފާހަގަކޮށްލެވޭ ކަމަކީ މި ދެ މީހުންގެ ލޯބީގެ ވާހަކަތައް މީޑިއާތަކުގެ ސުރުހީތަކަށް އެރި އިރު، ޕިޓާއި އެލާގެ އުމުރުގައި ވަރަށް ބޮޑު ތަފާތެއް ހުރި ކަމެވެ. ދެ މީހުންގެ އުމުރުގައި 32 އަހަރުގެ ތަފާތެއް އެބަ ހުއްޓެވެ. މީޑިއާތަކުން މިކަން ފާހަގަކޮށް ބުނެފައި ވަނީ އެލާ އާއި ޕިޓްގެ ދަރިފުޅު މެޑޮކްސްއާ ދެމެދު ހުރީ އެންމެ ފަސް އަހަރު ތަފާތެއް ކަމަށެވެ.

އެހެންވެ އުމުރުގެ އެހާ ބޮޑު ތަފާތެއް ހުރި އަންހެން ކުއްޖަކާ ގުޅިގެން ޕިޓަށް ކިހާ ދުވަހެއް ވަންދެން އުޅެވިދާނެތޯ މީޑިއާތަކުން ސުވާލު އުފައްދާފައިވެ އެވެ. ޖޮލީއާ ކައިވެނި ކުރުމުގެ ކުރިން ޕިޓް ވަނީ "ފްރެންޑްސް" އިން ވިދާލި ބަތަލާ ޖެނިފާ އެނިސްޓަންއާ ވެސް ކައިވެނިކޮށްފަ އެވެ.

އެލާ ފިލްމީ ދާއިރާ އަށް ނިކުތީ 2010 ގައި ރިލީޒް ކުރި "ނެވަ ލެޓް މީ ގޯ" އިންނެވެ. އޭގެ ފަހުން އޭނާ ކުޅެފައިވާ ބައެއް ފިލްމްތަކުގެ ތެރޭގައި އިންޓްރޫޑާޒް (2011)، ކިކް-އެސް 2 (2013) އަދި މި އަހަރު ރިލީޒް ކުރި "ޗާޗިލް" ހިމެނެ އެވެ.