"ހުވާ"ގެ ޓްރެއިލާ ދައްކާލައިފި، ސްޓްރީމްކުރާނީ 29 ގައި

ރާއްޖޭގެ ފުރަތަމަ ވެބް ސީރީޒް "ހުވާ" ގެ ޓްރެއިލާ ރޭ ދައްކާލައިފި އެވެ.

ފާތުމަތު ނަހުލާ އުފައްދާ މި ވެބް ސީރީޒްގެ ޓްރެއިލާ ބެލުންތެރިންނަށް ދޫކޮށްލީ އެ ސްޓްރީމް ކުރަން ހަމަޖެހިފައިވާ މޮބައިލް އެޕްލިކޭޝަން "ބައިސްކޯފް" ލޯންޗް ކުރަން ރޭ ދަރުބާރު ގޭގައި ބޭއްވި ހަފުލާއެއްގަ އެވެ.

މީގެ ކުރިން ވަރަށް ކާމިޔާބު ފިލްމުތަކާއި ޑްރާމާ ސިލްސިލާތަކެއް ވެސް ގެނެސް ދީފައިވާ ނަހުލާ ބުނި ގޮތުގައި "ހުވާ" އަކީ ފިލްމީ ދާއިރާގެ ވަރަށް ގިނަ ބަޔަކު ވެބް ސީރީޒްތަކެއް ހަދަން ވިސްނަމުން ދަނިކޮށް، އޭނާ އަށް ފަހިވެގެން ދިޔަ ފުރުސަތެކެވެ.

އެހެންވެ ރާއްޖޭގެ ފުރަތަމަ ވެބް ސީރީޒް ހެދުމުގެ ޝަރަފު ތަނަވަސް ދޮރަކާ އެކު ހުޅިވައިލަ ދިން "ބައިސްކޯފް" ސީއީއޯ މިރުސާދު (މިރޫ) ނާސިރަށް ނަހުލާ ވަނީ ވަރަށް ބޮޑަށް ޝުކުރު އަދާކޮށްފަ އެވެ.

މީރޫއަކީ ދިވެހި ފިލްމުތަކެއް ޕްރޮޑިއުސްކޮށްފައިވާ މަޝްހޫރު ވިޔަފާވެރިޔާ އަހުމަދު (މައްލާ) ނާސިރުގެ ދަރިއެކެވެ. މައްލާ އެންމެ ފަހުން ޕްރޮޑިއުސް ކުރި ފިލްމަކީ މިދިޔަ އަހަރު އެޅުވި "މަލިކާ" އެވެ.

ނަހުލާ ބުނީ "ހުވާ" ޝޫޓް ކުރަން މިރޫ އާއި އޭނާގެ ޓީމުން ވަރަށް ވެސް ރީތި އެހާމެ ހިތްގައިމު ސެޓެއް ވެސް ތައްޔާރުކޮށް ދީފައިވާ ކަމަށެވެ. އެހެންވެ މިރޫއަކީ ފިލްމީ ދާއިރާ އަށް ލިބުނު ޖަވާހިރެއްގެ ގޮތުގައި އޭނާ ސިފަކޮށްދައިވެ އެވެ.

"ހުވާ" އަކީ މި އަހަރުގެ ފެބްރުއަރީ މަހުގެ ތެރޭގައި މަސައްކަތް ފެށި އެއްޗެކެވެ. ރާއްޖޭގެ ވަރަށް ގިނަ މަޝްހޫރު ތަރިންތަކެއް ހިމަނައިގެން ހަދާފައިވާ މި ވެބް ސީރީއަކީ ނަހުލާގެ ވާހަކައަކަށް އޭނާ އާއި މުހައްމަދު ފައިސަލް ޑައިރެކްޓްކޮށްފައިވާ އެއްޗެކެވެ.

"ހުވާ" ކާސްޓުންގެ ތެރޭގައި ފައިސަލް، ޝީލާ ނަޖީބް، ޔޫސުފު (ޔޫއްޕެ) ޝަފީއު، އައިމިނަތު ރިޝްފާ، އިބްރާހީމް (ޖިމީ) ޖިހާދު، މަރިޔަމް އައްޒަ، ރަވީ ފާރޫގް، މަރިޔަމް ޝަކީލާ، އަލީ (ދޮންއައްޔަ) އާޒިމް، އިރުފާނާ (އިރޫ) އިބުރާހީމް، އަހުމަދު (އާނަންދު) އީސަ، ނާޝިދާ (ނާއްކޮ) މުހައްމަދު، އާރިފާ އިބްރާހީމް އަދި ހަސަން (ރޯނު) މަނިކު ހިމެނެ އެވެ.

"ހުވާ" ބައިސްކޯފް އެޕުން ސްޓްރީމް ކުރަން ފަށާނީ މި މަހުގެ 29 ވަނަ ދުވަހުން ފެށިގެންނެވެ. ނަހުލާ ބުނި ގޮތުގައި މިއީ ހުރިހާ ރަހައެއް ވެސް ހެޔޮވަރުކޮށް ހަދާފައިވާ މަސާލާގަނޑެކެވެ.

"ބައިސްކޯފު" އަކީ ރާއްޖޭގެ މުނިފޫހި ފިލުވުމުގެ ދާއިރާގެ ހުރިހާ ކޮންޓެންޓެއް ބެލުންތެރިންގެ އިނގިލި ކުރިއަށް އަންނާނެ އެއްޗެކެވެ. މި އެޕް މިހާރު އެޕަލް އާއި ގޫގުލް ސްޓޯރުން ޑައުންލޯޑް ކުރެވޭނެ އެވެ.