ރާނީ މުކަރްޖީގެ "މަރުދާނީ" ގެ ދެވަނަ ބައި ހަދާކަން އިއުލާންކޮށްފި

ދެހާސް ސާދަ ވަަނަ އަހަރު ރާނީ މުކަރްޖީ ފުލުހެއްގެ ރޯލު ކުޅުނު ކާމިޔާބު ފިލްމު "މަރުދާނީ" ގެ ދެވަނަ ބައި ހަދަން ނިންމާފައިވާކަން އެ ފިލްމު ގެނެސް ދިން ޔާޝްރާޖް ފިލްމްސް (ވައިއާރްއެފް) އިން ޔަގީންކޮށް ދީފި އެވެ.

ރާނީގެ ފިރިމީހާ އަދިތިޔާ ޗޯޕްޅާގެ ފިލްމު ކުންފުނިން ނެރުނު ބަޔާނެއްގައި ބުނީ "މަރުދާނީ 2" ގެ ޝޫޓިން އަންނަ އަހަރުގެ ކުރީކޮޅު ފަށާނެ ކަމަށާއި ފިލްމު އަންނަ އަހަރުގެ މެދުތެރޭގައި ސިނަމާތަކަށް ގެންނާނެ ކަމަށެވެ.

ނަމަވެސް ދެވަނަ ބައި ޑައިރެކްޓް ކުރަން ހަވާލުކޮށްފައި ވަނީ ޕްރީކުއެލްގެ ސްކްރީންޕްލޭ ލިޔުނު ގޯޕީ ޕުތުރާންއާ އެވެ. "މަރުދާނީ 2" ވެގެން ދާނީ އޭނާގެ އަލަތު ޑައިރެކްޝަނަށެވެ.

މުމްބާއީ ފުލުހުންގެ ކްރައިމް ބްރާންޗްގެ ސީނިއާ އިންސްޕެކްޓަރު ޝިވާނީ ޝިވާޖީ ރޯއިގެ ކެރެކްޓާ ރާނީ ކުޅުނު "މަރުދާނީ" ޑައިރެކްޓް ކުރީ ދާދި ފަހުން ރިލީޒް ކުރި ކާޖޮލްގެ "ހެލިކޮޕްޓާ އީލާ" ގެ ޑައިރެކްޓަރު ޕުރަދީޕް ސަރުކާރް އެވެ. "މަރުދާނީ" އަކީ ކުޑަކުދިން ޓްރެފިކް ކުރުމާއި މަސްތުވާތަކެތީގެ މައްސަލަތަކާ ދެކޮޅަށް ފުލުހަކު ކުރާ މަސައްކަތްތައް ދައްކުވައިދޭ ފިލްމެކެވެ.

ވައިއާރްއެފްގެ ބަޔާނުގައި "މަރުދާނީ" ގެ ދެވަނަ ބައި ހަދަން ނިންމި ސަބަބަކީ ފިލްމު ވަރަށް ގިނަ ބަޔަކަށް ކަމުދިއުމާ އެކު، ރާނީ ކުޅެފައިވާ ޖެހިލުން ކުޑަ ފުލުސް މީހާގެ ރޯލު އަލުން ސްކްރީނުން ބަލައިލަން ވެސް ބެލުންތެރިން ބޭނުންވާތީ އެވެ. އަދި ފުރަތަމަ ބަޔާ އެއްގޮތަށް ދެވަނަ ބައި ވެސް ބެލުންތެރިންނަށް ކަމުދާނެ ފިލްމަކަށް ވާނެ ކަމުގެ ޔަގީންކަންދޭ ކަމަށް ބުންޏެވެ.

ރާނީ ބުނީ ގޯޕީ ލިޔެފައިވާ "މަރުދާނީ 2" ގެ ސްކްރިޕްޓަކީ އާދަޔާހިލާފު މޮޅު ސްކްރިޕްޓެއް ކަމަށެވެ.

"އަހަރެން މިހާރު މިހުރީ މި ފިލްމުގެ ޝޫޓިން ފަށަން ކެތްމަދުވެފައި،" ކާމިޔާބު ވަރަށް ގިނަ ފިލްމުތަކެއް ކުޅެފައިވާ ބަތަލާ ބުންޏެވެ.

ދެހާސް ސާދަ ވަނަ އަހަރުގެ އޮގަސްޓް މަހުގެ ތެރޭގައި ރިލީޒް ކުރި "މަރުދާނީ" އަކީ ބޮކްސް އޮފީހުގައި 57 ކްރޯޑް ރުޕީސްގެ އާމްދަނީއެއް ހޯދި ފިލްމެކެވެ. އެ ފިލްމު ހަދަން ހޭދަ ކުރީ 21 ކްރޯޑް ރުޕީސް އެވެ.

ރާނީގެ އެންމެ ފަހުގެ ފިލްމަކީ މި އަހަރުގެ މާޗްގައި ރިލީޒް ކުރި ފިލްމު "ހިޗްކީ" އެވެ. އުކުނިކޮއްޓާ މައްސަލަ ހުންނަ ޓީޗަރެއްގެ ރޯލް ރާނީ ކުޅުނު އެ ފިލްމަކީ ވެސް ވަރަށް ހިނގި ފިލްމެކެވެ.

ފިލްމަށް ބޮކްސް އޮފީހުގައި 233.4 ކްރޯޑް ރުޕީސްގެ އާމްދަނީއެއް ލިބުނު އިރު، ފިލްމަށް ހަރަދު ކުރީ އެންމެ 12 ކްރޯޑެވެ.

"ހިޗްކީ" އަކީ ވެސް ވައިއާރްއެފްގެ ފިލްމެކެވެ.