ބޮލީވުޑްގެ ބަތަލާ ދީޕިކާ ޕަދްކޯން ވެސް މުހިއްމު ރޯލެއް ކުޅެ މިދިޔަ އަހަރު ރިލީޒް ކުރި "ޓްރިޕްލް އެކްސް" ގެ ތިން ވަނަ ފިލްމް "ޒެންޑް ކޭޖް" އަށް ފަހު، އެ ޓީމް މިހާރު އަންނަނީ މީގެ ހަތަރު ވަނަ ބަޔަށް ވެސް ތަައްޔާރުވަމުންނެވެ.
ސުވާލަކީ މި ފަހަރު ވެސް ދީޕިކާ ފެންނާނެ ބާވަ އެވެ. ޑައިރެކްޓަރު ޑީޖޭ ކަރޫޒޯ ބުދަ ދުވަހު ކުރި ޓްވީޓަކުން ދީޕިކާ ހަތަރު ވަނަ ބައިން ވެސް ފެންނާނެ ކަމަށް ބެލެވެ އެވެ. ދީޕިކާ ޓެގްކޮށްފައި ޑީޖޭ ކުރި ޓްވީޓްގައި ބުނީ ހަތަރު ވަނަ ބަޔާއެކު "ޓްރިޕްލް އެކްސް" ނިންމާލައި، އޭގައި ބޮލީވުޑްގެ ލަވައެއް ވެސް ހިމަނަން ބޭނުންވާ ކަމަށެވެ.
"ލުންޑީ ޑާންސް ކިހިނެއް ވާނެ؟ ނޫނީ އެ ނޫން އާ ވައްތަރެއްގެ ލަވައެއް ކިހިނެއް ވާނެ؟" ޑީޖޭގެ ޓްވީޓްގައި ސުވާލުކޮށްފައިވެ އެވެ.
އޭނާގެ މި ޓްވީޓުން ޔަގީންކޮށް ދޭން ބޭނުންވީ ދީޕިކާ "ޓްރިޕްލް އެކްސް" ގެ ހަތަރު ވަނަ ބައިން ވެސް ފެންނާނެ ކަމެވެ. އެކަމަކު ރިޕޯޓްތައް ބުނާ ގޮތުގައި މި ސިލްސިލާގެ އިތުރު ބައެއް ކުޅުމުގެ އެހާ ބޮޑު ޝައުގުވެރި ކަމެއް ދީޕިކާގެ ނެތެވެ.
ވިން ޑީޒެލް ބަތަލުގެ ރޯލް ކުޅޭ ސިލްސިލާގެ އެންމެ ފަހުގެ ފިލްމަށް ބޮކްސް އޮފީހުގައި 346.1 މިލިއަން ޑޮލަރުގެ އާމްދަނީއެއް ލިބިފައިވެ އެވެ. "ރިޓާން އޮފް ޒެންޑަ ކޭޖް" އަކީ 85 މިލިއަން ޑޮލަރުގެ ބަޖެޓަލުން ހެދި ފިލްމެކެވެ.
އެކަމަކު ބޮލީވުޑްގެ ލަވައެއް ފިލްމްގައި ހިމަނައި ލުންގީ ޑާންސް (މުންޑު ލައިގެން ނަށާ ކަހަލަ ލަވައެއް) ގެ ވާހަކަ ޑީޖޭ ފާހަގަކޮށްފައިވާތީ، ދީޕީކާ އާއި ޝާހްރުކް ހާންގެ "ލުންގީ ޑާންސް" ލަވަ ވެސް އޭނާ ބަލައިފައިވާ ކަމަށް ބެލެވެ އެވެ. އެ ލަވައަކީ 2013 ގައި ރިލީޒް ކުރި ފިލްމް "ޗެންނައި އެކްސްޕްރެސް" ގައި ހިމެނޭ ލަވައެކެވެ.
މި އަހަރު ރިލީޒް ކުރި "ޕަދްމާވަތު" އަށް ފަހު، ދީޕިކާ އެއްވެސް ފިލްމަކަށް ސޮއެއް ނުކުރެ އެވެ. އިރްފާން ހާނާ އެކު އޭނާ ކުޅެން އޮތް ފިލްމެއް، އިރްފާން ވަނީ ބަލިވެގެން ވަނީ ފަސްކޮށްފަ އެވެ.
ބޮލީވުޑްގެ ހަބަރުތައް މިހާރު ބުނާ ގޮތުން ދީޕިކާ މިހާރު އަންނަނީ ސުޕަހީރޯ ފިލްމަކަށް ސޮއި ކުރަން ތައްޔާރުވަމުންނެވެ. އަދި "ޓްރިޕްލް އެކްސް 4" އަށް ސޮއި ކުރިކަން އޭނާ ކަށަވަރެއް ވެސް ނުކޮށްދެ އެވެ.