މި އަހަރު ރިލީޒް ކުރާނެ ކަމަށް ބުނެ މިދިޔަ އަހަރު އިއުލާން ކުރި ޓައިގާ ޝްރޮފްގެ ފިލްމް "ރާމްބޯ" ގެ ޝޫޓިން އަންނަ އަހަރު ފަށަން ނިންމައި، ފިލްމް 2020 ގައި ސިނަމާ އަށް ގެންނަ ގޮތަށް ހަމަޖައްސައިފި އެވެ.
މި ބަދަލާ ބެހޭ ގޮތުން ފިލްމްގެ ޑައިރެކްޓަރު ސިދާތު އާނަންދު ބުނީ އެގޮތަށް ނިންމީ ފިލްމަށް ތައްޔާރުވާން އިތުރު ވަގުތު ބޭނުންވާތީ އެވެ. "ރާމްބޯ" އަށް ޓައިގާ އަނެއްކާ ވެސް ހަށިގަނޑު ވަރަށް ބޮޑަށް ބިލްޑްއަޕް ކުރަން ޖެހެ އެވެ.
ނަމަވެސް މިހާރު ސިނަމާގައި ބޮޑު ކާމިޔާބީއެއް ހޯދަމުން އަންނަ އެކްޝަން ފިލްމް "ބާގީ 2" އަށް ހަށިގަނޑު ބިލްޑް ކުރުމަށް ފަހު، ޓައިގާ އަށް މިހާރު ޖެހިފައި ވަނީ "ސްޓޫޑަންޓް އޮފް ދި އިޔާ 2" ކުޅެން ކޮލެޖް ޒުވާނެއްގެ ހަށިގަނޑު ދައްކުވައިދޭ ކަހަލަ ބައްޓަމަކަށް ސައިޒްވާށެވެ. އެ މަސައްކަތް އޭނާ މިހާރު ފަށާފައިވާ އިރު، ޓައިގާ ދެން އެންމެ އަވަހަށް ޝޫޓް ކުރަން ފަށާނެ ފިލްމަކީ ވެސް މިއީ އެވެ.
ކަރަން ޖޯރަހް ޕްރޮޑިއުސްކޮށް، ޕުނިތު މަލްއުތުރާ ޑައިރެކްޓް ކުރާ "ސްޓޫޑަންޓް އޮފް ދި އިޔާ 2" ރިލީޒް ކުރަން ތާވަލުކޮށްފައި ވަނީ އަންނަ ނޮވެމްބަރު މަހުގެ 23 ގަ އެވެ.
ޓައިގާގެ ވަރުގަދަ އެކްޝަންތަކެއް އަނެއްކާ ވެސް ފެނިގެން ދާނެ "ރާމްބޯ" އަކީ ހޮލީވުޑްގެ މަޝްހޫރު އެކްޓަރު ސިލްވެސްޓާ ސްޓެލޯން 1982 ގައި ކުޅުނު ފިލްމް "ރާމްބޯ" ގެ ހިންދީ ރިމެކިންއެކެވެ. މި ފިލްމް ޑައިރެކްޓް ކުރާ ސިދާތުއަކީ "ސަލާމް ނަމެސްތާ" އާއި "ބޭންގް ބޭންގް" ފަދަ ފިލްމްތައް ގެނެސް ދިން ޑައިރެކްޓަރެވެ.
ޓައިގާގެ ކުރިއަށް ހުރި އިތުރު ފިލްމްތަކުގެ ތެރޭގައި ރިތިކް ރޯޝަނާއި ވާނީ ވާނީ ކަޕޫރާ އެކު ކުޅޭ އަދި ވަކި ނަމެއް އިއުލާންކޮށްފައި ނުވާ ޔާޝް ރާޖް ފިލްމްސް (ވައިއާރްއެފް) ގެ ފިލްމާއި "ބާގީ 3" ހިމެނެ އެވެ.
ވައިއާރްއެފްގެ ފިލްމަކީ ވެސް ސިދާތު ޑައިރެކްޓް ކުރާ ފިލްމެެއްކަން ފާހަގަކޮށްލެވެ އެވެ. އެ ފިލްމް ރިލީޒް ކުރަން ތާވަލުކޮށްފައި ވަނީ އޮކްޓޯބަރު، 2، 2019 ގަ އެވެ.