ސާރާ އަލީ ހާން ގޮވައިގެން ޑައިރެކްޓަރު އަބީޝެކް ކަޕޫރް ކޯޓަށް

ސައިފް އަލީ ހާންގެ ދަރިފުޅު ސާރާ އަލީ ހާން ބޮލީވުޑަށް ތައާރަފުވާން ސޮއި ކުރި ފިލްމް "ކެދަރްނާތު" އަށް މައްސަލައަކަށް ފަހު މައްސަލައެކެވެ. ފުރަތަމަ ޑައިރެކްޓަރު އަބިޝެކް ކަޕޫރާއި ޕްރޮޑަކްޝަން ހައުސް ކްރިއާޖް އެންޓަޓައިންމަންޓާ ދެމެދު ޖެހުނު މައްސަލަތަކާ ހެދި ފިލްމްގެ މަސައްކަތް ހުއްޓުމަކަށް އަ އެވެ. ނަތީޖާއަކީ މި ފިލްމް މި އަހަރު ފެންނާނެތޯ ސުވާލު ވެސް އުފެދުމެވެ.

އެކަން ހައްލުކޮށް "ކެދަރްނާތު" ގެ ޕްރޮޑިއުސަރުގެ ޒިންމާއާ ރޯނީ ސްކްރޫވާލާ ހަވާލުވެ އަންނަ ނޮވެމްބަރު މަހުގެ 30 ގައި ފިލްމް ރިލީޒް ކުރާނެކަން އިއުލާން ކުރުމާ އެކު، އަނެއްކާ ވެސް އަނެއް މައްސަލަ އެވެ. މި ފަހަރު ސީދާ ސާރާއާ ގުޅުން ހުރި މައްސަލައެކެވެ.

"ކެދަރްނާތު" މައްސަލަގަނޑެއްގެ ތެރެއަށް ދިއުމުން ސާރާ ވަނީ ކަރަން ޖޯހަރް ޕްރޮޑިއުސްކޮށް، ރޯހިތު ޝެޓީ ޑައިރެކްޓް ކުރާ ފިލްމް "ސިމްބާ" އަށް ސޮއިކޮށްފަ އެވެ. ރަންވީރް ސިންގް ބަތަލުގެ ރޯލް ކުޅޭ އަދި ޑިސެމްބަރު 28 ގައި ރިލީޒް ކުރާ ފިލްމަށް ސާރާ ސޮއި ކުރިކަން ކަރަން އާއި ރޯހިތު އިއުލާން ކުރީ މާޗް މަހުގެ 20 ވަނަ ދުވަހު އެވެ.

މިހާރު ދިމާވެގެން މި އުޅޭ މައްސަލައަކީ އެ ފިލްމްގެ ޝޫޓިން ޖޫން މަހު ފަށާ އިރު، ސާރާ އަށް "ކެދަރްނާތު" އަށް ވަގުތު ދެވެން ނެތުމެވެ. މި މައްސަލާގައި އަބިޝެކް ބުނީ ސާރާއާ ބައްދަލުކޮށް މި މަހުން ފެށިގެން ޖޫން އަށް ފިލްމްގެ ބާކީ މަންޒަރުތައް ނަގަން ޖެހޭ ކަމަށް އަންގާފައި ވާނެ ކަމަށެވެ. އަދި މިދިޔަ އަހަރު އެ ފިލްމް ކުޅެން ސާރާއާ އެކު ހެދި އެއްބަސްވުމުގައި "ކެދަރްނާތު" ރިލީޒް ވުމުގެ ކުރިން އެހެން އެއްވެސް ފިލްމަކަށް ސޮއި ނުކުރަން އެއްބަސްވެފައި އޮންނާނެ ކަމަށް ވެސް އަބިޝެކް ބުންނެވެ.

އެހެންވެ އެހެން ފިލްމަކަށް ސޮއިކޮށް "ކެދަރްނާރު" އަށް ސާރާ ވަގުތު ނުދިނުމަކީ އެގްރިމަންޓާ ހިލާފުވުން ކަމަށް ބުނެ އަބިޝެކް ވަނީ މައްސަލަ ކޯޓަށް ހުށަހަޅައިފަ އެވެ. އަދި ލިބުނު ގެއްލުމުގެ ބަދަލަށް ސާރާގެ އަތުން ފަސް ކްރޯޑް ރުޕީސް ވެސް ނަގައި ދޭން އަބިޝެކް އެދިފައިވާ ކަމަށް ރިޕޯޓްތައް ބުނެ އެވެ.

މި މައްސަލާގައި ސާރާ އާއި އޭނާގެ ބައްޕަ ސައިފް ވެސް އަބިޝެކާ ބައްދަލުކޮށްފައިވެ އެވެ. އެކަމަކު ކޯޓްގައި އޮތް މައްސަލަ އޮތީ ކިހާ ހިސާބެއްގައި ކަމެއް ސާފެއް ނުވެ އެވެ.

ސުޝާންތު ސިންގް ރާޖްޕޫތު ބަތަލުގެ ރޯލް ކުޅޭ "ކެދަރްނާތު" ގެ ޝޫޓިން ހުއްޓައިލަން ޖެހުނު އިރު، ފިލްމްގެ ވަރަށް ބޮޑު އޮތީ ޝޫޓްކޮށް ނިމިފަ އެވެ. އެހެންވެ އަބިޝެކް މިހާރު ބޭނުން ވަނީ ބާކީ މަންޒަރުތައް ނަގާށެވެ.

"ކެދަރްނާތު" އަށް ކުރިމަތިވި މައްސަލަތަކާ ހެދި ސައިފް ހުރީ ކަންބޮޑުވެފަ އެވެ. އޭނާ ބުނި ގޮތުގައި ދަރިފުޅުގެ އަލަތު ފިލްމްގެ މަސައްކަތްކޮށް އޮމާންކޮށް ދާން އޭނާ ބޭނުންވެ އެވެ. ރިޕޯޓްތައް ބުނާ ގޮތުން "ސިމްބާ" އަށް ސާރާ ސޮއި ކުރީ ވެސް ގާތް އެކުވެރިޔާ ކަރަންއާ ސައިފް ވަރަށް ބޮޑަށް މަޝްވަރާ ކުރުމަށް ފަހު އެވެ.

ސައިފް އެންމެ ފުރަތަމަ ވެސް ބޭނުންވީ ކަރަން ޕްރޮޑިއުސް ކުރާ ފިލްމަކުން ސާރާ ބޮލީވުޑަށް ނެރޭށެވެ. އެކަމަކު "ކެދަރްނާތު" އަށް ދަރިފުޅު ސޮއި ކުރުވީ، ކުރީގެ އަންހެނުން އަދި ސާރާގެ މަންމަ އަމްރިތާ ސިންގް އެވެ.

"ކެދަރްނާތު" އަކީ މިހާރު ރޯނީ ސްކްރޫވާލާ އާއި އަބިޝެކްގެ ގާއި އިން ދަ ސްކައި ޕްރޮޑަކްޝަން ގުޅިގެން ގެނެސްދޭ ފިލްމެކެވެ. މިހާރު ސުވާލަކީ އާ މައްސަލަގަނޑާ އެކު ނޮވެމްބަރު 30 ގައި ފިލްމް ރިލީޒް ކުރާނެތޯ އެވެ؟